LAUTÉM, 20 maiu 2019 (TATOLI)—Komunidade Suku Muapitine, Postu Administrativu Lospalos, Munisípiu Lautém, preokupa ba estrada tanba estrada nia kondisaun ladi’ak difikulta labarik sira asesu ba edukasaun.

Tuir Xefe Suku Maupitine, Lívio Mendes katak estrada aat husi Lospalos Vila ba Muapitine ho distánsia kilómetru 23 difikulta tebes transporte públiku atu asesu ba ne’ebá.

Aleinde ida ne’e, estudante ho tinan 12 to’o 14 ne’ebé ramata ona estudu primária tenke la’o ain lor-loron ba eskola iha eskola ensiñu Pre-Sekundáriu Lospalos Vila.

Sekretáriu Estadu Komunikasaun Sosiál (SEKOMS), Marício Juvinal Akara, hala’o diálogu ho povu Suku Maupitine. Imajen Tatoli/Eugénio Pereira

“Ami-nia oan sira ramata ona eskola tenke ba eskola iha ensiñu Pre-Sekundária iha Lospalos. Lor-loron sira la’o kolen to’o hamlaha fila mai sira lakohi ba tan eskola ona tanba dook liu,” dehan Lívio durante hala’o enkontru ho Sekretáriu Estadu Komunikasaun Sosiál (SEKOMS), Merício Juvinal Akara iha sede Suku Muapitine, segunda ne’e.

Lívio informa, labarik mane idade 12-14 maioria lakohi eskola ba tanba la’o dook no agora hela iha uma ajuda família halo de’it to’os, hein karau no kuda.  Nune’e mós ba labarik feto sira, tanba sira badinas tein hahán, entaun feto uituan de’it maka ba hela ho família iha Lospalos vila hodi aguenta eskola.

Iha Muapitine, nia haktuir, foin iha ensiñu báziku Malahara no ensinu báziku Muapitine. Tanba ne’e, sira husu Ministériu Edukasaun atu harii tan eskola ensinu pre-sekundária iha Muapitine.

Entretantu, Xefe Suku ne’e mós husu ba governu atu halo jestaun ba lafaek, tanba iha Iralalaro bainhira bee nakonu lafaek sai arbiru de’it ba rai maran.

Iha fatin hanesan, Adjuntu Administradór Munisípiu Lautém, Júlio M. de Jesus Canto dehan iha Suku Muapitine governu koloka ona médiku no parteira sira, maibé tempu udan boot médiku sira la ba tanba estrada aat.

Responde ba preokupasaun ne’e, Sekretáriu Estadu Komnunikasaun Sosiál, Merício Akara promete sei fó hatene ba liña ministériu atu bele tau iha ajenda hodi rezolve.

“Ha’u promete katak imi-nia preokupasaun sira ne’e ami sei hato’o rekomendasaun ba kada liña ministériu atu tau atensaun,” nia afirma.

Akara hatutan, problema sira ne’ebé akontese governu labele rezolve dala ida de’it, tanba orsamentu Estadu la sufisiente atu investe ba setór ida de’it. Tanba ne’e, kada tinan Estadu tenke diskuti orsamentu hodi investe neneik iha setór ida- idak.

Jornalista: Eugénio Pereira

Editór Xisto Freitas

HAKEREK NO HATÁN

Please enter your comment!
Please enter your name here