Veteranu José Agustinho Sequeira Somocho. Imajen/Antonio Goncalves

DILI, 20 maiu 2019 (TATOLI)– Veteranu José Agustinho Sequeira Somocho, husu ba governu liuhosi Sekretáriu Estadu asuntu Veteranu (SEAV) atu forma ekipa hodi buka akompaña moris veteranu sira nian iha sosiedade.

Iha ámbitu serimónia Restaurasaun Independénsia Timor-Leste ba dala XVII (20 maiu 2002-20 maiu 2019), ne’ebé hala’o iha Palásiu Prezidensiál Bairru Pite, Dili, Segunda (20/5/2019), Somocho agradese ba Prezidente Repúblika, Francisco Guterres “Lu-Olo” ne’ebé fó kondekorasaun no husu ba governu liuhosi SEAV atu buka hatene veteranu sira organiza sira nia vida ho nia família ka la’e, tanba dalaruma balun moris at liu no balun moris di’ak liu mós seidauk hatene.

“Ha’u ko’alia beibeik asuntu ne’e, maibé la iha ekipa ida maka atu halo fiskalizasaun ka buka akompaña pensaun ne’ebé veteranu sira simu to’o ohin loron. Tanba ne’e, Sekretáriu Estadu asuntu Veteranu halo fali polítika adekuadu hodi haree realidade moris veteranu sira nian ohin loron sira hasoru,” Somocho hatete ba Ajénsia TATOLI.

Uluk kedan Somocho propoin ba Prezidente Repúblika, Taur Matan Ruak, atuál Primeiru-Ministru atu harii fundu veteranu sira nian, maibé to’o ohin loron seidauk iha.

Somocho informa katak SEAV atuál ko’alia ona ho nia no  nia mós fó hanoin atu harii fundu veteranu sira nian atu bele ajuda veteranu sira nia oan hodi eskola no seluk tan.

Tuir Somocho katak, ema barak bele hanoin dehan pensaun ne’ebé veteranu sira simu ho valór US$200 resin bele rezolve ona buat hotu, hanesan problema ekonomia, saúde no edukasaun.

“Hau ne’ebé simu pensaun ho totál US$500 resin, ha’u sente sei iha difikuldade boot. Sa tan, maluk veteranu seluk ne’ebé simu de’it pensaun US$200 resin/fulan-fulan,” hateten Somocho.

“Ha’u triste tebes kuandu ita dehan veteranu sira nia problema ne’e rezolve ho pensaun, maibé iha dalan alternativu seluk ne’ebé governu sei uza hodi hatán,” Somocho hatete ho triste.

Númeru veteranu sa’e, Somocho dehan, nia mós hakfodak veteranu ne’ebé ho númeru aumenta ohin loron. Veteranu sira ne’e daudaun simu ona pensaun hamutuk ema na’in 27.000, enkuantu 2009 nian komisaun seidauk halo verifikasaun, kuandu halo hotu signifika númeru veteranu sira bele sa’e ba 50.000.

Jornalista   : Zezito Silva

Editór         : Francisco Simões

HAKEREK NO HATÁN

Please enter your comment!
Please enter your name here