Veterano Alin Laek.Imajen/Antonio Goncalves

DILI, 20 maiu 2019 (TATOLI)-Veteranu no Kombatente Libertasaun Nasionál, Custodio Belo (Alin Laek), iha ámbitu komemorasaun aniversáriu loron restaurasaun independénsia ba dala-17 ho tema “Hametin Unidade, Garantia Estabilidade Nasionál” ne’e hateten, dezenvolvimentu nasaun ida nian atu la’o di’ak liu primeiru liu mak tenke iha pás no estabilidade.

“Ha’u sente prosesu dezenvolvimentu nasaun ida ne’e la’o di’ak, tanba lider sira ne’ebé ukun rai ida ne’e, mai husi funu na’in sira, nune’e sira mai ho objetivu ida katak atu liberta povu husi ki’ak no mukit,” hateten Veteranu Custodio Belo ba TATOLI, iha Palásiu Prezidente Nicolau Lobato, Bairru Pité, Dili, ohin.

“Tanba ne’e garantia estabilidade importante, kuandu estabilidade iha ona dezenvolvimentu la’o di’ak,” reforsa tan Alin Laek.

Veteranu ne’e friza tan katak atu dezenvolvimentu rai laran ne’e la’o ho di’ak ita tenke tau mós fiar ba seguransa sira husi nasaun ida ne’e ninian ne’ebé maka sai hanesan lutu ba nasaun. “Ita tenke fó nafatin fiar ba seguransa liu-liu FDTL no PNTL hanesan aparellu estadu nian atu kumpre sira-nia obrigasaun defende povu no nasaun ida ne’e. Ida ne’e maka sira-nia papel importante”.

Veteranu ne’e mós hateten, veteranu sira uluk luta no fó kontribuisaun ba Timor-Leste hodi bele hetan independénsia tanba ne’e, iha biban entrevista ho TATOLI, nia husu ba joven atu banati dalan ne’ebé sira hatudu ona.

“Ha’u apela ba juventude; joven sira iha ona obrigasaun atu hatutan ami-nia obra para oinsá maka atu halo dezenvolvimentu ne’e sai di’ak liu. Funu ami hala’o ona agora dezenvolvimentu ha’u entrega ba joven sira,” veteranu ne’e husu.

Iha biban hanesan, Veteranu Custodio Belo (Alin Laek) afirma, nu’udar veteranu, iha independénsia ida ne’e, nia sei fó kontribuisaun liuhusi fó hanoin ba juventude sira tanba konsidera katak juventude sai hanesan materiál forte hodi dezenvolve nasaun.

Nia mós dehan, ita-nia estadu halo kooperasaun barak ho instituisaun internasionál sira para bele fó serbisu ba juventude timoroan sira no promove joven sira liuhusi aumenta koñesimentu kona-ba oinsá serbí estadu no nasaun.

Tanba ne’e, veteranu ne’e husu dala ida tan ba joven sira atu kontinua kria pás ho bele hala’o dezenvolvimentu. Katak, tempu ona para joven sira hakmatek, tempu ona para joven sira dedika aan ba estudu tanba estudu mak hanesan baze ba dezenvolvimentu nasaun, sein estudu labele dezenvolve nasaun ida ho di’ak.

“Nune’e, joven sira tenke hakmatek no iha pás hodi hala’o dezenvolvimentu tanba tempu to’o ona para hakotu terus no mate hodi goza independénsia nia produtu/rezultadu,” Veteranu Custodio Belo (Alin Laek) fó hanoin.

Lee mós notísia: http://www.tatoli.tl/2019/05/pr-ho-pas-mak-ita-bele-halao-dezenvolvimentu/?fbclid=IwAR1OaSZuaANux8mgo8Y8J-WeDqhWsaMXBvb7qLYpp-sJfNExu-yZuaXFWus

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here