Xefe Suku Loidahar, Domingos dos Santos

LOIDAHAR, 20 maiu 2019 (TATOLI)—Xefe Suku Loidahar, Postu Administrativu Liquiçá Vila, Munisípiu Liquiçá, Domingos dos Santos, hateten atu hamein pás no estabilidade iha ida-idak nia suku, komponente hotu-hotu tenke fó kontribuisaun.

“Ko’alia kona-ba pás no estabilidade ne’e komponente hou-hotu tenke kontribui, tantu lideransa komunitária, juventude, komunidade tomak, Oifisiál Polísia Suku (OPS) sira no autoridade seguransa sira. Ita mós tenke organiza komunidade hodi fó seguransa ba sira-nia aan rasik, nune’e estabilidade bele mosu,” Domingos ba Agência TATOLI, hafoin selebra loron Restaurasaun Independénsia iha sede Suku Loidahar, segunda ne’e.

Xefe Suku afirma, ema hotu-hotu asegura estabilidade tuir dalan ne’ebé loos, tanba estabilidade no pás ne’e mak garante prosesu dezenvolvimentu bele la’o lais liu.

Nia subliña, iha nasaun ne’ebé de’it prosesu dezenvolvimentu atu la’o di’ak, pás no estabilidade ne’e tenke metin, liliu pás ne’e mós tenke hahú hosi família.

Kona-ba selebrasaun 20 maiu ba dala-17, tuir Domingos, ema hotu tenke halo reflesaun ba ida-idak nia aan kona-ba impaktu hosi pás no estabilidade ba prosesu dezenvolvimentu.

Iha fatin hanesan,  Xefe Suku Assumano, Bernardino Martins, hateten pás no estabilidade sai hanesan fatór importante ba iha prosesu dezenvolvimentu.

“Ema hotu tenke kontribui ba ida ne’e. Tempu to’o ona husik ódiu malu no vingansa malu. Ita tenke hanoin ida de’it ba dezenvolvimentu rai ida ne’e,” nia katak.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here