Prezidente Repúblika, Francisco Guterres Lú Olo. Imajen Mídia PR

DISKURSU HOSI SUA EXELÉNSIA PREZIDENTE REPÚBLIKA

DR FRANCISCO GUTERRES LÚ OLO

IHA SELEBRASAUN LORON RESTAURASAUN

INDEPENDÉNSIA TIMOR-LESTE

BA DANULU RESIN HITU

20 MAIU 2019

Palásiu Prezidente Nicolau Lobato

Dili, 20 Maiu 2019

Señor Prezidente Parlamentu Nasional

Señor Primeiru-Ministru

Señor Prezidente Tribunal Rekursu

Señores Eis-Titulares

Señores Deputadus

Señores Membrus VIII Governu Konstitusional

Señor Xefe-Estadu-Maior-Jeneral FALINTIL-FDTL

Señor Komandante Polísia Nasional

Señores Membrus Korpu Diplomátiku,

Maluk Kombatentes Libertasaun Nasionál, hosi Frente Armada, Frente Klandestina no Frente Diplomátika / Esterna

Famílias mártires no kombatentes sira-nian, iha Timor-Leste tomak

Señores Reprezentantes Konfisaun Relijioza

Reprezentante-sira hosi organizasaun sosiedade sivíl

Señoras no señores

Povu Doben Timor-Leste,

Ho ksolok-boot mak ha’u simu proposta hosi VIII Governu atu selebra Aniversáriu loron Restaurasaun Independénsia Timor-Leste nian, iha Palásiu Prezidente Nicolau Lobato, fatin ida ne’ebé Xefe Estadu ezerse ninia dever loron-loron, tuir Konstituisaun haruka no, tuir kompromisu fó-sai ba Povu Timor-Leste, iha 20 Maiu 2017.

Tanba ita selebra loron importante istóriku ida ne’e, iha Palásiu  Prezidente  Nicolau Lobato, ita hotu-hotu nia neon halai  kedas ba legadu valores no prinsípius ne’ebé aman Nasaun  ne’e husik hela mai ita hotu-hotu. Tanba  legadu ne’e importante ba ita-nia moris, nu’udar Povu no Nasaun,  ita presiza haree lalais oinsá kaer sira metin, ohinloron, atu hatutan ba jerasaun aban-bainrua.

Iha selebrasaun 20 Maiu tinan ida ne’e, Prezidente Repúblika, ho Estadu Timor-Leste nia naran, deside rekoñese no valoriza veteranu sanulu ho Kolar Orden Timor-Leste no sanulu resin lima ho Medalla Orden Timor-Leste, ba sira-nia dedikasaun exkluziva ba ita-nia luta Libertasaun Nasionál.

Veteranu sira ne’e husik buat hotu-hotu. Sira husik sira-nia uma, sira-nia bein-estar no sira-nia família,  hodi hako’ak mehi koletivu ida. Família-sira simu sira-nia sakrifísiu ho ksolok no domin.  Infelizmente, husi lista rua nulu resin lima ne’e, nain sanulu resin lima mak labele hatutan misaun boot veteranu sira-nian, iha tempu ukun-an ne’e:   kore Povu husi kiak no mukit. Tamba sira mate ona!

Maluk Sira!

Tema ba selebrasaun tinan ida ne’e mak “Haforsa Unidade no Garante Estabilidade atu hala’o Dezenvolvimentu Nasionál”. Ho dezenvolvimentu mak ita hetan dame. Dezafiu ne’e ezije unidade.  Ho pás no estabilidade mak ita bele hala’o dezenvolvimentu ida ne’ebé halibur ema hotu atu bele lao ba oin ho susesu.  Pás no dezenvolvimentu labele lao ketatketak.

Tebes duni katak ita tenke hametin unidade, hodi garante estabilidade no haburas ita-nia rain babeibeik.  Maibé, unidade ida ne’e tenke hatuur ho regras, prinsípius no valores.  Unidade hametin ho prinsípiu inkluzaun katak la hasees ema ida.

Tamba maturidade ita-nia Povu nian, maka ohin ita iha estabilidade. Ha’u aproveita biban ida ne’e atu agradese papel Forsa Defeza no Seguransa nian hodi garante autoridade Estadu no estabilidade ba ita-nia rain.

Ho estabilidade deit maka ita bele lori dezenvolvimentu ba oin no babeibeik.

