Veteranu no kombantente libertasaun nasionál, Luís Gonzaga “Lemo Moris” da Costa

BAUCAU, 19 maiu 2019 (TATOLI)Uluk ita-boot ajuda Xanana iha ailaran, agora Xanana fó saida ba ita-boot?” “Uluk, ami-na’in rua Xanana la’ós halo biznis, halo fetosa-umane para ha’u fó fahi ba nia karik, nia fó fali kuda-karau ba ha’u. La’ós halo biznis para ninia lukru iha ne’e, nia atu fó mai ha’u. Ami hamutuk buka hasai hotu naha-todan be iha Timor-Leste nia leten ne’e halo nusa para kamaan.”

Dadalia badak ida ne’e akontese ba jornalista TATOLI ho veteranu no kombantente libertasaun nasionál, Luís Gonzaga “Lemo Moris” da Costa, kona-ba ninia reflesaun ba prosesu dezenvolvimentu iha Timor-Leste iha ámbitu komemorasaun Restaurasaun Independénsia Timor-Leste ba dala-17, iha ninia rezidénsia iha Suku Ostico, Vemasse, Baucau,  domingu (19/5/2019).

“Dezenvolvimentu Timor-Leste iha ámbitu ukun rasik án ne’e, ha’u haree hanesan kona-ba eletrisidade la’o maibé agrikultura no ekonómia ladún la’o, tanba Minstériu Agrikultura nia serbisu marka pasu hela. Tanba, ema nia ró bara-barak tama mai ita-nia rai ne’e, fila fali ne’e envezde tula fali produtu agrikola hanesan kamii, batar no buat selu-seluk maibé tula sai fali ita-nia osan dolar ba sira-nia rain,” nia haktuir.

Dezenvolvimentu iha Baucau ne’e, nia dehan, konstrusaun ba eskola no uma sira ne’ebé populasaun nian ne’e avansa. Fraku liu mak agrikultura no estrada ne’e seidauk dezenvolve. Depois, rai ne’e atu avansa, tenke iha seguransa para doadór sira mai kuda no investe sira-nia kapitál iha ne’e.

“Liliu mak agrikultura ne’e. Ita-nia rain sei rai-mamuk barak hela, nusa mak ita la kuda ai-horis bara-barak. Tanba, ha’u dehan ne’e, kada tinan ha’u tenkiser kuda aihoris hún 20 ba leten. Se lae ha’u toba la dukur. Iha ne’e ha’u kuda nú, ai-teka, kamii. Maibé, ha’u la presiza hanoin ema seluk kuda ka lae. Ha’u foka ba ha’u nian de’it,” Luís hateten.

Tansá tenke kuda ai-horis, nia hatán, nasaun ida atu dezenvolve, nia sidadaun tenke hatene defende kondisaun klimátika mundiál. Aleinde kria planeta ba umanizmu, automátikamente, kuda ai-horis ne’e atu tulun mundu no ba Timor-Leste ida ne’ebé buras no matak. Basá, kuda ai-horis, oan no beioan sira bele aproveita iha loron aban.

Entretantu, nu’udar veteranu, Luís rekoñese katak kada fulan simu subsídiu hosi governu maibé subsídiu hirak ne’e, nia utiliza hodi haree ba nia-oan sira nia eskola, harii uma, balun uza ba dezenvolve buat sira seluk. Maibé, nia hateten, la toman atu tane-liman ba governu ka husu ba Xanana atu hetan tulun.

“Ita labele husu bebeik ba nasaun para fó nafatin ba ita. Maibé, ita mós tenke haree para saida maka ita bele halo ba nasaun,” nia subliña.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here