Ministru Estadu Prezidénsia Konsellu Ministrus no Ministru Turizmu Komersiu Industria ein ezersísiu, Hermenegildo Augusto Cabral Pereira. Imajen/Egas Cristovão

DILI, 17 maiu 2019 (TATOLI)-Maski Timor-Leste nu’udar nasaun ki’ik, maibé orgullu ho nia diversidade kulturál ne’ebé mai hosi influénsia barak durante tempu naruk. Nune’e, grupu étniku oioin, prodús diversidade únika ne’ebé reprezenta hosi língua, dansa, múzika, arkitetura, artezanatu, no to’o timoroan nian fé (fiar).

“Ita nu’udar povu ida ho tradisaun ne’ebé mai kedas hosi tempu bei-ala sira-nia no fiar ba lulik sira ne’ebé sai nu’udar parte importante ida hosi kultura timoroan nian, no ne’ebé tuir mai asosia ba eransa koloniál portugés ho fiar sarani no lian portugés, no resente liu tan ba ita-nia istória rezisténsia nian, luta libertasaun nasionál nian”, Ministru Estadu Prezidénsia Konsellu Ministru no Ministru Turizmu, Komérsiu no Indústria iha ezersísiu, Hermenegildo Augusto Cabral Pereira (Agio Pereira), hatete iha konferénsia internasionál kona-ba destinu turístiku emerjente sira ho tópiku “Pás, Armonia no Fraternidade : Dezenvolve Turizmu Relijiozu no Peregrinasaun Timor-Leste, ohin, iha Sentru Konvensaun Dili (CCD-sigla portugés).

Ministru Agio Pereira dehan, labele ko’alia kona-ba dezenvolvimentu turizmu nasionál sein temi infraestrutura sira hosi apoiu no importánsia hadi’a servisu báziku sira tuir padraun internasionál hodi investe maka’as liu iha edukasaun atu fó servisu bá área ida ne’e la’ós de’it ba iha nivel ensinu superiór, maibé liuliu ba nivel vokasionál.

Tanba ne’e, tuir Ministru Agio Pereira, tenke investe duni ba foin-sa’e sira hodi asegura formasaun téknika no ne’ebé orienta ba atividade turístika oioin, hanesan kazu turizmu relijiozu nian.

Aléinde ne’e iha buat barak mós mak Timór tenke halo kona-ba asesibilidade, tantu ba transporte aéreu sira ka bá mós asesu via terrestre ba pontu turístiku sira hotu, liuliu, iha área rurál sira. Asesu ba teknolojia no informasaun sira, internet no rede movel di’ak daudaun ona, maibé sei iha mós dezafiu barak ba operadór turístiku no ba servisu ein jerál.

“Governu Konstitusionál Daualuk sei kontinua servisu maka’as hodi hadi’a asesibilidade no kontinua investe nafatin iha área hirak ne’e”, afirma Ministru Agio Pereira.

Agio Pereira dehan, turizmu relijiozu mosu atu fó ksolok espirituál, maibé bainhira ema halo peregrinasaun, turizmu relijiozu bele mós tanba razaun sira kona-ba orden kulturál ka antropolójika no nu’udar segmentu turizmu importante ida ne’ebé kuaze atu hanesan ho turizmu kulturál.

Tuir nia, turizmu relijiozu lahanesan ho turizmu kulturál tanba inklui vizita bá fatin kultu nian ka partisipasaun iha eventu relijiozu, nu’udar ezemplu mak peregrinasaun relijioza bá Santuáriu Maria Virjen Ramelau.

Aléinde ne’e, Timor-Leste iha priviléjiu tanba iha mós komunidade relijioza seluk hanesan protestante, musulmanu, kristaun, indú, no konfisaun relijioza seluk ne’ebé sei kontribui ativu ba dezenvolvimentu no promosaun fatin kultu, edifísiu no ninia sasán sira ne’ebé lulik.

Maioria hosi turista sira ne’ebé vizita fatin relijiozu halo parte mós iha programa kulturál sira. Nune’e, Ministru Agio Pereira, salienta tan,  importante atu servisu iha programa kona-ba atu hatene fatin relijiozu nian, tantu ba turista fiar-na’in ka turista komún sira.

“Objetivu hosi tipu turizmu ne’e mak atu promove diálogu entre ema no kultura hodi bele sustenta iha turizmu ida solidáriu hodi apoia dezenvolvimentu sustentavel ba komunidade lokál sira. Ida ne’e sai hanesan ferramenta ida ne’ebé permite diálogu entre kultura no relijiaun, liuhosi koñesimentu prátika, krensa no rituál sira hodi promove toleránsia no fraternidade entre povu”, hateten Agio Pereira, hodi dehan mós katak, importante estabelese inisiativa, estratéjia no ekipamentu komplementár sira ne’ebé bele esplika arkitetura no arte iha komponente hotu-hotu, funsionál, litúrjika no simbólika sira.

Governu hatudu ona prova hosi nia esforsu ba área emerjente ida ne’e, iha nivel globál turizmu nian bainhira estabelese iha Planu Estratéjiku Dezenvolvimentu ba períodu 2011-2030 katak turizmu relijiozu nu’udar objetivu prioritáriu ida hosi Polítika Nasionál Turizmu nian.

Timor-Leste kontinua kria oportunidade barak, nune’e mós iha dezafiu sira. Oportunidade sira atu hatene oinsá aproveita esperiénsia no kapitál rejiaun nian tanba jeografikamente hola parte ba Sudeste Aziátiku no dezafiu sira tanba tenke investe ho sériu iha rekursu umanu no iha dezenvolvimentu infraestrutura atu nune’e bele kompete ho viziñu sira iha rejiaun ne’e, hodi kria segmentu merkadu nian ne’ebé bele dada investimentu no negósiu, ne’ebé importante tebes ba Timor-Leste nia diversifikasaun ekonómika.

Biban ne’e, Diretora Ajénsia Estadu Unidu ba Dezenvolvimentu (USAID), Diana B. Putman, dehan, tuir relatóriu 2011 hosi Organizasaun Turizmu Mundiál hatudu katak viajen espirituál no relijiaun hamutuk millaun 6000 iha mundu, porsentu 40 iha Europa, maibé metade porsentu 50 iha Ázia. Iha Timor-Leste, ohin, iha grupu lider polítiku no relijiozu ne’ebé prontu ba servisu iha armonia ba dezenvolve turizmu fiar nian iha país.

“No ne’e la’ós de’it di’ak, ne’e matenek tanba merkadu turizmu globál fiar nian ho biliaun $18 kada tinan. Timor-Leste na’in ba fatin barak inklui Kristu Rei, estátua Saun João Paulo II iha Tasi-Tolu no foho Ramelau, entre sira ne’e bele forma dalan ba turizmu fiar nian”.

Diana dehan, Estadu Unidu kontente nu’udar parseiru forte ho Timor-Leste ba dudu diversifikasaun ekonomia liuhosi turizmu.

“Dezenvolve turizmu fiar nian sai papél importante ba ajuda Governu atinje ninia meta ekonomia”, afirma Diana B. Putman.

Jornalista     : Maria Auxiliadora

Editór           : Francisco Simões

HAKEREK NO HATÁN

Please enter your comment!
Please enter your name here