Ministru Interiór Interinu, Filomeno da Paixão de Jesus. Imajen/António Gonçalves

DILI, 17 maiu 2019 (TATOLI)–Governu liuhosi Ministériu Interiór (MI) hamutuk ho Komandu Polísia Nasionál Timor-Leste (PNTL) forma ona ekipa konjunta hodi halo estudu kle’an, ho hanoin ida atu revé lejizlasaun sira iha PNTL hanesan lei orgánika, estatutu no mós regulamentu disiplinár, ho objetivu profesionaliza membru sira.

Estudu ne’e sei aprezenta iha relatóriu finál ba governu konstitusionál da-ualu atu hamosu mudansa iha estrutura no delegasaun kompeténsia hahú hosi nasionál to’o munisípiu.

Prosesu estudu ne’ebé halo hosi asesór tékniku MI no asesór jurídiku sira iha PNTL, foku liu-ba asuntu prioridade tolu ne’ebé konsidera importante hodi hadi’a serbisu tomak iha polísia bele serbisu ho profisionál no disiplina mak; hadi’a lei orgánika, estatutu no regulamentu disiplinár PNTL nian.

Governu konsidera, asuntu prioridade tolu ne’e presiza hadi’a hodi fó valór pozitivu ba progresu dezenvolvimentu Komandu PNTL, tuir Planu Estratéjiku Dezenvolvimentu Nasionál (PEDN) 2011-2030 hodi lori PNTL hakbesik liu-ba komunidade hodi garantia pás no estabilidade interna no esterna.

Atu hatene liu tan, progresu serbisu ne’ebé Ministériu Interiór no Komandu PNTL halo ona, tuir mai bele akompaña entrevista eskluziva ne’ebé jornalista TATOLI, I.P halo ho Ministru Interiór Interinu, Brigadeiru Jenerál Filomeno da Paixão de Jesus (MI-FPJ), iha ninia serbisu fatin, Fatuhada, Dili, sesta ne’e.

TATOLI: Planu prioridade Ministériu Interiór tinan ne’e tuir ministériu nia medida atu garante atendementu ba povu ho kualidade. Saida maka governu atu halo hodi asegura planu ne’e bele la’o ho di’ak?

MI-FPJ: Ministériu Interiór ne’e ministériu boot kompara ho Ministériu Defeza. Iha serbisu barak iha ministériu interiór nia laran haree serbisu Diresaun Jerál Servisu Migrasaun (DJSM), Diresaun Nasionál Seguransa Patrimóniu Públiku (DNSP), Diresaun Risku Dezastre Naturál, (DRDN), Diresaun Administrasaun Finansa Protesaun Sivíl (DAFPS), Diresaun Nasionál Prevensaun Konflitu (DNPF) no Diresaun Nasionál Seguransa Rodoviária (DNSR) no boot liu mak ita-nia Komandu Polísia Nasionál Timor Leste (PNTL) ne’ebé iha polísia unidade barak hanesan Polísia Tránzitu, Ofisiál Polísia Komunitária (OPS) no unidade seluk-tan.

Hanesan ministru, ita hakarak tau prioridade barak. Primeiru mak ita haree lejizlasaun sira ne’ebé agora iha interiór ne’e la’o loos hotu ona ka la’e? Lejizlasaun ne’e ko’alia kona-ba saida, haree polítika seguransa interna nian, Lei Seguransa Nasionál no Lei Seguransa Interna bazeia ba Planu Estratéjiku Dezenvolvimentu Nasionál (PEDN) 2011-2030 hodi ita kaer ba konseitu estratéjiku dezembru 2016 nian.

Ita haree lei sira tuir mai ne’e bazeia ba konstituisaun RDTL kalae. Depois iha lei ne’e nia laran ita haree norma barak sai preokupasaun. Primeiru, ita ko’alia kona-ba estatutu PNTL nian. Estatutu ne’e la’o loos ona ka seidauk, depois mak ita foin haree komesa hosi ema ida sai polísia to’o nia hasa’e ninia karreira, nia direitu direitu prerrogativa no ninia obrigasaun ne’e saida-saida, ita tenke haree no define loloos.

