Foto dokumentasaun mídia PNTL.

MANATUTU, 20 maiu 2019 (TATOLI) – Komandu Polísia Nasionál Timór-Leste (PNTL), Munisípiu Manatutu durante ne’e sempre halo kooperasaun di’ak ho komunidade liuhosi Konsellu Polisiamentu Komunitáriu (KPK) hodi asegura dame no estabilidade.

Komandante Polísia Munisípiu Manatutu, Superintendente Inácio dos Santos Saldanha, hateten Komandu iha nia planu loroloron nian, empeña papél liuhosi sistema ne’ebé komandu rasik kria hanesan patrullamentu loroloron hosi tránzitu rodaviáriu sira no mós envolvimentu hosi komunidade hotu-hotu hodi kontribui pás no estabilidade.

“Polísia no komunidade, ami halo kolaborasaun di’ak tebes, tantu autoridade lokál, parte igreja hodi hametin seguransa. Ba oin liuhosi koordenasaun ne’ebé ami kria ona, mantein seguransa tuir papél seguransa nian ne’ebé atribui nanis ona mai ami”, hateten Inácio dos Santos Saldanha ba TATOLI hafoin partisipa serimónia isar bandeira ba loron restaurasaun independénsia ba dala-17 iha Manatutu, segunda (20/5/2019).

Lideransa másimu seguransa munisípiu Manatutu ne’e afirma hosi janeiru 2019, komandu polísia Manatutu rejista kazu besik 10, maioria kazu simples.

Atu asegura liu tan estabilidade iha Manatutu, Inácio dos Santos Saldanha dehan: “Ami iha programa ida hanaran Polisiamentu Komunitáriu ne’ebé sempre halo enkontru ho Konsellu Polísia Komunitária (KPK) ho objetivu hakbesik papél polísia nian ba komunidade, nune’e servisu hamutuk hodi identifika problema prioridade ne’ebé sempre mosu iha komunidade nia leet, para oinsá problema ne’ebé relasaun ho krime bele enkamiña mai polísia no KPK sira bele rezolve”.

Polísia ne’ebé destakadu iha komandu munisípiu Manatutu hamutuk 120. Hosi númeru ne’e koloka ba postu administrativu neen.

Tuir Inácio númeru membru la sufisiente, tanba ho área jurídiku luan tebes, maibé ne’e maka sira nia kna’ar tenke hala’o, la haree ba rekursu no la haree ba ekipamentu, difikuldade sira ne’e hotu sei la hamate espíritu vontade servisu sira nian hodi serbí nasaun no povu.

Daudaun ne’e seguransa iha Manatutu la’o normál.

Jornalista       : Antónia Gusmão

Editora           : Rita Almeida

HAKEREK NO HATÁN

Please enter your comment!
Please enter your name here