Ofisiais PNTL wainhira partisipa iha seremonia komemorasaun loron restaurasaun independensia, 20 Maiu 2019, iha Palásiu Prezidente Bairru-Pite, Dili. Imajen/Antonio Goncalves

CAILACO, 20 maiu 2019 (TATOLI)-Komandante Polisia Nasionál Timor-Leste  Munisípiu Bobonaro, Superintendente Xefe, Armando Monteiro afirma katak, komandu munisipiu kontinua firme atu kombate krime organizadu ne’ebé oras nee lao iha fronteira liuliu kona-ba atividade komersiu ilegál.

Komandante PNTL Munisípiu Bobonaro, Superintendente Xefe Polisia, Armando Monteiro. Imajen/Agapito dos Santos

Atu kombate krime organizadu, tuir Armando Monteiro, presiza hetan kolaborasaun no koordenasaun servisu hosi komunidade rasik, autoridade lokál, servisu migrasaun, alfándega, FALINTIL-FDTL no entidade relevante seluk hodi kontribui liuhosi informasaun ba PNTL hodi deteta krime ne’ebé lao hela iha liña fronteira.

Bainhira komandu munisipiu sei enfrenta problema menus rekursu umanu no transporte, Armando Monteiro hatutan, susar atu kontrola hotu area fronteira terrestre iha area jurídiku Munisipiu Bobonaro nian.

“Iha Bobonaro, ita la’ós ko’alia de’it kona-ba fronteira terrestre hosi Loloteo too Batugade, maibé iha mós fronteira marítima hosi Batugade fronteira ho Liquiçá,” esplika Armando Monteiro, horiseik, ba Ajénsia Tatoli, iha Cailaco , Bobonaro.

Komandu PNTL Bobonaro iha pesoál polisia hamutuk 160 resin, na’in 50 hanesan ofisial polisiamentu suku ne’ebé koloka iha suku 50, na’in haat nulu servisu iha eskuadra hitu ne’ebé estabelese no restu konsentra iha komandu munisipál nu’udar pesoál polisia investigativu, tránzitu no polisia rezerva.

Mezmu enfrenta hela problema hirak nee, maibé komandu kontinua iha orientasaun klaru hodi kombate negósiu ilegál tanba nee durante ninia mandatu tinan haat konsege prende importasaun karreta, motor, kombustivel ilegál hamutuk kazu 140.

Ba kombustivel prende mina-rai hamutuk tonelada 400 resin hodi entrega ba ministériu públiku. Alende nee, foin lalais, prende importasaun roupa uzadu ka obralan karón atus ida resin ne’ebé tenta ultra pasa fronteira hodi lori ba Atambua- Indonézia.

“Kazu sira nee la’ós sasán hosi Indonézia maka tama de’it mai Timor, maibé sasán hosi timor tanba ita nia foos, masin midar, bebida delos mós tama ba Indonézia,” esplika Armando Monteiro.

Polisia munisípiu iha estratéjia tolu atu halo prevensaun no kombate krime organizadu liuliu komérsiu ilegál.

Estratéjia da-uluk maka prevensaun, komandu koloka OPS 50 ba suku sira hodi servisu hamutuk ho komunidade, autoridade lokál hodi prevene krime. Da ruak, maka envolvimentu entidade hot-hotu liuliu komunidade maka tenke sai na’in ba estabilidade.

Estratéjia ikus, maka kria koordenasaun no komunikasaun hodi estabelese servisu integradu kompostu hosi Alfándega, Migrasaun, Quarantena, Unidade Patrullamentu Fronteira, FALINTIL-FDTL, hodi hala’o operasaun konjunta no investigasaun ba atividade ilegál.

Jornalista   : Agapito dos Santos

Editór         : Francisco Simões

HAKEREK NO HATÁN

Please enter your comment!
Please enter your name here