Ministru Justisa, Manuel Cárceres da Costa. Imaje/Antonio Goncalves

MANATUTU, 20 maiu 2019 (TATOLI) – Ministru Justisa, Manuel Cárceres, konsidera justisa iha Timor-Leste la fraku, maibé problema ne’ebé jurista sira enfrenta mak lian-portugés, tanba ne’e governu kontinua investe iha formasaun.

“Ema polítika, públiku hateten justisa fraku, más ba ha’u hanesan ministru ha’u dehan justisa la fraku, sira nia problema maka seidauk domina lian-portugés, iha loron ne’ebé sira domina portugés maka setór justisa mós sei la’o di’ak”, katak ministru hafoin prezide serimonia isar bandeira ba loron restaurasaun independensia ba dala 17 iha munisípiu Manatutu, ohin.

Nu’udar membru governu, kontinua tau konfiansa ba autoridade judisiária, mesmu sira nafatin hasoru limitasaun oin-oin hodi fó justisa ba públiku.

“Durante ha’u nia mandatu maka sei hadi’a setór justisa. Kompromete ba ha’u nia án, nunka hakarak krítika juis, prokuradór, defensór no advogadu, tanba sira barak liu moris iha tempu Indonézia nian, la hatene portugés maibé agora servisu ho lei ne’ebe hakerek ho lian-portugés”, akresenta.

“Ha’u nu’udar ministru justisa ha’u hato’o parabéns no orgullu, sé sira ne’e mák lakohi hotu sai juis, prokuradór, defensór no advogadu, ita iha Timór laiha justisa”.

Tan ne’e, Cárceres sei esforsu atu tau iha planu hodi fó formasaun nafatin ba autoridade judisiária hodi amenta kapasidade iha lian-portugés.

Nia mós promete sei la halo intervensaun ba tribunál. “Kazu ne’ebé akontese, kuandu tama ona iha tribunál ha’u labele intervén tribunál nia knaar, ministru halo polítika de’it”.

Kódigu penál Timór-Leste, artigu 47 alinea 1 hatete; juis, iha tribunál singulár ka koletivu, maka kompeténsia atu halo julgamentu iha prosesu penál.

Kódigu penál artigu 48; ministériu públiku nia atribuisaun, iha númeru 1 hatete; ministériu públiku maka kaer asaun penál, no iha ne’e nia tenke kolabora ho tribunál hodi hetan verdade no realiza direitu, no tuir kritériu estrita legalidade no objetividade iha nia intervensaun prosesúal hotu-hotu.

Kódigu Penál TL iha artigu 67 kona-ba defensór nia atribuisaun, iha artigu ne’e iha númeru 1 hatete; defensór fó asisténsia téknika ba arguidu no ezerse direitu ne’ebé lei fó ba arguidu, salvu sira ne’ebé arguidu rasik maka bele ezerse.

Advogadu privadu fó asisténsia legál mós ba arguidu, maibé ba sira ne’ebé kbiit finanseira forte.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here