20 Maiu 2002 akontese tanba timoroan rasik hatene haburas konxiénsia nasionál ne’ebé hahú hosi grupu nasionalista kiik ida, ne’ebé ita-nia saudozu Prezidente Nicolau Lobato mak lidera informalmente, molok rejime Salazar monu, iha 25 Abril 1974, iha Portugal.

Konxiénsia nasionál mosu tanba grupu kiik ne’e konsege haree katak ita timoroan  iha patrimóniu kulturál boot ne’ebé dada ita hamutuk. Haree mós katak ita timoroan, iha identidade rasik no iha matenek kbiit atu bele ukun rasik-an. Sira haree mós ba ita-nia beiala sira-nia istória hasoru kolonialismu iha reinu ida-idak. Neineik, neineik, sentimentu katak ita pertense ba moris fatin ida de’it, hakotu fronteira entre reinu sira, entre rasa, entre mane no feto, entre liurai no átan, entre fiar-nain hosi relijiaun oioin, entre loro sa’e no loro monu.

Ohinloron, ita bele dehan katak identidade ida ne’e mak halo ita hotu-hotu orgullu-an nafatin, nu’udar timoroan, moris iha uma kain ida de’it: ita-nia  Pátria Timor-Leste.

Maun-bin-alin sira!

“Restaura Independénsia” signifika katak  Povu  no Estadu Timor-Leste valoriza atu proklamasaun unilaterál  independénsia, hosi Komité Sentral FRETILIN, iha 28 Novembru 1975,  ne’ebé  hetan kedas rekoñesimentu husi nasaun balun, inklui eis-kolónia portugueza sira, iha Áfrika. Konstituisaun RDTL konsagra data istórika rua ne’e iha ita-nia prosesu afirma-an, nu’udar Nasaun soberana no independente. 20 de Maiu nu’udar data Proklamasaun Independénsia!

Maluk sira!

Ita hahú ukun ho susar oioin. La iha infraestrutura bázika, ita-nia rekursu umanu oituan liu no Estadu iha orsamentu kiik liu. Maibé iha kedas hanoin, iha tempu ne’ebá, atu hala’o dezenvolvimentu ekonómiku sustentável no, ho ita-nia kbiit no matenek rasik.

Ohin, ita sei hasoru nafatin  dezafiu oioin.  Dezafiu sira ne’e bele hasa’e risku ba ita-nia estabilidade. Ita-nia ema, rikusoin boot liu Timor-Leste nian, sei  moris nafatin iha situasaun kiak no mukit. Futuru rai ida ne’e nian komprometidu tanba labarik ho otas lato’o  sanulu resin haat,  46%, moris iha liña pobreza nia okos.

Produsaun, produtividade no kualidade aihan menus. Taxa dezempregu sei aas tebtebes iha ita-nia rain, ohinloron,  no maioria joven tenke  buka empregu iha rai-liur. Problema falta ai-han,  empregu, bee-moos no eletrisidade ka la iha asesu ba servisus saúde no tratamentu médiku, bele sai faktor ne’ebé bele hamenus  pás sosiál no estabilidade. Problema sira ne’e ezije diálogu. Liuhosi diálogu nakloke ho partisipasaun ativa sidadaun sira-nia,  mak ita bele hetan konsensu no dalan ba solusaun adekuadu ba nasaun-nia problemas.

Maluk barak no ha’u rasik ko’alia beibeik kona-bá diversifikasaun ekonómika. Ekonomia ida ke diversifikadu ba Timor-Leste signifika depende ba agrikultura, indústrias kriativas, manufatura, komunikasaun no teknolojia no produsaun hosi empreza-sira ho eskala kiik no médiu, ne’ebé mak sei dudu kresimentu, haluan oportunidade empregu no promove rikeza. Diversifikasaun ida ne’e maka sei rezolve problema-sira hanesan kiak, no desigualdade. Ekonomia ida hanesan ne’e sei buras no sustentável no sei depende ba bee-matan oioin, laós deit ba reseitas hosi minarai no gás.

Hahú kedas hosi kriasaun mundu ne’e, agrikultura sai instrumentu importante tebes iha dezenvolvimentu umanidade. Ejemplu hosi nasaun barak hatudu ona oinsá agrikultura fó kontribuisaun ba kresimentu ekonomia. Agrikultura mós kontribui ba hamenus kiak no hamlaha iha nasaun barak, sai bee-matan ba dezenvolvimentu seitór-sira seluk no kontribui makas ba konservasaun biodiversidade iha fatin-fatin. Iha Timor-Leste, liu 70% hosi ita-nia populasaun mak hela iha area rural no kuaze 60% moris hosi halo tós, halai natar, kaer/haki’ak ikan no faan aifuan. Maibe, ita-nia produsaun ba han-hemu nian deit no ladauk orienta ba esportasaun.

