Prezidente Komisaun B Parlamentu Nasionál, Cornelio Gama L7. Imajen/António Goncalves

DILI, 17 maiu 2019 (TATOLI) – Membru Parlamentu Nasionál (PN) hosi bankada Partidu Libertasaun Populár (PLP), Cornelio Gama L7, hakarak komemorasaun restaurasaun independénsia 20 maiu tinan ne’e, reprezentante povu sira tun ba baze hodi esplika prosesu konstrusaun Estadu ba povu.

Tuir eis-veteranu ne’e povu barak maka la asesu informasaun, tan ne’e la hatene saida maka ukun na’in sira halo ona durante ukun-án.

“Ha’u nia hakarak iha loron 20 maiu ne’e koloka kada deputadu 65 ne’e ba munisípiu no postu administrativu sira para fó netik esklaresimentu kona-ba konstrusaun Estadu ne’e ba ita nia povu”, katak nia ba jornalista sira iha resintu PN, ohin.

Nia hatete presiza mensajen ida kuandu koloka deputadu sira ba baze, nune’e labele hamosu duvida iha povu nia leet.

“Se lae povu hateten ami deputadu katak ami han de’it osan no nu’udar de’it reprezentante povu, maibé nunka tun ba haree sira iha loron boot”, katak.

Xefe bankada PLP ne’e rekoñese durante tinan 17, dezenvolvimentu la’o, maske seidauk másimu.

Hanesan, eletrisidade kobre hotu ona munisípiu 12 inklui Rejiaun Administrativa Espesiál Oekusi Ambenu (RAEOA), estrada no bee moos.

Biban ne’e, L7 husu ba povu hotu atu tuur hakmatek, koopera ho autoridade lokál, seguransa ne’ebé koloka, nune’e bele asegura seguransa iha rai-rasik.

Loron 20 maiu hanesan loron restaurasaun independénsia, hafoin Timor-Leste liberta án hosi Indonézia liuhosi referendum 30 agustu 1999 no prosesu luta ne’ebé naruk.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here