Jornalista Agência Tatoli entrevista veteran Joaquina Rosa Morato “Muky” iha Lautém, iha seremónia loron Restaurasaun Independénsia Timor-Leste ba dala 17

LAUTÉM, 21 maiu 2019 (TATOLI)—Sekretáriu Estadu Komunikasaun Sosiál (SEKOMS), Merício Juvinal “Akara” husu atu veteranu sira tenki hamutuk atu sai protetór ba Estadu hodi hamutuk liberta povu hosi mukit.

Akara dehan, veteranu nu’udar patrimóniu Estadu ne’ebé iha responsabilidade atu fó kontribuisaun ba dezenvolvimentu. Veteranu labele hanoin atu krítika de’it Estadu, maibé apoiu Estadu oinsá liberta povu sai hosi mukit.

Iha funu tinan 24, veteranu sira unidade no kaer metin sira nia filozofia funu: “Liberta Pátria, Liberta Povu”, agora ukun aan ona tenki unidade luta hasoru problema hodi hamutuk luta sai hosi mukit.

 “Ita-boot sira (veteranu) tenki hanoin enerjia ne’ebé pozitivu. Labele hanoin negativu mak barak. Se imi hanoin negativu sei la fó valór ba ita-nia prosesu ukun aan. Tanba uluk imi hamutuk mak liberta pátria, agora imi hamutuk nafatin ita liberta fali povu sai hosi mukit,” dehan Akara durante hala’o reuniaun ho veteranu sira, hafoin partisipa festa Restaurasaun Independénsia 20 Maiu iha kampu 745 Lospalos Vila, Munisípiu Lautém, ho tema “Unidade Nasionál”, segunda ne’e.

Nia dehan, governu rekoñese iha ukun aan problema sosiál, edukasaun, saúde, estrada no eletrisidade no seluk tan Estadu seidauk konsege rezolve hotu, maibé governu iha kompromisu atu hadi’a povu nia moris asesu ba buat hotu.

Iha fatin hanesan, veteranu rejiaun I Lautém, Afonso Cabral “Mate Mak Foti” tenik unidade nasionál tenki hahú hosi líder rezisténsia hanesann Xanana, Lú Olo, Marí Alkatiri no líder sira seluk-tan.

 “Ha’u hanoin maun Xanana, Lú Olo, Marí no timoroan sira tenki kaer metin ita-nia prinsípiu uluk ita dehan: “Liberta Pátria, Liberta Povu”. Agora ita ukun aan, entaun maun boot sira ita hamutuk ba halo polítika para hadi’a povu-nia moris sai hosi mukit,” Mate Mak Foti informa.

 Liberta povu hosi mukit, tuir nia, governu tenki hadi’a estrada, bee-moos, lori eletrisidade lakan iha povu nia uma, labarik sira nu’udar futuru nasaun tenki eskola ho kondisaun di’ak, fasilita saúde di’ak povu tuir prinsípiu ukun rasik aan.

“Ita nia povu ne’e hakarak estrada di’ak, edukasaun di’ak, saúde besik ba povu, atu ita bele kontente ho ita nia ukun aan ne’e,” nia hatete.

Nune’e mós veterana, Joaquina Rosa Morato “Muky” espera ba oin governu bele rezolve problema liliu problema feto tanba feto barak hela iha área rurál susar tebes asesu ba saúde bainhira atu partu.

Ho ukun aan ne’e, nia husu atu governu presiza investe mak’as liu iha setór produtivu atu lori Timor-Leste hetan reseita mak’as liu-tan.

Nune’e mós, veteranu “Kasian Susar” husu atu líder polítiku sira tenki unidade hodi hadi’a povu nia moris nu’udar interese nasionál.

Entretantu, veteranu rezisténsia (luta tinan 24) Rejiaun I Ponta Leste hosi Suku Maupitene, Postu Administrativu Lospalos, Lautém, João da Costa “Mausoro” agradese ho festa independénsia atu lori timoroan hametin liu-tan unidade.

Muasoro husu ba governu atu hadi’a estrada, bee-moos, harii uma ba povu kbiit laek no hadi’a fasilidade saúde no infraestrutura eskola atu povu nia oan bele asesu ba edukasaun di’ak.

“Festa 20 Maiu ne’e sai hanesan orgullu boot ida ba ami tomak ne’ebé luta ba rai ne’e. Ami hakarak liu mak ita unidade hodi hamutuk hadi’a rai no povu moris,” nia haklaken.

Veteranu ne’e mós preokupa governu harii klínika iha Suku Maupitine, maibé to’o agora la koloka pesoál saúde (infermeiru no parteira) ba ne’ebá.

 “Ami lakohi povu nia oan atu sofre moras no ami nia oan feto sira dala ruma atu ba partu susar tebes tanba parteira no médiku laiha,” nia lamenta.

Iha parte seluk, Vise Prezidente Konsellu Kombatente Nasionál Rejiaun I, Ponta Leste, Júlio M. de Jesus Canto, afirma veteranu mak ai-riin ba Estadu, tan ne’e iha responsabilidade morál hamutuk povu selebra festa independénsia atu halo reflesaun ba pasadu hodi hanoin hadi’a nasaun no povu ba moris di’ak.

 “Komemorasaun tinan 17 independénsia ne’e veteranu no povu hotu sente no reflete ba pasadu atu ita hadi’a di’ak liu-tan saida mak iha, atu kontinua luta ba libertasaun pátria no povu,” dehan Júlio.

Nia promete, veteranu Lautém hotu sei fó kontribuisaun mak’as liu-tan ba kualkér dezenvolvimentu iha Lautém.

Tuir observasaun Tatoli, festa Restaurasaun Independénsia 20 Maiu ne’ebé halo iha Kampu 745, Lospalos Vila, maski udan boot, maibé hetan partisipasaun másimu hosi veteranu, funsionáriu públiku, PNTL, inklui estudante no povu hosi kada suku no postu administrativu lima mak hanesan Lautém, Lospalos, Iliomar, Luro no Tutuala.

Eventu ida ne’e, iha mós motór halai taru, dansa tradisionál, dada tali, kanta múzika no atrasaun seluk-tan, ne’ebé hetan seguransa másimu hosi membru Polísia Nasionál Timor-Leste (PNTL) Lautém.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here