Ha’u haliis liu ba polítika hasa’e investimentu iha área agrikultura tanba husi rai mak maioria Povu hetan rendimentu ba família sira-nia moris loron-loron.

Ohin ha’u hakarak ko’alia liuliu kona-bá kafé, ita-nia produtu ida ne’ebé koñesidu iha mundu ho kualidade aas. Tuir dadus sensus 2015 no estudu seluk, uma-kain liu rihun tolu nulu resin ualu mak prodús kafé no rihun tolu nulu resin ualu mak  kuda kafé ba konsumu rasik.

Sensus ne’e mós hatudu katak kada uma-kain hetan dólar atus nen kada tinan husi faan kafé. Nune’e, ba kada tinan,  uma-kain rihun tolu nulu resin ualu,  hamutuk, hetan  rendimentu total  dólar tókon rua nulu resin rua (22 millões) kada tinan hosi faan kafé. Dadus hatudu katak kada agrikultór iha Timor-Leste prodús de’it kafé kilograma haat, loron ida.  Iha Costa Rica, agrikultór ida prodús  kafé kilograma rua nulu, loron ida. Ida ne’e hatudu katak ita-nia produtividade sei kiik tebes kompara ho nasaun-sira seluk. Se ita haburas indústria kafé iha rai-laran no hasa’e  ninia kualidade, produsaun no produtividade, ita bele hetan rendimentu aas liu no beibeik hosi merkadu internasional.

Foin lalais ne’e Universidade Monash halo estudu ida ne’ebé hatudu katak, se ita investe dólar tókon atus ida lima nulu resin haat iha área kafé,  sei loke oportunidade servisu ba ema hamutuk rihun hitu nulu resin hitu no, sei fó kontribuisaun real ba ita-nia produtu internu brutu,  hamutuk dólar biliaun hitu resin to’o tinan 2050.

Ho laran-ksolok mak ha’u akompaña katak, parte hotu-hotu ne’ebé envolve iha indústria kafé, hahú husi produtór, kompradór iha rai laran no/ka exportadór, nu’udar individuál ka kompañia, harii ona “Asosiasaun Café Timor-Leste”. Asosiasaun ne’e fó hela  formasaun ba ita-nia produtór sira oinsá tau matan ba kafé atu labele lakon kualidade.  Ho esforsu, iha Asosiasaun ne’ e,  husi  parseiru dezenvolvimentu boboot, hanesan Cooperativa Café Timor-Leste, Timor Global, OLAM, ATT,  GCC-Timor-Leste, PARCIC no Peace Win, ha’u  fiar katak valór  kafé Timor-Leste nian sei sae babeibeik.

Ho laran-ksolok mak ha’u simu mós informasaun  katak ita-nia parseiru dezenvolvimentu balun, husi rai laran no rai liur, foti inisiativa  hala’o programa di’ak tebetebes iha área agrikultura. “Avansa Agrikultura”, purezemplu, projetu  finansiadu husi Amérika,  hahú iha 2015 no sei ramata iha tinan 2021.

Husi Projetu ne’e, ita-nia agrikultor sira aprende liután  oinsá hasa’e  produsaun, produtividade no kualidade ba sira-nia produtu  no sai husi mentalidade subsisténsia ba mentalidade  merkadu nian.  Projetu ne’e hala’o en-parseria ho  Ministériu oioin Timor-Leste nian:  Agrikultura no Peskas, Komérsiu no Indústria, Edukasaun no Saúde.

Ha’u hakarak apela ba Governu atu haree oinsá insentiva liután produtor  nasionál kiik sira atu hasa’e liután sira-nia produtividade atu nune’e ita bele hamenus importasaun aihan hosi rai liur. Ita labele haluha katak importasaun hosi rai liur hanesan osan sai hosi Tasi Mane ba mout iha Tasi Feto!

Maluk sira!

Iha tinan 2005, ita harii Fundu Minarai. Ita hotu-hotu  hatene katak reseitas hosi minarai mak kontribui liu ba kreximentu ekonómiku Timor-Leste nian. Ita-nia Orsamentu Jerál Estadu mós barak liu finansia hosi Fundu Minarai. Ita haluha tiha prinsípiu ida durante funu mak “kuandu aihan iha, la bele han boot liu para kabun la bele boot.” Ne’e katak ita prejisa matenek uza osan-sira iha Fundu Minarai. Wainhira la hatene uza, maka osan hetok boot, gasta mós barak liu.

