Timoroan-sira aprezenta klube-sira ne’ebé atu kompete iha atividade desportiva hodi komemora Loron Restaurasaun Independénsia Timor-Leste ba dala 17, iha Oxford. Imajen espesiál

OXFORD, 18 maiu 2019 (TATOLI)—“Rai bele dook ba, ha’u dada besik hela”. Prinsípiu ida ne’e maka timoroan-sira iha diáspora (Oxford, Inglaterra) hanai. Bele hela do’ok ne’ebá, sente hanesan iha Timor. Diferente de’it sidade maibé ámbitu Timor nian.

Lalika hakat ba dook. Iha Timor, timoroan-sira komemora loron Restaurasaun Independénsia ba dala 17 ho atividade oioin, iha rai Oxford mós timoroan seluk komemora ho atividade oioin. Laiha diferensa. Hotu-hotu ho espíritu nasionalista.

Tinan ida ne’e, Sidade universitária Oxford, Inglaterra, maka sai uma-na’in ba “Eventu 20 maiu 2019”.

Kontributora Agência Tatoli, Dalia Kiakilir Agostinho, entrevista Embaixadór Timor-Leste ba Inglaterra, Joaquim Fonseca. Imajen espesiál

Komissaun organizadora lidera hosi Acacio Márques ho Asosiasaun Desportiva Timorense (ADT) hamutuk organiza eventu ho atividade sira hanesan torneiu desportiva, espetákulu kulturál ho ​‘noite de baile’​.

Ofisialmente eventu ne’e hahú ho tebe-bola ne’ebé halibur ekipa lubuk-ida hosi Inglaterra no mós Norte Irlanda nian no Oxford Brookes University Sport maka fatin sasin ba ​akontesimentu ida boot ne’e.

Molok árbitu lian, sesaun tebe-bola loke ho onra hosi Embaixadór Timor-Leste ba Inglaterra, Joaquim Fonseca, no intervensaun hosi Prezidente Komisaun Organizadora, Acacio Márques, ne’ebé sira-rua ho tatoli lia-menon a timoroan sira atu la-haluha “loron boot” sira rai-doben Timor-Leste.

Iha entrevista ho Tatoli, embaixadór Timor-Leste ba Inglaterra, Joaquim Fonseca dehan komemora 20 maiu relembra buat hotu-hotu ne’ebé akontese durante tinan barak, dezde estranjeiru sira tama iha Timor, sékulu barak portugés sira iha Timor, iha Indonézia nia tempu to’o ukun-án.

“Komesa hosi buat sira ne’ebé halo ema triste, halo ema haksolok, sakrifísiu, esforsu, avansu, retrosesu. Ne’e maka ita hanoin. Entaun, ohin, ita halo reflesaun oinsá Timor ne’e konsege rekonkista nia liberdade,” dehan Joaquim.

Iha biban hanesan, Prezidente Komisaun Organizadora, atuál xefe komunidade timoroan sira iha Oxford, Acacio Márques, tane aas importánsia loron 20 maiu ba timoroan sira hotu, tantu iha rai laran no mós iha rai li’ur katak loron ne’e espesiál no furak.

Kona-ba torneiu futeból, ekipa sira ne’ebé partisipa iha kampeonatu ba dala 4 hosi Inglaterra maka FC Akadémika, FC Tazlekar, FC Timor Peterborough, FC Kultura Peterborough, FC Unidus A. Yarmouth, FC Unidus B Yarmouth, FC Santa Cruz, FC Timorense, AC Mayluan, AS Makara, FC Souro, FC Fortuna, FC Brigwater, FC Ox-Til no destake ba prezensa ekipa rua hosi Norte Irlanda nian maka FC Foinsa’e Timor NI no FC Aswa’in NI. Ekipa vensedór ba jogu grupo 8 maka FC Foinsa’e Timor (FST) hosi Norte Irlanda nian.

Treinadór klube FST, Helio Alin deklara ba Tatoli katak sai kampiaun nu’udar FST nia objetivu, atu defende títulu ne’ebé manán dala 2 tutuir malu no tinan ida ne’e “foinsa’e” sira hakarak hametin pujansa ho Tri-Kampeaun.

Alende manán torneiu hosi grupu 8, Alin mós sai nu’udar manán-na’in ba prémiu mellór treinadór iha edisaun ba dahaat torneiu tebe-bola “20 maiu” 2019 iha Oxford. Iha jogu grupu 11 nian, FC Fortuna maka sai nu’udar vensedór.

Sesaun solene ba eventu ne’e, tuir programa, akontese iha Cheney School, Cheney Ln, parte kalan nian. Iha biban ne’e, uma-na’in Oxford prepara espetákulu kulturál, serimónia entrega prémiu no aprezentasaun dansa kultura Timor hosi grupu Kulturál Wehali hosi Crewe.
Eventu ne’e konklui ho susesu no taka ho baile-dansa Timor nian.

Kontributora: Dalia Kiakilir Agostinho (Oxford)

Editór: Xisto Freitas

HAKEREK NO HATÁN

Please enter your comment!
Please enter your name here