Embaixadóra Estadu Unidu Amérika (EUA) mai Timor-Leste, Kathleen M. Fitzpatrick. Imajen/António Gonçalves

DILI, 17 maiu 2019 (TATOLI)– Embaixadóra Estadus Unidus Amérika (EUA) mai Timor-Leste, Kathleen M. Fitzpatrick,  apresia ho Timor-Leste nia riku natureza ne’ebé furak no matak.

“Timor-Leste iha ona rekursu sira atu dezenvolve setór turizmu. Hosi tasi ho biodiversidade boot liu iha mundu, foho Ramelau ne’ebé furak no panorama ne’ebé matak. Nasaun ida ne’e riku ho nia natureza ne’ebé bonita tebes”, hatete  Embaixadóra E Kathleen M. Fitzpatrick, liuhosi nia diskursu iha segundu konferénsia internasionál ho tema: “Destinasaun Turístiku Foun, Pás, Armonia no Fraternidade Dezenvolvimentu Turizmu Relijiozu no Peregrinasaun TL”, ne’ebé hala’o ohin, iha Sentru Konvensaun Dili (CCD-sigla portugés).

Embaixadóra Kathleen, akresenta, TL mós iha nia istória furak no riku ho nia sítiu kulturál no tradisaun oioin ne’ebé iha hodi atrai turista barak.

“Ha’u fiar katak, governu TL kuida no fó atensaun di’ak, hanesan membru komunidade no setór privadu. Nune’e mós TL parte ida hosi eransa kulturál, iha atributu barak ne’ebé bele ajuda dezenvolve turizmu relijiozu hanesan meiu ida ba diversifikasaun ekonomia”, hateten Embaixadóra Kathleen.

Diplomata ne’e salienta katak, konferénsia ne’e marka dahuluk ba TL ne’ebé sai uma na’in, hodi ko’alia kona-ba dezenvolvimentu turizmu relijiozu, iha semana hirak liu ba, nasaun ne’e mós sai uma na’in ba semináriu Forum Rejionál ASEAN no Pacific Partnership, ezersísiu boot liu iha mundu ba apoiu umanitáriu no preparasaun ba dezastre.

Nia hatutan, ho ema barak liután ne’ebé atu mai partisipa iha selebrasaun aniversáriu konsulta popular ba dala-20 (20 maiu 2002-2019), mundu fó atensaun makas liután ba TL no nia potensialidade. Tanba ne’e, konferénsia ne’e oferese ba timoroan sira hanesan oportunidade seluk ida atu aprende esperiénsia hosi nasaun seluk iha mundu.

Matenek no abilidade téknika ne’ebé fahe importante ba TL atu dezeña, implementa no jere di’ak liután dezenvolvimentu turizmu relijiozu. Tanba ne’e,  Embaixadóra Kathleen  mós louva TL tanba ho nia rekursu boot liu maka ema ne’ebé laran di’ak no simu ema hotu.

“ Ema sira ne’e barak maka ha’u hasoru ona iha ha’u nia viajen hale’u nasaun ne’e”, hatete Embaixadóra Kathleen .

Jornalista              : Zezito Silva

Editór                    : Francisco Simões

HAKEREK NO HATÁN

Please enter your comment!
Please enter your name here