Prezidente Autoridade Munisípiu Baucau, António Augusto Guterres

BAUCAU, 20 maiu 2019 (TATOLI)—Autoridade Munisipál Baucau kondena maka’as hahalok asasinatu (violénsia) ne’ebé rezulta ema ida mate, na’in seluk hetan kanek no sunu sasán balun iha Vila Nova Baucau, Munisípiu Baucau, semana kotuk.

“Ha’u kondena hahalok oho malu ne’ebé akontese iha loron rua liu-ba, loron ne’ebé besik komemorasaun loron Restaurasaun Independénsia Timor-Leste ba dala 17. Loloos, akontesimentu ne’e la pudia akontese iha vila maibé divia akontese iha  área rurál ne’ebé seidauk intende didi’ak kona-ba regra emepeñamentu ne’ebé la’o,” dehan Prezidente Autoridade Munisipál Baucau, António Augusto Guterres, ba jornalista TATOLI liuhusi enrtevista ekskluziva hafoin ramata isar bandeira iha  nia knar fatin, Baucau, segunda horsehik.

Nia hatutan, entidade sira ne’ebé hela iha vila asesu ba komunikasaun sosiál no edukasaun sívika ne’ebé di’ak tebe-tebes, maibé fila ba konsiénsia ema ida-idak nian katak problema ne’ebé akontese la tenke rezolve ho konflitu maibé buka moris atu moris iha armonia no dame nia laran hodi sustenta no dezenvolve família.

“Ita ko’alia kona-ba akontesimentu ne’e, ba ha’u nu’udar autoridade ha’u kondena. Maibé akontese tiha ona. Segurans akontroladu. Maibé, realidade horisehik ha’u rasik ba simu matebian nia isin-mate iha Triloka, akompña to’o iha ninia uma. Ha’u akompaña to’o oras ida iha ne’ebá, ha’u-nia observasaun en-jerál la’o di’ak,” António tenik.

Nu’udar autoridade, nia husu ba família atu koopera ho seguransa, koopera ho autoridade sivíl para rona malu no intende malu. Ida ne’ebé lakon ne’e, lakon vida ona. Maibé, asegura hela ninia prosesu la’o hela para eduka ema seluk. Katak, hahalok sira ne’ebé rezulta ema mate, ne’e ninia kauza ne’e tenke buka, ninia aktu ne’e tenke haree didi’ak, para sai fali reflesaun ida ba sosiedade komun. La pudia tenke rezolve problema ne’e úniku dalan maka violénsia.

Tanba ne’e, António fó korajen ba Baucau oan sira tenke unidu, tenke buka malu, tenke kria amizade, tenke kria unidade no fó korajen ba malu atu hatudu Baucau nia identidade kulturál. Tanba, identidade Baucau nian maka buka lia-na’in sira atu rezolve problema la’ós oho malu maka dalan úniku hodi fó solusaun ba problema ida.

“Ha’u apela ba komunidade tomak. Buat ne’ebé akontese iha loron hirak liu-ba ne’e la rezulta ba situasaun e-jerál. Tanba saida? Interese Estadu metin hela tanba iha kooperasaun ho veteranu, partidu polítiku no sosiedade tomak metin no metin. Mai ita hakribi violénsia maibé hakarak hamutuk atu hadi’a ne’e tenke barani hakat ba bareira ne’e. La’ós de’it ema ida ka rua estraga malu ka oho malu sai bareira ida ba ema tomak para atu labele asesu ba movimentasaun,” nia apela.

Relasiona ba kazu oho malu ne’e, Komandante Polísia Munisípiu Baucau, Superintendente Hermenegildo Gonçalves da Cruz, rejeita fó informasaun ba jornalista tanba prosesu investigasaun ba autór-sira sei la’o hela. Tanba ne’e, bainhira investigasaun ramata maka nia fó sai rezultadu ba públiku.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here