Bispu Dioseze Baucau, Don Basílio do Nascimento. Foto Tatoli/Zezito Silva

BAUCAU, 19 maiu 2019 (TATOLI)—Bispu Dioseze Baucau, Don Basílio do Nascimento, hateten maske komemorasaun loron restaurasaun independénsia ba dala-17 (20 maiu 2002-20 maiu 2019) ne’e foti tema “Unidade Nasionál” maibé realidade hatudu katak unidade nasionál iha Timor-Leste ne’e mihis ona tanba laiha ona inimigu ne’ebé halo timoroan sira konsolida kapasidade maibé iha amigu boot ida naran “osan” ne’ebé sai fali inimigu boot.

Unidade Nasionál ne’ebé akontese iha tempu Indonézia ne’e metin tanba iha inimigu komun ida naran tropa Indonézia (okupasaun) ne’ebé halo timoaroan hotu-hotu haloot forsa hamriik kontra katak lakohi atu ema okupa nia rain. Ne’eduni kiik ka boot, beik ka  matenek, forsa iha ka forsa laiha, katuas sira ne’ebé la’o kulafru hela ne’e, uza sira-nia enerjia no kapasidade hodi dehan ita tenke dudu sai buatamak sira ne’e labele hela iha Timor (referendu 1999).

“Agora ukun rasik án, inimigu ida-ne’e sai tiha, ita laiha tan ona inimigu. Laiha inimigu ida ne’ebé mobiliza ita-nia forsa. Hotu-hotu dehan ita independente. Independente ona komu laiha objetivu ida ne’ebé ita hotu bele tuir fali atu moris di’ak. Maibé, moris di’ak ne’e, ema lahatudu. Laiha mobilizasaun sosiedade timoroan nian. Moris di’ak ne’e kritéria maka saida. Ema hotu-hotu iha uma oan ida. Iha bee no ahi-oan,” dehan Bispu Dioseze Baucau, Don Basílio do Nascimento, ba jornalista TATOLI liuhusi entrevista ekskluziva ne’ebé hala’o iha ninia rezidénsia, Uma-Lima Tirilolo, domingu (19/5/2019).

Nia hatutan, enkuantu sosiedade timoroan hotu-hotu laiha mínimu buat hirak ne’e, governu sira tuir mai ne’e tenke haka’as án uza osan ne’ebé iha ne’e ho didi’ak. Maibé komu inimigu ida ne’e laiha ona no la hetan, hotu-hotu ba buka fali amigu ida maka “osan” petróliu nian ne’e. Soké amigu ida ne’e, invezde sai amigu maibé sai inimigu boot ne’ebébele hamihis unidade nasionál.

“Razaun tanba ida-idak dehan ó haree ha’u no haree de’it ha’u. Ida-idak ba husu nia amigu, ida-idak ba fokit amigu ida ne’e nia fuuk, ida ba fokit amigu ida ne’e nia tilun. Hirak ne’ebé labele fokit ne’e, kuitadu, haree tuir de’it. Amigu ida naran “osan” ne’e mai tulun ita, afinál amigu ida ne’e maka sobu hela ita. Ohin  loron ita haree sé maka benefísia. Iha buat balun ne’ebé sai benefísiu ba populasaun hanesan ahi no infraestrurua maibé sei uituan liu,” Amu bispu tenik.

Polítikamente, tuir Don Basílio, buat ida polítika ne’e mós laiha buat ida inimigu komun  tanba ema ida-idak hanoin tuir ida-idak nia ideolojia. Maibé, buat polítika ne’e, dalan ida la’ós finalidade ida maibé finalidade ne’e mak povu nia moris di’ak. Kuandu defini povu nia moris di’ak ne’e, saida-saida maka iha hanoin ne’e dehan povu nia di’ak.

“Ha’u dehan falta unidade ne’e mós partidu ida-idak mai ho ninia hanoin no filozofia. Ne’e loos duni. Maibé, finalidade ne’e maka oinsá ita haree populasaun Timor nia di’ak. Iha momentu ida ne’e, ema sira ne’ebé túr iha leten la’ós de’it iha kompeténsia disiplina partidu nian maibé atu haree Timor nia dezenvolvimentu, ema ne’e tenke iha kompeténsia túr iha ne’ebá hodi haree oinsá mak bele implementa polítika jerál ne’ebé governu defini hodi bele atinji povu nia moris di’ak la’ós ema grupu ida nia moris di’ak,” nia subliña.

Atu bele kria unidade nasionál ida metin, bispu informa, líder sira ne’e tenke ko’alia ho laran, tenke barani simu ema seluk nia ideia, tenke barani husik buat ne’ebé sira-nia partikularidade ne’e, hanesan responsável oinsá maka sira haree rai no povu Timor-Leste nia di’ak. Agora ida-idak seidauk barani husik nia prespetiva pesoál, sentimentu pesoál no nia istória  pesoál, ne’e katak timoroan sira seidauk bele hakat ba dook.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here