Veteranu Luis Gonzaga da Costa “Lemo Moris”

BAUCAU, 19 maiu 2019 (TATOLI)Xanana Gusmão agora bele sai profesór polítika no líder mundiál maibé iha tempu rezisténsia, Xanana sai ha’u-nia estudante. Iha ailaran, iha biban harii organizasaun klandestina MIPLIN iha Ostico 19 maiu 1980, ha’u  mak hanorin Xanana.”   

Lorokraik ne’ebá (domingu, 19 maiu 2019), loromatan nia oin malahuk tanba abu-abu satan netik nia matan. Udan-rahun be monu hosi lalehan, kari-án hanesan rai-henek nia musan be ema kari hasoru, halo kareta Mini Bus nia vidru oin malahuk. Hateke la borus. Haree la hetan.

Tekir-tekir, iha estrada ida-nia ninin, iha uma ida-nia oin, ema ida foti sa’e liman hanesan atu para kareta. Ha’u hateke ba alvu ne’e, katuas fuuk-mutin ida hamriik ho nia oan-mane be nia oin familiár iha ha’u-matan. Ha’u koñese nia. “Ah! Sira-nia uma mak ne’e? Ita fila kareta iha ne’e,” ha’u dehan ba motorista, Yuvenaris “Edu” Luan, ho lian neineik.

Kareta para iha uma oin. Ha’u loke odamatan, katuas fuuk mutin ho nia oan-mane ne’e hakbesik ami hodi kaer liman ba dadaun. “Boatarde tiu!” “Boatarde. Mai túr tiha.” “Obrigadu.” Ha’u haree veladór kór azúl ida be hatuur iha ami oin, iha nia leten, nakonu ho bee-manas sikra lubuk ida ho kaidane (patisku) “forerai sona” hein hela ami. Hemu ba!

Hemu dadaun, Veteranu Luis Gonzaga da Costa “Lemo Moris” ne’ebé uluk Komando ba Luta nian, Kay Rala Xanana Gusmão, fó fiar ba nia nu’udar responsável ba MIPLIN, Milícia Populár da Libertação Nacional, iha Zona Ventania (Anin-fuik) Ostico-Baucau ne’e, haktuir nia istória ba jornalista TATOLI.

Iha loron 19 maiu 1980, grupu komunidade balun hosi Suku Ostico, hala’o enkontru ho luta na’in Kay Rala Xanana Gusmão iha wee-matan Uailugo-Buto, Ostico, Vemase, Baucau.

“Kestaun tanba ha’u hatene ko’alia portugés uituan entaun Kay Rala Xanana Gusmão foti ha’u nu’udar responsável prinsipál MIPLIN iha Zona Ventania (Anin-fuik). Ninia área kobertura mak Suku Ostico, Loilubo, Fatumaca-Gariuai, Baucau Vila, Bucoli ho Kaikua. Iha okaziaun ne’e, ami hetan apontamentu hosi Xanana hó-nia títulu “O Análise da Situação Feita Pela Direcção Ponta-Leste,” nia haktuir ho lian ás be ás.

Ami hirak ne’ebé halibur hamutuk iha ne’ebá, esklaresidu ho apontamentu ne’ebé luta na’in Xanana Gusmão fó ba ami. Ha’u uza apontamentu ne’ebé refere hodi kontinua organiza komunidade sira balun hodi luta no serbisu hamutuk ba Libertasaun Nasionál.

“Iha tempu ne’ebá, ha’u ho esperiénsia uituan kona-ba aimoruk ho oinsá halo injesaun ba ai-moruk, ha’u mós hanorin Xanana Gusmão injesaun no fó aimoruk balun ba nia hodi sona ita-nia gerilleiru sira karik haten moras ruma. Ha’u-nia estudante dahuluk mak  Kay Rala Xanana Gusmão,” dehan “Lemo Moris” ho hamnasa.

Nu’udar responsável másimu ba MIPLIN, ha’u mós hatutan organizasaun nia mehi ba maluk balun hodi luta ba ukun án. Misaun ida-ne’e hanesan misaun sekreta tanba iha funu laran, amigu bele sai inimigu, fatuk, ai, animál sira mós iha tilun.