Aleinde ida ne’e, ita haree fali ba PNTL ninia Lei Orgánika ko’alia ba misaun PNTL ninia prosesu treinamentu, infraestrutura, ekipamentu no rekursu umanu ne’e loos hotu ona ka la’e. Ikus tuir mai mak ita tenke haree ba PNTL ninia Regulamentu Disiplinár, katak polísia tenke la’o tuir loloos padraun ne’ebé ita hakarak.

Agora buat sira ne’e mak importante ita tenke haree atu halo planu ida oinsá maka fó formasaun haree ba lideransa no haree doutriña ba PNTL ninia inter-operaridade ho F-FDTL la’o di’ak ka lae.

Hosi ne’e mak tinan ne’e ami preokupa hodi forma ekipa tolu kahur Ministériu Interiór no PNTL atu haree ba kestaun tolu importante ohin ne’e.

Kestaun tolu ne’e mak ne’e, ita tenke haree ba Lei Orgánika PNTL, Estatutu PNTL no PNTL nia Regulamentu Disiplinár ne’ebé ekipa sira halo sira hato’o mai ha’u, ha’u haree hodi hatún fali ba asesór polísia no jurídiku sira sei haree depois maka sei lori ba Konsellu Ministru iha juñu ne’e nia laran hodi diskuti no aprova prioridade tolu ne’e.

TATOLI: Problema saida de’it maka ita-boot identifika mosu iha instituisaun PNTL nia laran?

MI-FPJ: Matéria tolu ne’e (Lei Orgánika PNTL, Estatutu no Regulamentu Disiplinár) ita aprezenta tanba iha problema barak iha PNTL. Ema balun akuza fali ha’u katak ha’u atu militariza fali buat ne’e. Dehan ha’u hakarak halo fali polísia sai fali militár. Maibé polísia ne’e sé ita haree loloos, polísia ne’e militár tiha ona. Balun hatais kamboflado, kaer kilat funu, ita la hatene polísia ne’e atu halo funu ka saida?

Tanba ne’e mak ha’u haree buat balun la di’ak tenke hadi’a. Ne’e primeiru. Segundu, ha’u haree iha polísia nia misaun loloos mak ida ne’ebé? Patrolla iha fronteira maka loos, ka keta iha ne’ebá (fronteira) forsa defeza nian karik.

Problema seluk tan mak komunidade ita husik hela depois “rama ambon” mak manda fali, asaltu anarkizmu mosu iha Dili laran no ema lanu teen mak manda iha lurón laran. Iha kalan ema la’o mós ta’uk. Ida ne’e mak sai preokupasaun ba ha’u. Tanba forsa polísia halo seguransa ba Dili ne’e sufisiente no resin tan. Tanba ne’e mak ha’u hakarak lei orgánika atu haree ba polísia ninia misaun no sistema forsa ne’e tenke loos tuir sira nia objetivu ba polísia komunitária ka polísia sira halai fali ba polísia militár karik.

Problema barak mak ha’u haree mosu. Hanesan foin dadauk ha’u vizita ba Unidade Polísia Fronteira (UPF) iha fronteira, sira (UPF) husu ba ha’u nune’e. Señor ministru, hela fronteira ne’e postu loos ona, soke haree karik ita nia komandu kompañia (F-FDTL) labele tau iha kotuk. Tenke tau iha foho leten para keta buat ruma, ita hakiduk karik ba kotuk.

Pergunta ida ne’e ha’u la hatán ba sira (UPF), maibé iha ha’u nia laran ha’u dehan nune’e, imi ne’e polísia ka militár mak hanoin hanesan ne’e. Se polísia buat ruma mai, polísia mai kotuk. Forsa mak iha oin.

Ha’u haree problema ida tan maka ne’e, aprosimasaun oknum polísia ba ema ne’e ladún di’ak. Tenke muda atitudi no mentalidade. Polísia ba hasoru populasaun ne’e ba para ko’alia, konvense, persuasiva, hamaus no trata populasaun hanesan maun alin, inan aman no oan.