Tanba ita-nia ekonomia dependente maka’as ba Fundu Minarai,  Prezidente Repúblika apela ba Governu iha faze ezekusaun no preparasaun Orsamentu Jerál Estadu atu aselera reformas sira ne’ebé bele hadi’ak no impulsiona ekonomia nia kompetitividade no dudu potensiál kreximentu no kapasidade resposta ekonomia nian bainhira hasoru problema boot. Timor-Leste ladauk iha dalan atu dudu potensiál kreximentu tanba ita depende de’it ba osan hosi Fundu Minarai. Tamba ne’e, mak Prezidente Repúblika husu atu Governu konsentra reformas iha área tolu tuir mai: 1) Ambiente jerál negósiu nian hodi fasilita investimentu no atividade komersiál iha ita-nia nasaun; 2) Merkadu traballu; 3) Tributasaun ka impostu.

Dezenvolvimentu ekonómiku presija kuadru legal ida ke favorável ba realizasaun negósius no seguransa iha tranzasoes komersiais, internas no internasionais. Ba ida ne’e, urjente país ida ne’e halo dunik reforma lejislativa, judisiária no institusionál ida ho substânsia no klean.

Maun-bin-alin sira!

Ohin loron umanidade, katak  ita ema,  hasoru dezafiu barak no oioin  iha mundu ida ne’e. Dezafiu ida mak mudança klimátika. Asuntu ida ne’e sai ona preokupasaun boot ida iha mundu tomak. Amu Papa Francisco, iha tinan 2015, bolu tiha ona atensaun katak ita ema  presiza proteje ita-nia planeta, nu’udar  umanidade tomak nia uma-boot.

Felizmente, hahú ona movimentu alerta boot ida, iha mundu, atu haree lalais oinsá hamenus mudansa klimátika.  Iha 7 Maiu liubá, Parlamentu Reinu Unidu nian hasai rezolusaun dahuluk, iha mundu, katak mudansa klimátika tama ona iha situasaun emerjénsia. Parlamentu Irlanda tuir kedas. Rai sira seluk book-an daudaun ona, hanesan Austrália, Alemanha no seluk tan. Ita hein katak Parlamentu no Governu Timor-Leste bele assosia ho movimentu internasionál ida ne’e, iha tempu badak.

Timor-Leste hahú hatán ona ba problema mudansa klimátika ho atividade kuda ai. Iha ona inisiativa oioin husi entidade no grupu  nasionál no internasionál. Iha fulan Janeiru tinan ida ne’e nian, Prezidente-Repúblika  lansa kampaña nasionál hanaran Sidadaun ida, ai-oan ida. Kampaña ida ne’e eduka daudaun ita-nia ema atu iha sidadania responsável. Ita presiza haree oinsá koordena di’ak liután inisiativa sira ne’e hotu.

Maluk sira!

Ba loron restaurasaun independénsia Timor-Leste, haree ba artigu 85° Konstituisaun, Kódigu Penal no lei N.o   5/2016, 25 maiu, mak  Prezidente-Repúblika ezerse kompeténsia atu fó perdaun ba prizioneiru sira. Ida ne’e signifika Prezidente Repúblika bele hakotu ka hamenus kastigu  ne’ebé Tribunal fó ona ba prizioneiru ne’ebé kumpre hela. Maibé, molok fó perdaun, Prezidente Repúblika  tenke tetu situasaun kondenadu nian, tuir lei haruka.

Lei dehan katak prizioneiru tenke kumpre tiha ona, pelu menus, sentensa tersu ida, iha komportamentu di’ak no bele integra fali  iha sosiedade, sei la sai ameasa ba sosiedade no sosiedade sei simu ho di’ak. Maibé, kritériu sira ne’e la aplika ba krime organizadu no grave tebetebes hanesan terrorismu, oho ema, tráfiku ba droga, ba ema no ba armamentu, korrupsaun no brankeamentu kapitais. Maibé, bainhira iha razaun umanitária ne’ebé autoridade sira komprova ona, Prezidente Repúblika bele fó perdaun, tuir  ninia konxiénsia   rasik kona-ba saída mak justu ba kazu ida-idak.