“Iha 20 juñu 1980, ami hasoru malu fali ba daruak nian iha Ostico Luho-Dora, Kaidawa-Nau ba segundu enkontru. Ida-ne’e hanesan mós enkontru ikus ho Kay Rala Xanana Gusmão ho nia grupu. Hafoin enkontru, iha kalan ne’e, ami tebe, dahur, hodi selebra mós luta na’in Kay Rala Xanana Gusmãó-nia tinan ba dala-34.”

Iha fulan novembru 1980, Kay Rala Xanana Gusmãó nia elementu ida ho inisiál JL iha Lequidoe, Remexio, Aileu, hetan kapturasaun no deskobre hosi militár Indonézia batallaun Nanggala 44 Tim Inteligen Tempur Kopassus—Unidade Forsa Batalla Indonézia nian.

Iha investigasaun no torturasaun hosi militár Indonézia, nia deskobre katak wainhira nia la’o hamutuk ho maun-boot sira konsege to’o iha Suku Ostico no hasoru malu ho ida naran Guilherme altura ne’ebá hanesan Adjuntu Xefe Suku.

Iha 03 dezembru 1980. Militár Indonézia iha biban ne’e kaptura Guilherme ho Aleixo tuir investigasaun iha kuartél komando Baucau. Hafoin ida-ne’e, Militár Indonézia deskobre tan membru MIPLIN sira seluk hamutuk na’in 18 ne’ebé eziste iha zona Ventania, inklui atan ha’u,  ami hetan kapturasaun hosi militár Indonézia hodi tuir inkéritu.

“Tanbasá, ó hakarak tuir Xanana?” dehan membru forsa Indonézia ida iha inkéritu laran. Ha’u hatán ho hamnasa de’it. Mate agora, hotu ona. Ha’u hatán. “Ha’u hakarak tuir Xanana ho objetivu no insiativa ida, katak atu hamonu Governu Indonézia liuhosi MIPLIN iha zona Ventania!”

Hafoin ne’e, militár Indonézia sira lori ha’u ba Dili ho elikoptru tuun iha aeruportu Masimoli-Bairru-Pité, Dili (atual Palásiu Prezidente Repúblika). Sira sulan ha’u iha aviaun kotuk no ha’u-nia matan kesi metin ho hena-metan. To’o iha Dili, lori ha’u ba kuartél Nanggala 44 nian iha Kolmera.

“Tuir ita-boot ne’ebé espertu ne’e nia hanoin, maizumenus Indonézia atu manán funu ne’e, halo oinsá,” sira husu ha’u. Ha’u hatán, “Se hakarak manán funu iha Timor-Timur, iha buat balun ne’ebé imi presiza halo. Primeiru, imi organiza malu militár sira lori motaserra kado hotu ai-hún boot sira iha Timor laran, para gerrileiru sira labele subar ona. Imi buka tuir Ramós Horta, Marí Alkatíri, Rogerio Lobato, Roque Rodrigues no membru diplomata sira  hela iha rai li’ur ne’ebá oho hotu tiha. Imi oho hotu timoroan mane sira hosi idade tinan 5-90, imi manán ona funu ida-ne’e.”

Iha 14 janeiru 1981, desterra ha’u ba illa Ataúro hamutuk ho ha’u nia maluk sira hosi masakre Marabia nian hafoin tuir tiha investigasaun ne’ebé kle’an iha kuartél Nanggala iha Kolmera. Ha’u konsege desterra dalarua ba Illa Ataúro no ikus liu iha Cailaco (Bobonaro) no fila fali mai ha’u-nia knua moris fatin, Ostico, Vemasse, Baucau (1986).

Ha’u hateke ba parte loromonu, iha rai luan nia rohan ne’ebá, abu-abu be tara-án iha lalehan nia kakuluk, nia kór muda-án hanesan raan-matak. Loromatan triste, fila nonook ba nia  knuuk. Ami mós dada-án fila fali ba uma. Perdua labele haluha. Hamutuk ita luta kontra haluha!

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here