Polísia la’ós ba hasee ema nia karreta haruka para, husu dokumentu, tebe ema nia karreta nia odamatan, baku lalenok halo kle’uk no ba ema nia festa polísia intervein ka buat hotu pistola mak tiru sa’e ba lalehan. Ne’e labele. Disiplina ne’e tenke tau iha prátika.

TATOLI: Públiku sira preokupa atendementu oknum membru operasionál iha terrenu. Oknum polísia balun atua problema ho brutalizmu. Ida ne’e tanbasá?

MI-FPJ: Ita-nia komunidade la presiza atua ho maneira sira hanesan ne’e, tanba loloos polísia ne’e ba ho persuasivu. Tenke hatene konvense ema para depois ema la’o tuir órden. Labele ba tama ho brutu. Ida ne’e buat ida la loos. Ne’e mak lori ha’u hamosu regulamentu disiplinár atu hadi’a. Regulamentu ne’e tenke te’in tasak didi’ak mak foin ita implementa atu kontrola polísia.

Ha’u dehan beibeik ona. Se membru polísia ida falta serbisu dala ida, dala rua to’o fulan, komandante labele kastigu nia maka’as liu. Suspende de’it. Se komandante duni nia sai, ne’e problema aat liu. Nia sei reklama tún sa’e to’o tribunál. Depois suspende to’o tinan ikus mai tama fali polísia tenke selu fali nia osan.

Buat sira ne’e hotu mak agora kria regulamentu disiplinár. Komandante tesi de’it kazu ida, depois mak hasa’e rekursu mai ministru foti desizaun. Se (polísia ida) sala, hasai! Tanba ne’e halo atu regula ema hotu disiplina no serbisu labele tuir nia hakarak. Nune’e, ba oin ne’e membru polísia hotu bele serbisu di’ak liu-tan.

TATOLI: Iha Planu Estratéjiku Dezenvolvimentu Nasionál (PEDN), ba oin defini PNTL tenke la’o oinsá?

MI-FPJ: Se ita haree tuir PEDN hakerek iha planu 2011-2030, kna’ar PNTL ne’e temi polísia komunitária. La temi polísia robusta. Tanba ne’e mak polísia komunitária ne’e ho dezenvolvimentu la’o mai ne’e ita haree polísia robusta mak maka’as liu fali.

Iha unidade oioin iha polísia maibé polísia komunitária ne’e menus. Entaun, problema “rama ambon” manda fali iha suku laran. Loloos ne’e, polísia komunitária haree problema sira ne’e rezolve iha suku, para ema la’o sente seguru. Ida ne’e mak ita tenke reforsa maka’as para haree unidade (polísia) oioin ne’e, ida ne’ebé presiza hamenus atu reforsa polísia komunitária.

Kuandu iha PEDN temi polísia komunitária ne’e karáter militarizada, ne’e tenke disiplina. Nune’e nia la’o ho disiplina maka’as hanesan militár. La’ós fali iha terrenu, nia hatais farda no kaer kilat hanesan militár. Ne’e ita-nia kompriensaun sala ona. Polítika ida ne’e mak ita tenke hadi’a para polísia la’o fali ba nia dalan. La’ós atu sobu unidade, maibé hadi’a unidade.

Portantu, hosi estudu ne’ebé halo ona ne’e hasa’e mai ha’u, iha polísia unidade sira ne’e sei haree aumenta ka lae, ne’e haree tuir planu estratéjiku ne’e dehan saida. Aleinde ida ne’e, iha konseitu PEDN hateten, kapasitasaun rekursu umanu ba polísia tenke halo barak liu ba polísia komunitária. Ho ida ne’e mak ita foin haree unidade polísia sira ne’ebé tenke hadi’a, tenke aumenta no unidade polísia ida ne’e mak tenke hamenus no bele aumenta mós.

