Sekretáriu Administrasaun Munisípiu Liquiçá, Renato Nunes Serrão

LOIDAHAR, 20 maiu 2019 (TATOLI)—Atu asegura ekonomia ekonomia inkluziva no sustentálve setór públiku no setór privadu tenke forte.

“Atu asegura ekonomia inkluziva no sustentável  setór públiku ne’e ita tenke fó atensaun maka’as ba sira. Setór públiku ne’e pertense ba governu. Setór privadu mak bele fó kampu traballu no bele fó ekonomia di’ak ba povu. Tanba ne’e, setór rua ne’e tenke forte,” Sekretáriu Administrasaun Munisípiu Liquiçá, Renato Nunes Serrão, ba Agência TATOLI, hafoin partisipa iha selebrasaun loron Restaurasaun Independénsia Timor-Leste ba dala 17 iha sede Suku Loidahar, Postu Administrativu Liquiça Vila, Munisípiu Liquiçá, segunda ne’e.

Nia esplika, setór privadu sira presiza organiza-aan di’ak iha kompetisaun merkadu traballu, hodi aselera atividade ekonomia lokál no rai-laran no tenke iha kapasidade hodi investe iha setór produtivu sira seluk hanesan agrikultura, peska, turizmu no pekuária.

Nia fó ezemplu, iha Liquiçá, setór privadu sira tenke hahú dezenvolve ona setór turizmu, tanba Liquiçá poténsia iha tasi-ibun no mós presiza investe iha peska tanba Liquiça iha tasi ne’ebé luan tebes.

“Ita hakarak fortifika liu setór privadu ne’e para bele partisipa ativa iha prosesu dezenvolvimentu atu povu bele sente dezenvolvimentu sustentável ne’e,” Renato informa.

Sekretáriu ne’e mós subliña katak investimentu sira hosi rai-li’ur labele investe mesak de’it, maibé tenke kapasita kompañia lokál sira hodi partisipa iha kualkér projetu. “Ne’e para aban bainrua kompañia lokál sira mesak més bele hatene ona kaer investimentu mesak,” nia haklaken.

Jornalista: Evaristo Soares Martins

 Editór: Xisto Freitas

HAKEREK NO HATÁN

Please enter your comment!
Please enter your name here