Prezidente Repúblika kondekora Medalla Méritu ba atleta defisiente, Teófilo Freitas. Imajen Mídia PR

DILI, 19 maiu 2019 (TATOLI)—Atleta Teófilo Freitas, ne’ebé konsege manán medalla osan-mean iha kompetisaun ASEAN Para Games, Indonézia, iha tinan 2018, to’o oras ne’e seidauk simu subsídiu hosi Governu.

 Nia informa, subsídiu ne’e governu liuhusi Sekretaria Estadu Juventude no Desportu (SEJD) promete ba atleta sira ne’ebé hatudu prestasaun di’ak iha eventu internasionál no iha ona baze legál liuhusi diploma ministeriál, maibé governu seidauk realiza.

“Uluk SEJD promete $100.000, eseptu 2017 iha Malázia no 2019 iha Darwin, Austrália. Uluk SEJD dehan hein Orsamentu Jeral Estadu (OJE), maibé OJE promulga tiha ona, agora seidauk rona serteza ba atribuisaun prémiu sira ne’e,” Teófilo haktuir ba Agência TATOLI, liuhusi rede sosiál, domingu (19/5/2019).

Atleta ne’e dehan, maski subsídiu ne’e governu promete ho montante $100.000, maibé nia parte seidauk simu informasaun katak iha mudansa ba montante osan ne’e ka lae. “Tuir informasaun ne’ebé ha’u rona katak baze legál diploma ministeriál ne’ebé iha, prémiu sira ne’e %100 ba ha’u-nia konta bankária,” Teófilo haktuir.

Nia afirma, bainhira governu kumpri duni promesa, nia uza osan ne’e atu responde família nia nesesidade.

“Ha’u atu uza osan ne’e halo di’ak ha’u-nia pai nia rate. Halo mós ha’u-nia inan no inan haki’ak nia uma. Kontinua estudu fali tuir ha’u-nia talentu ne’ebé iha. Dalaruma osan ne’e la sufisiente, maibé ida ne’e mak ha’u-nia planu ba osan ne’e,” katak atleta ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here