TATOLI: Tanbasá labele hamenus númeru rekursu unidade balun para poupa orsamentu no materiál para reforsa polísia komunitária no unidade sira ne’ebé importante iha terrenu mak barak hodi asegura seguransa públiku la’o livre?

MI-FPJ: Ha’u nia hanoin ne’e hanesan ne’e duni. Polísia komunitária mak tenke reforsa barak liu. Aumenta iha tránzitu rodoviáriu. Reforsa iha serbisu migrasaun para seguransa ne’e kontrola fó seguransa maka’as ba turista no sosiedade sira la’o sente livre. Ita lakohi mosu problema hanesan iha Liquiçá, turista sira mai joven sira halo asaun la di’ak.

Ha’u rasik rekoñese loos duni ita nia polísia ne’e unidade barak. Rai ida hanesan ita nian funu laiha, ameasa laiha, nusa maka unidade barak? Ita tenke halo revizaun para haree. Ha’u labele dehan diminui ka aumenta, tanba loloos ita labele haluha polísia ne’e nia prioridade mak komunitária. Agora, problema ida ne’e mak ami tenke haree foku maka’as ba ida ne’e ba oin.

TATOLI: Kooperasaun ne’ebé Governu halo ho parseiru internasionál hanesan Japaun, Nova Zelándia, Austrália no rai seluk tan, ita presiza liu iha área saida?

MI-FJP: Nasaun tolu hanesan Japaun, Austrália no Nova Zelándia ne’ebé ita temi importante. Ha’u fó ezemplu, sira iha polísia komunitária ida kapa’as tebes. Ita tenke apriende hosi esperiénsia sira ne’ebé kapa’as hanesan nasaun tolu inklui Portugál iha mós polísia komunitária.

Saida mak ita hakarak hosi sira mak sira lori karáter di’ak. Polísia komunitária mai fahe estratéjia ba ita. Ida ne’e iha ita-nia estratéjia planu ne’e hakerek ida ne’e. Pur-ezemplu, Austrália agora fó apoiu halo formasaun oioin iha munisípiu 13. Aleinde ida ne’e, Nova Zelándia fó ba OPS (Ofisiál Polísia Suku) ne’ebé sei to’o 2020. Sei hadi’a OPS nia serbisu iha suku (452) atu lori mudansa di’ak hodi koopera ho autoridade halo prevensaun no rezolve problema krime (dezorden públiku) hotu atu komunidade bele iha pás.

Alende ida ne’e, haree mós ba kooperasaun ho Portugál, ita halo aprosimasaun ho GNR (Guarda Nacional Republicana). Ita tenke haree liu mak treinamentu ida ba Diresaun Nasionál Seguransa Rodoviária (DNSR) no polísia komunitária to’o suku sira.

Nune’e mós ho Japaun. Japaun fó apoiu formasaun ba ita-nia polísia komunitária halo estudu komparativu iha Bali-Indonézia no Japaun oinsá bele mai implementa iha ita-nia rain.

TATOLI: Iha relatóriu ne’ebé produs hosi Fundasaun Mahein (FM) no Nova Zelándia hatudu prezensa OPS iha suku hatudu progresu serbisu to’o porsentu 80. Nova Zelándia sujere governu atu foti desizaun hodi apoia finanseiru no ekipamentu serbisu. Oinsá governu nia haree?

MJ-FJP: Ba kestaun ida ne’e, VIII Governu tau atensaun maka’as tebes haree ba iha planu estratéjiku mak aumenta OPS, polísia rodoviária atu fó seguransa ba estrada no aumenta ekipamentu no fasilidade serbisu.

Agora, ha’u rasik ba hasoru señor primeiru-ministru, orienta mai ha’u atu ba haree serbisu OPS, para ita labele hein Nova Zelándia mak fó apoiu. Ita mós tenke halo buat ruma ba polísia komunitária no iha planu orsamentu 2020 ami diskute ona atu tau osan ba OPS, rodoviáriu no migrasaun mak tenke maka’as.

