Vítor dos Santos, nu’udar veteranu Ermera oan. Imajen/Maria Auxiliadora

ERMERA, 20 maiu 2019 (TATOLI)-Dezenvolvimentu Timor-Leste nian iha tinan 17 nia laran, hafoin restaurasaun ukun rasik an, la’o duni, maibé neineik.

“Dezenvolvimentu la’o duni, maibé neineik. Lahatene tanba prosesu mak la’o nune’e. Hanesan ita haree ba kotuk, durante tinan rua paradu (impase polítika) no ita lakon boot,” hatete Vítor dos Santos, ohin, bainhira partisipa iha komemorasaun loron restaurasaun independénsia ba dala XVII, 20 maiu 2002-20 maiu 2019, iha kampu eis Pemda-Gleno.

Eis Administradór Autoridade Munisipál Ermera ne’e dehan, bainhira halo komparasaun ho tinan ne’ebé Indonézia ukun iha tinan 24 halo buat barak.

“Ita tinan 17 restaurasaun independénsia, ita seidauk halo buat balun ne’ebé mak importante. Se iha nasionál mak hanoin katak dezenvolvimentu ne’e tenke la’o lalais maka osan barak ne’ebé ita hasai hosi mina-rai, ita tenke haree ba ida ne’e tanba ita-nia povu ne’ebé iha susar no terus nia laran presiza liman tomak hosi Governu nian atu nune’e fó apoiu para prosesu ne’e la’o no sira bele moris,” hatete Vitor dos Santos.

Ho impase polítika  ne’ebé la’o durante tinan rua nia laran (2017-2018), prejudika prosesu dezenvolvimentu, tanba ne’e, nia espera, iha tinan ne’e ba oin situasaun polítika bele normaliza fila-fali.

Ermera oan ne’e dehan, liga ba ekonomia nian ne’e mós la’o neineik tanba infraestrutura ne’ebé la suporta ba lala’ok ekonomia nasaun nian.

“Infraestrutura hahú kedan hosi baze tanba ekonomia hahú baze mak sa’e mai. Se baze mak infraestrutura to’o iha ne’ebá ladi’ak entaun dezenvolvimentu ekonomia lala’o ho di’ak,” hateten Vitor dos Santos.

Veteranu ne’e ko’alia sobre unidade nasionál ne’e metin tanba Timor-Leste liu prosesu boot ida ne’ebé halo eleisaun dala-rua tuituir malu ne’ebé mak povu tuur hakmatek no hotu-hotu prontu halo eleisaun ne’e.

“Ne’ebé povu komesa hatene katak ita-nia unidade ne’e importante no to’o agora ita laiha problema hanesan uluk 2006 nian”.

Iha fatin hanesan veteranu João de Jesus Soares Varela, hatutan dezenvolvimentu mezmu la’o neineik, maibé sei kontinua bá nafatin.

“Ita mós sei buka oinsá bele aselera ita-nia dezenvolvimentu mezmu ita iha problema oioin, maibé ita fiar katak bainhira timoroan hamutuk, dezenvolvimentu sei la’o di’ak”.

Liga ba tema Unidade Nasionál boa signifikadu ba veteranu ne’e katak timoroan bele iha diferensa oioin, unidade tenke metin atu nune’e bele halo dezenvolvimentu.

“Mezmu ita iha ideia oioin, maibé ami-nia haree ita-nia unidade sei metin. Diferensa ideia iha demokrasia laiha problema,” hatete João de Jesus Soares Varela.

Nia realsa, sobre dezenvolvimentu ne’ebé la’o-para tanba sei iha diferensa ideia uitoan ne’ebé difikulta prosesu dezenvolvimentu.

Jornalista   : Maria Auxiliadora

Editór         : Francisco Simões

HAKEREK NO HATÁN

Please enter your comment!
Please enter your name here