Prezidente Repúblika, Francisco Guterres Lú Olo, kuda ai-oan iha Larigutu, Sábadu (27/4/2019). Imajen/Xisto Freitas

DILI, 20 maiu 2019 (TATOLI)-Xefe Estadu, Francisco Guterres Lú Olo, husu Parlamentu Nasionál (PN) no Governu Timor-Leste (TL) katak presiza asosia ba movimentu internasionál ne’ebé halo rezolusaun kona-ba oinsá atu hamenus mudansa klimátika.

Nia haktuir, iha 7 maiu liu-ba, Parlamentu Reinu Unidu nian hasai rezolusaun dahuluk iha mundu katak mudansa klimátika tama ona iha situasaun emerjénsia.

Lú Olo hatutan, Parlamentu Irlanda mós hasai rezolusaun ba asuntu ne’e (mudansa klimátika) no rai sira seluk mós book aan daudaun ona hanesan Austrália no Alemaña.

Lú Olo informa, mudansa klimátika sai hanesan dezafiu ba mundu, tanba ne’e presiza proteje planeta.

“Asuntu ida ne’e sai ona preokupasaun boot ida iha mundu tomak. Amu Papa Francisco, iha tinan 2015, bolu tiha ona atensaun katak ita ema  presiza proteje ita-nia planeta, nu’udar  umanidade tomak nia uma-boot,” Prezidente Lú Olo mensiona asuntu ne’e liuhusi nia diskursu iha komemorasaun aniversáriu Restaurasaun Independénsia Timor-Leste ba dala 17 ne’ebé hala’o iha Palásiu Prezidente Nicolau Lobato, Bairru Pité, Dili, segunda ne’e.

Maski nune’e, Lú Olo konsidera katak Timor-Leste hahú hatán ona ba problema mudansa klimátika ho atividade kuda ai liuhusi inisiativa oioin husi entidade no grupu  nasionál no internasionál.

“Iha fulan janeiru tinan ida ne’e nian, Prezidente Repúblika lansa kampaña nasionál hanaran ‘Sidadaun ida, ai-oan ida’. Kampaña ida ne’e eduka daudaun ita-nia ema atu iha sidadania responsável. Ita presiza haree oinsá koordena di’ak liu-tan inisiativa sira ne’e hotu,” eis rezisténsia ne’e haktuir.

Lee mós notísia: http://www.tatoli.tl/2019/04/prezidente-republika-kuda-ai-oan-3-000-iha-larigutu/

http://www.tatoli.tl/2019/04/kuda-ai-oan-sei-sai-hanesan-laboratoriu-ekolojia/

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here