Prezidente Parlamentu Nasionál (PN), Arão Noé de Jesus da Costa Amaral. Imajen António Gonçalves

DILI, 17 maiu 2019 (TATOLI) – Prezidente Parlamentu Nasionál (PN), Arão Noé de Jesus da Costa Amaral, hateten povu komunga moto Adeus Konflitu, Benvindu Dezenvolvimentu ne’ebé estabelese hosi Governu da-haat.

“Ho akontesimentu krize iha 2007, hosi tinan 2017 mai to’o eleisaun antesipada povu komunga tebes-tebes moto ida ne’ebé Governu da-haat fó sai iha 2009 kona-ba Adeus Konflitu Benvindu Dezenvolvimentu”, hatete nia ba jornalista sira iha PN, ohin.

Nia hatutan: “Dezde 2010 to’o agora mezmu diferente diverjénsia polítiku oioin, maibé povu moris hakmatek nafatin, ne’e katak povu komunga tebes mensajen ne’e atu kontribui ba estabilidade hodi hala’o dezenvolvimentu iha ita rain”.

Komemorasaun restaurasaun tinan ne’e, Arão Noé konsidera hanesan tempu ida atu halo reflesaun ba progresu dezenvolvimentu la’o ona durante tinan 17.

“Komemorasaun restaurasaun independénsia ne’ebé halo agora, ha’u hanoin tempu ida para ita halo reflesaun, situasaun dezenvolvimentu rai  ne’e nian durante ne’e, liuliu estabilidade”, afirma tan.

Depois tinan 17, nia akresenta ita moris iha momentu ida ho krize ne’ebé iha tinan rua-rua hanesan iha 2006 to’o 2008, konsege ultrapasa ida ne’e ho moto ida ne’ebé governu hasai momentu ne’ebá.

Ba oin, lideransa másimu reprezentante povu ne’e husu ba povu atu koopera ho Estadu no Governu, hodi mantein estabilidade, tanba lakleur tan kadoras mina sei dada mai tasi mane.

 “Agora ba oin prepara daudaun atu dada pipeline (kadoras) mai tasi-mane, katak presiza tinan lima ba oin moris iha estabilidade polítika, no seguransa, nune’e fó garantia ba kompañia, investor mai investe, hodi atinje objetivu dada pipeline mai Timór. Fatór seguransa no polítika determinante tebes ba dezenvolvimentu”, subliña.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here