DILI,17 maiu 2019 (TATOLI)-Governu liuhosi Sekretáriu Estadu Arte no Kultura, Sábadu aban, sei harii monumentu ho naran Aitós iha Jardim Faról, Dili, iha ámbitu ba komemorasaun restaurasaun independénsia ba da-17 (20 maiu 2002-2019).
“Aban, Sekretáriu Estadu Kultura, sei organiza serimónia ritual kulturál ida hodi harii monumentu hanaran Aitós iha Jardim Borja da Costa, Faról, Dili”, informa Vise Ministru Administrasaun Estatál, Abílio José Caetano, ba Jornalista sira, ohin, hafoin relata planu atividade ne’e ba Prezidente Repúblika, Francisco Guterres Lú Olo, iha Palásiu Prezidensiál, Bairru-Pité , Dili.
Sentidu hosi harii monumentu ne’e, governu hakarak husu matak malirin ba dezenvolvimentu nasaun.
Iha enkontru ho Prezidente Repúblika relata mós kona-ba atividade feira ne’ebé organiza hosi Ministériu Turizmu Komérsiu no Indústria, ne’ebé I hala’o tiha ona iha Kinta (16/5/2019), iha Sentru Konvensaun Dili (CCD-sigla portugés).
Nia dehan, enkuantu ba misa agradesimentu sei selebrasaun loron restaurasaun independénsia nian iha igreja Katedrál Dili iha loron 19 maiu, tuku 7:30 dadeer Oras Timor-Leste (OTL).
Iha loron 20, Prezidente Repúblika maka sai inspetór ba serimónia isar bandeira iha dadeer no Prezidente Parlamentu Nasionál, Arão Nõe de Jesus, sei asume kna’ar inspetór hodi hatún bandeira iha lokraik.
Abílio José Caetano klarifika, komemorasaun 20 de maiu, tinan ne’e, hala’o simplesmente tanba konsentrasaun boot liu ba selebrasaun tinan 20 loron konsulta popular, 30 Agostu 1999 no INTERFET tama Timor Leste.
Iha serimónia ne’e laiha bainaka espesiál hosi nasaun sira iha li’ur, maske antes ne’e haruka ona karta ba Governador Provínsia NTT , maibé seidauk iha konfirmasaun serteza atu partisipa.
Membru Governu sira sei destaka ba munisipiu sanulu resin ida hodi sai inspetór serimónia, enkuantu Rejiaun Administrativa Espesiál Ambenu Oe-Cussé sei lidera hosi Prezidente Autoridade RAEOA, Mari Alkatiri.
Jornalista : Agapito dos Santos
Editór : Francisco Simões
