Ministru Justisa, Manuel Cárceres da Costa. Imajen/Antonio Goncalves

MANATUTU, 20 maiu 2019 (TATOLI) – Governu liuhosi Ministru Justisa (MJ), Manuel Cárceres da Costa, enkoraja agrikultór munisípiu Manatutu atu servisu maka’as hodi hasa’e produsaun agrikula, tanba fatin ne’e natar no to’os ne’ebé luan ho bee mota barak hodi utiliza.

“Mensajen Prezidente Repúblika nian furak tebes, fó korajen ba Timór oan hothotu, fó korajen mós ba ami Manatutu oan sira atu servisu maka’as atu hatene gasta osan, labele hanoin gasta osan de’it, maibé hanoin mós buka osan”, katak nia hafoin prezide serimonia isar bandeira iha selebrasaun loron restaurasaun independensia ba dala-17 iha Manatutu, ohin.

Nia afirma: “Ko’alia kona ba agrikultura, ami Manatutu nia natar no toos boot, ami nia bee mota barak, ne’ebé ba oin Manatutu oan sira iha hanoin ona atu hasa’e produtividade agrikultura”.

Iha fatin hanesan, administradór munisípiu Manatutu, Fernando Sousa Junior, hateten diskursu Xefe Estadu interesante.

“Mensajen Prezidente Repúblika nian interesante tebes, tanba ami Manatutu oan maioria moris ho toos no natar, ne’ebé mensajen ne’e bele motiva ami, ha’u nu’udar administradór sei hato’o mensajen ne’e to’o suku liu hosi ha’u nia xefe suku sira”, afirma.

Entretantu, iha Orsamentu Jerál Estadu tinan 2019 Governu prevee porsentu 11 ba setór produtivu inklui agrikultura.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here