TATOLI: Ita haree mós ba kondisaun infraestrutura, hanesan ministru rasik halo vizita ba postu polísia sira iha kada munisípiu inklui UPF iha Covalima, Batugadé to’o Oé-Cusse no fatin seluk tan, fatin serbisu ba polísia laiha kondisaun no mukit tebes. Ita-boot nia haree oinsá?

MJ-FJP: Iha postu polísia sira ne’ebé ami ba haree iha infraestrutura mínima tebes, toba fatin, eskritóriu serbisu,hariis fatin no bee-moos to’o dapur ha’u sente kondisaun ladún di’ak. Kuaze postu liu 10 maka infrenta problema ida ne’e. Ha’u hanoin, se bele governu halo planta foun ida atu fó kondisaun ho dignidade ba sira nia serbisu, tanba ema hosi sorin (Indonézia) vizita mai ita-nia postu balun, bee-moos no eletrisidade la iha. Ita haree mukit tebes.

Problema sira ne’e ha’u hato’o ona ba señor primeiru-ministru hodi tau ba planu 2020. Nune’e mós ba polísia munisípiu no postu administrativu sira mós ita haree infraestrutura ki’ak tebes hanesan iha Oesilo (Oé-Cusse) nian ne’e postu rai lori halai. Obriga polísia sira tenke ba hela fali iha postu antigu.

TATOLI: Karik ministru sei lembra, bele esplika to’ok objetivu harii Komandu Operasaun Konjuta (KOK) ‘Halibur’ ne’ebé haktuir iha rezolusaun governu númeru 3/2018, 17 fevereiru. Momentu ne’e oinsá mak bele funsiona?

MJ-FJP: Operasaun ‘Halibur’ ne’e sorte governu hamosu lalais. Se lae, ema hosi rai li’ur mak mai tama fali ona atu estabiliza ita. Governu halibur lalais membru F-FDTL no PNTL túr hamutuk para estabiliza hikas rai ne’e no forsa no polísia mak tenke garantia seguransa ne’e metin hodi fó apoiu ba governu no mós setór privadu atu halo dezenvolvimentu ba ita-nia ekonomia rai laran.

TATOLI: Tanba saida maka operasaun ‘Halibur’ ne’e tenke estabelese? Mosu opiniaun públiku katak forsa hahú atu ‘okupa’ seguransa nia kna’ar. Ne’e loos?

MJ-FJP: Ha’u hatene iha momentu ne’ebá governu ne’ebé lidera hosi Kay Rala Xanana Gusmão halo inisiativa harii forsa F-FDTL-PNTL hamutuk hodi halo rai ne’e bele iha dame. Ha’u temi planeamentu integradu polísia ho forsa ne’e tanba iha lei seguransa nasionál ne’e hateten forsa rua ne’e tenke komplementa subsidiária no ita tenke iha polítika ida rasionalizasaun. Katak, osan Estadu ne’e tenke poupa no ita sosa ekipamentu ne’e la’ós ba tau de’it dehan ha’u mós iha kilat, karreta, maibé la halo serbisu.

Ida ne’e ha’u atu hatete saida? Katak planeamentu integradu ne’e buat ne’ebé forsa iha ona, polísia lalika iha. Ha’u fó ezemplu; polísia mariña ne’e harii tan atu halo saida. Ró de’it soe hela. Manutensaun hotu laiha. Ró sira ne’ebé governu Korea fó mai, ida dada sa’e tiha ona ba rai maran.

Ró Portugál nian rua ne’ebé fó ba F-FDTL mós dada sa’e hotu ona iha rai maran, tanba manutensaun la hatán no ró Korea nian rua iha F-FDTL mós bulelu hotu ona. Ne’e tanba ita moris ho plafon, ita halo buat rua atu halo saida.

Agora mós nune’e. Xina fó tan ró ida, tau Xanana nia naran. Ita iha tan ró Lucitânia. Agora ha’u hanoin, ró lima ne’e hamutuk manutensaun osan milliaun ba milliaun. Nusa maka la harii de’it ita-nia Autoridade Mariña para ró ne’e ita presiza ba de’it nesesidade hanesan iha norte ne’e ró hira?