Tuir lei, pedidu ida-idak tenke tuir prosedimentu atu komprova situasaun ida ne’ebé  bele fó dalan atu hetan desizaun husi Prezidente-Repúblika. Prosedimentu ida ne’e tama ba responsabilidade Ministru Justisa, Prokuradoria Jerál Repúblika no Tribunal kompetente. Ministru Justisa,  nu’udar  Reprezentante hosi Governu,  mak tenke aprezenta prosesu tomak kona-bá pedidu indultu  ba Prezidente-Repúblika.

Prezidénsia Repúblika simu pedidu indultu neen nulu resin rua. Ba oin Prezidente-Repúblika husu ba entidade relevante sira atu tais uluk pedidu indultu tuir lei, no hato’o prosesu ida-idak, ho tempu natón. Hanesan ne ‘e, Ministériu Justisa, koopera di’ak liután ho servisus jurídikus Prezidénsia Repúblika nian,  atu fó dadus loloos no, Prezidente-Repúblika rasik mak foti desizaun.

Prezidente-Repúblika sira uluk bele fó indultu no komutasaun ba penas laiha limite. Maibe, Prezidente-Repúblika ida agora (ha’u rasik) hetan limitasaun boot tebtebes hosi Lei N.o 5/2016 ho nune’e Prezidente-Repúblika labele fó indultu ka komutasaun penas tuir nia hakarak rasik! Tamba ne’e, iha tempu badak Prezidente-Repúblika sei sujere ba Parlamentu Nasionál atu halo alterasaun ba Lei N.o 5/2016 atu bele fó dalan ba Prezidente-Repúblika uza nia kompetênsias rasik iha artigu 85o Konstituisaun RDTL nian.

Maluk sira!

Biar la’ós fásil, ita konsege hatuir duni ita-nia Konstituisaun. Órgaun Estadu hotu-hotu funsiona, ita hamosu instituisaun públika oioin, ita hala’o lei no regulamentu oioin ona, ita forma ona ita-nia ema barak,  iha área oioin. Ita hametin dadaun ita-nia soberania! Nu’udar prova hosi ita-nia soberania rasik, ita halo dunik negosiasoes no asina ona Akordu ho Austrália kona-bá fronteira tasi ho Austrália. Ida ne’e pasu importante tebes atu kompleta definisaun nasaun ne’e nia fronteiras. Timor-Leste no Indonézia mós hahú ko’alia ona kona-bá fronteira-rai. Ita iha relasaun di’ak ho país viziñu sira no ita iha akordu kooperasaun  ho nasaun barak no organizasaun naun-governamental oioin.

Iha tinan ida ne’e,  ita hanoin hikas aniversáriu referendum  ba dala  rua nulu ba ita-nia auto-determinasaun.  Ita hetan dame bainhira komunidade internasional rona ita-nia hakarak no ita-nia aspirasaun.

Iha Povu ida ne’ebé sei luta hela atu hetan oportunidade hanesan ita. Sira hahú sira-nia luta libertasaun iha tempu hanesan ita. Ha’u konvida maluk sira hotu atu  hanoin hikas ita-nia maun-bin-alin sira, iha Sahara Osidentál. Iha tinan 1991, liuhusi Rezolusaun 690, Nasoens Unidas aprova períodu transizaun ida atu halo preparasaun ba referendum,  atu Povu saharui hili rasik independénsia ka integrasaun ba Marrocos. Misaun Nasoens Unidas iha ne’ebá maibé seidauk implementa Resolusaun husi komunidade internasional ne’ e to’o ohinloron. Bainhira mundu  rona sira-nia halerik, ita hotu loke dalan ba dame iha fatin ne’ebá.

Povu doben Timor-Leste!

Molok ramata ha’u-nia lia menon,  ha’u hakarak fó-hanoin liafuan balun husi poezia murak ne’ebé fó-sai apelu ba unidade, husi poeta mártir, Francisco Borja da Costa:

Kadalak suli mutuk fila ué inan

Ué inan tan malu sá ben ta’han!

Kdadalak suli mutuk fila ué inan,

Timoroan hamutuk tane ita rain.

Tebes duni! Bainhira ita hamutuk, ho prinsípius justus, la iha sátan ida bele sátan ita atu lao ba oin.

Viva restaurasaun independénsia Timor-Leste!

Viva Unidade Nasional!

Viva Povu Timor-Leste!

Hamutuk iha hakotuk kiak no mukit.

Obrigadu.

HAKEREK NO HATÁN

Please enter your comment!
Please enter your name here