Ministériu Ensiñu Superiór, Siénsia no Kultura (MESSK) halibur universidade no institutu públiku no privada sira hodi deskuti kona-ba prosesu estabelesimentu Konsellu Reitoria. Diskusaun ne’e hala’o iha salaun Sekretariadu Fundu Dezenvolvimentu Kapitál Umanu, Palásiu Governu, kinta (17/5/2019). Foto Mídia MESSK

DILI, 17 maiu 2019 (TATOLI)—Governu liuhusi Ministériu Ensiñu Superiór, Siénsia no Kultura (MESSK), halibur ideia hosi reitór sira hosi universidade públiku no privadu sira molok estabelese Konsellu Reitoria.

 “Konsellu Reitoria ne’e importante tanba sai hanesan órgaun konsultivu ida para ajuda ministru halo polítika VIII Governu Konstitusionál liuhosi ensiñu superiór atu kuda kualidade,” Ministru Ensiñu Superiór, Siénsia no Kultura, Longuinhos dos Santos, ko’alia iha edifísiu Fundu Dezenvolvimentu Kapital Umanu (FDCH-sigla portugés), Palásiu Governu, sesta (17/5/2019).

Nia esklarese, razaun konvida universidade no institutu hirak ne’e, tanba akreditada hosi governu.

Nia esplika, bainhira estabelese ona Konsellu Reitoria, sei sai hanesan órgaun konsultivu hodi promove diskusaun no sai hanesan espíritu diálogu ida hodi fó hanoin hadi’a sistema edukasaun iha ensiñu superiór.

“Forum reitór no konsellu reitór iha diferensa, maibé ita haree ita-nia nasaun ida ne’e ki’ik, universidade públiku rua de’it, UNTL ho Insitutu Politeknika Betano, entaun ita akumula hamutuk ho universidade privadu sira sai hanesan Konsellu Reitoria,” governante ne’e tenik.

Tuir nia, bainhira estabelese ona Konsellu Reitoria ne’e reitór sira mak sai hanesan makro ba iha universidade sira hotu-hotu.

“Antes ita atu realiza programa ministériu ninian tenke konsulta ho reitór sira para atu bele fó hanoin oinsá mak garante kualidade,” nia katak.

Nia hatutan, enkontru ne’e hanesan prelimináriu no nia kontinuasaun sei halo rejimentu ba funsionamentu reitoria ne’e,” Longuinhos hateten.

Iha biban ne’e, Reitór Universidade Nacional Timor Lorosa’e (UNTL), Francisco Miguel Martins, afirma presiza defini Konsellu Reitoria ho Fórum Reitór.

Tuir nia esperiénsia, Konsellu Reitoria ne’e involve de’it universidade públiku sira, maibé Fórum Reitór mak involve reitór sira hosi universidade privada.

Maibé, Reitór UNPAZ, Lucas da Costa, esplika buat rua laiha diferensa, tanba ne’e reitór universidade públiku no privada tenke la’o hamutuk liuhosi Konsellu Reitoria ne’e.

Tuir observasaun jornalista Agência Tatoli, reitór hosi universidade no institutu sira seluk maioria konkorda polítika governu harii Konsellu Reitoria ne’e.

Partisipante sira ne’ebé partisipa iha diskusaun ne’e maka hosi Universidade Nacional Timor Lorosa’e (UNTL), Unidade da Paz (UNPAZ),  Dili Institute of Tehcnology (DIT), Universidade de Díli (UNDIL), Institute of Business (IOB) no Universidade Orientál Timor Lorosa’e (UNITAL), Institutu Politéknika Betano (IPB), Institutu Superiór Cristal (ISC), Instituto Ciência de Saude (ICS), Institute of Business (IOB), East Timor Coffee Institute (ETCI), Instituto Católica Formação de Professores (ICFP) no Instituto Professional de Canossa (IPDC).

 Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here