Ministru Estadu Prezidénsia Konsellu Ministrus no Ministru Turizmu Komersiu Industria ein ezersísiu, Hermenegildo Augusto Cabral Pereira. Imajen/Egas Cristovão

DILI, 17 maiu 2019 (TATOLI)-Ministru Estadu Prezidénsia Konsellu Ministru no Ministru Turizmu, Komérsiu no Indústria (MTKI) iha ezersísiu, Hermenegildo Augusto Cabral Pereira, hatete, turizmu hanesan setór ida ne’ebé Timor-Leste presiza atu dezenvolve no urjénsia uitoan para tulun hodi liberta dependénsia ba setór mina-rai.

“Tanba mina-rai ne’e rekursu ida ezgotavel ho tinan ba tinan ita uza no sei hotu, maibé turizmu ne’e indústria ida ne’ebé sei dezenvolve para sempre”, afirma Ministru Agio Pereira, iha ámbitu konferénsia internasionál ba daruak kona-ba destinu turístiku emerjente sira, ohin, iha Sentru Konvensaun Dili (CCD-sigla portugés).

Konferénsia internasionál ne’ebé organiza hosi Ajénsia Estadu Unidu ba Dezenvolvimentu (USAID) Turizmu Ba Ema Hotu no servisu hamutuk ho MTKI no Dili Institute of Technology (DIT) ne’e ho  tópiku “Pás, Armonia no Fraternidade : Dezenvolve Turizmu Relijiozu no Peregrinasaun Timor-Leste”.

Timor-Leste haree maka iha mós kompetitividade ho rai barak hanesan peritu hosi USAID nia dehan ho Bali, Timor-Leste ladún iha konfiansa atu dezenvolve.

“Ha’u diskorda uitoan. Ita iha konfiansa atu dezenvolve so ké ita-nia rain ne’e foin mak atu selebra tinan ida ne’e, tinan 20 dezde konsulta populár. Prioridade, buat hotu-hotu prioridade, ne’ebé ita tenke haree ita-nia orsamentu ne’e labele tau ba buat hotu-hotu au mezmu tempu, se lae ita-nia Fundu Petróleu mós bele la sustentavel”, hateten Ministru Agio Pereira.

Turizmu tanba tranzversál, tenik Agio Pereira, ema atu mai halo turizmu iha rai ida, dahuluk, haree rai ne’e estavel, iha pás, iha armonia ka lae, iha seguransa ka lae, ne’ebé inklui mós impaktu saúde, iha transporte ka lae?

“Ita kuandu ko’alia turizmu, ita ko’alia buat sira ne’e, ko’alia asesu saúde, transporte. Kuandu ita hahú ona munisipalidade ne’e, Governu iha planu 2020 ne’e atu fó kbiit ba munisipalidade”, informa Agio Pereira.

Tuir nia, dezenvolvimentu kbiit ka kapasidade ne’e sei iha impaktu maka’as ba iha turizmu no ida ne’e hotu maka tenke haree.

“Ita rona opiniaun ema matenek na’in sira, ita simu ho liman rua, ita ajusta mós ba ita-nia realidade no ha’u fiar katak iha tinan rua, tinan tolu tan, ita sei haree turizmu ne’e la’o maka’as tebes iha ita-nia rai tanba situasaun saúde mós la’o di’ak ona, ita tenke haree mós iha formasaun juventude tanba bele halo turizmu maka’as, mas nia símbolu ka valór ne’e nia impaktu ba ita-nia juventude, populasaun, ba ita-nia povu nia moris di’ak”.

Agio Pereira dehan, prioridade ba turizmu ne’e atu kobre área hotu ne’ebé iha relevánsia ba turizmu, iha saúde, seguransa, pás no estabilidade, armonia ho infraestrutura, otelaria no ospitalidade ne’e importante tebes.

“Hanesan matenek na’in sira mós ohin ko’alia no ha’u mós hatete transporte aéreu determinante. Ha’u rona peritu USAID nia ko’alia preokupasaun vistu ne’e mós determinante, Governu rasik hapara tiha ezijénsia ba autorizasaun prévia molok mai simu vistu entrada para labele difikulta prosesu ema mai”, Agio Pereira hatete.

Jornalista   : Maria Auxiliadora

Editór         : Francisco Simões

HAKEREK NO HATÁN

Please enter your comment!
Please enter your name here