Xefe Suku Loré II, Armando de Jesus. Imajen Tatoli/Eugénio Pereira

LOSPALOS, 18 maiu 2019 (TATOLI)—VIII Governu Konstitusionál kria ona planu atu iha futuru harii portu alternativa no dezenvolve sentru turizmu iha Suku Loré I, Loré II, Postu Administrativu Lospalos, Munisípiu Lautém.

Sekretáriu Estadu Komunikasaun Sosiál (SEKOMS), Merício Juvinal “Akara” esplika, iha Planu Estratéjiku Dezenvolvimentu Nasionál-PEDN (2011-2030), defini ona atu harii portu alternativa iha Loré I hodi bele fasilita movimentu turista iha futuru bele halo viajen ho ró turista hosi Dili ba Portu Com, vizita turizmu rai henek mutin iha Jaco, ba foho Paichau no vizita to’o tasi ibun Mundu Perdidu-Illomar nian liu-ba Beaço (Viqueque) ne’ebé sei harii mós plataforma LGN (Liquefied Natural Gas) iha futuru.

“Governu konsidera Suku Loré I no Loré II ne’e potensiál ba turístiku. Ita-nia primeiru-ministru iha hanoin atu dezenvolve portu multifunsaun ida iha parte Loré,” dehan Akara  durante hala’o enkontru ho komunidade iha sede Suku Loré II, sabádu (18/05).

Portu multifunsaun ne’e, nia esplika, governu harii atu fasilita mós ró forsa mariña FALINTIL-Forsa Defeza Timor-Leste (F-FDTL) ne’ebé halo seguransa iha kosta súl hodi asegura seguransa iha portu Beaço, Viqueque.

Nia hatutan, portu ne’e mós sei fasilita ró turista sira halo viajen hosi Austrália no Dili ba Jaco bele ba para iha ne’ebá.

Molok atu harii portu ne’e, nia esplika, governu hadi’a uluk kondisaun estrada Lospalos Vila ba to’o suku no tasi ibun sira hodi fasilita transporte públiku livre asesu ba mai.

Akara hatutan,programa ne’e hotu hanesan kompromisu planu VIII Governu nian bainhira iha osan ona bele harii iha kualker tempu. “Ne’e hanesan kompromisu polítika. Harii portu bele akontese agora no bele iha tinan lima mai,” katak nia.

Iha PEDN, governu defini ona Lautém hanesan rejiaun I ne’ebe sei sai sentru turístika nasionál no sentru pekuária hodi povu haki’ak animál hanesan karau, fahi no bibi tuir kondisaun klima rai Lautém nian.

Iha fatin hanesan, Xefe Suku Loré II, Armando de Jesus dehan, sira agradese ba governu bele defini suku rua ne’e sai sentru turizmu iha futuru.

Nia espera, promesa ne’ebé governu hato’o labele ko’alia de’it, maibé importante liu realiza promesa hodi povu fó fiar ba líder sira.

Entretantu, Administradór Postu Administrativu Lospalos, Tadeu da Costa dehan, povu hein atu promesa governu dezenvolve Loré II sai sentru turizmu no harii portu alternativa iha futuru.

Tuir nia haree katak se governu harii portu no dezenvolve suku rua ne’e sai sentru turizmu maka sei fó benefísiu ekonómiku direta ba povu atu hadi’a sira-nia moris atu kontribui ba dezenvolvimentu.

“Se programa ne’e realiza duni, ha’u hanoin bele lori mudansa pozitivu ba povu suku 10 iha Lospalos atu hadi’a sira-nia moris iha futuru mai,” nia espera.

Iha enkontru ne’e, populasaun hato’o agradese ba programa governu ne’ebé hato’o ba sira no hein katak bele implementa iha futuru. Povu Lautém prontu koopera ho governu.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here