Pesoalmente, ha’u hanoin ró rua de’it to’o ona. Atu ró ne’e halo operasaun maka forsa kaer polísia mós iha ró laran. Rua ne’e la’o hamutuk hodi poupa osan manutensaun milliaun ne’e, poupa osan infraestrutura no poupa buat hotu-hotu.

Polítika seluk tan maka ita hakarak Polísia ho F-FDTL ne’e serbisu hamutuk, haree malu hanesan maun no alin. Labele haree malu hanesan problema iha oknum F-FDTL no PNTL Maliana no Ainaro ne’ebé problema mosu entre forsa rua ne’e.

Tanba ne’e hotu mak halo polítika integradu ne’ebé ha’u halo. Ideia ida ne’e mai mós hanesan ideia ne’ebé Kay Rala Xanana Gusmão halo hodi harii KOK (Komandu Operasaun Konjunta) hosi forsa rua la’o hamutuk no Estadu fásil atu halo kontrola nia membru sira ho lei disiplina ne’ebé sei estabelese no forte.

TATOLI: Bele esplika planu ka polítika planeamentu integradu la’o to’o ne’ebé ona?

MJ-FJP: Ha’u kuandu esplika rekrutamentu ne’e, ema intende ho sabraut. Ha’u dehan ona forsa maka rekruta, polísia simu de’it. Ne’e katak tinan-tinan ita rekruta forsa 600 ne’e ita rekruta hotu iha ne’ebá, ita fó doutrina maka’as, edukasaun sósiu kulturál kona-ba valór disiplina no istória FALINTIL.

Hosi ne’e ami hanoin katak di’ak liu halo rekrutamentu kada tinan ida dala rua de’it. Hosi ne’e sei haruka fila ona ba sivíl ka la presiza kontratu to’o tinan hitu no se sira halo sala duni sai.

Hanesan forsa sira zero-nove (9) no zero-onze (11), sira nia mandatu hotu ona sai ba li’ur. Rekruta fali ema foun. Nune’e, joven sira-nia mentalidade bele forte.  Hanoin katak buat ida ukun-án ne’e la’ós ema mai fó de’it iha bandeiza, maibé lori terus no mate maka hetan independénsia.

Hosi doutrina sira ne’ebé sira apriende bainhira sira nia mandatu ramata, sira sai ba fali polísia simu fali ba mak polísia fó kursu espesialidade hodi nia ba halo serbisu iha kualkér fatin no nia ba nunka atu hanoin ona halo problema.

TATOLI: Ho polítika ida ne’e, karik governu hanoin tetu hotu ona vantajen ho dezvantajen? Ezemplu, se F-FDTL nia komportamentu ladi’ak, keta nia tama fali ba PNTL kle’ur tiha mak halo krime, oinsá?

MJ-FJP: Agora haree ba ba kestaun ne’e, se nia komportamentu la di’ak ita haruka nia fila fali ba vida sivíl no ba ida ne’ebé komportamentu di’ak halo selesaun rekruta nafatin. Ne’e ha’u hakarak dehan katak polísia kontinua rekruta nafatin no ha’u laiha hanoin atu militariza polísia, tanba ita haree polísia ne’e militár ona. Agora tenke halo polísia ne’e sai ba komunitáriu katak besik ba povu tenke maka’as.

TATOLI: Oinsá Ministru Interiór nia esperansa ba serbisu PNTL iha futuru?

MJ-FJP: Importante liu maka polísia mantein serbisu no respeita komandante sira hotu hodi halo serbisu ho komportamentu ida di’ak, atu povu no nasaun fó nafatin konfiansa ba polísia atu asegura pás no estabilidade ita-nia rain.

Tanba, filozofia polísia katak ‘polísia mai hosi povu, serbisu ba povu no loron ida sei fila hamutuk ho povu’. Filozofia ida tan mak ‘polísia tenke serbisu profisionál hodi hametin relasaun polísia no komunidade di’ak liu-tan no promove pás’.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here