Presidente Komisaun Organizadora II Konferencia Internasional Destinasaun Turistiku Foun Paz , Harmonia no Farternidade Dezenvelvimento Turismo Relijiozu no Peregrinasaun Timor-Leste Manuel Vong, Imajen/Egas Cristovão

DILI, 17 maiu 2019 (TATOLI)-Prezidente Komisaun Organizadora ba konferénsia internasionál kona-ba destinu turístiku emerjente sira ho tópiku “Pás, Armonia no Fraternidade : Dezenvolve Turizmu Relijiozu no Peregrinasaun Timor-Leste”, Manuel Vong, hatete, destinu ida ne’ebé iha pás, estabilidade, armonia no fraternidade, ema hakarak atu vizita tanba ne’e fatin di’ak ba na’in, di’ak mós ba bainaka.

Ho razaun ida ne’e mak hili turizmu relijiozu no peregrinasaun hanesan tema prinsipál ba konferénsia ida ne’e. Ema hirak ne’ebé konvida prinsipalmente atu ko’alia ne’e, ema sira ne’ebé deal diretamente ho jestaun destinu turístiku relijiozu.

“Ne’e maka ita konvida hosi santuáriu Fátima-Portugál, mós hosi Tailándia ne’ebé nia istória uluk koñesidu ho destinu turístiku masa, agora, bá ona destinu turístiku mais ba espirituál nian no mós hosi Indonézia ita hili Bali tanba ita hotu hatene Bali hanesan destinu turístiku ne’ebé mantén nia identidade, kultura, mezmu ho turizmu masa ne’ebé boot”, hateten eis Ministru Turizmu ne’e, ohin, iha Sentru Konvensaun Dili (CCD-sigla portugés).

Ba Timor-Leste nia líder relijiaun tomak no eis Prezidente Repúblika, Ramos Horta, ne’ebé fó nia dedikasaun ba Nobel Pás mós sei partilla esperiénsia pesoál sira-nia no mós sira (relijiozu) haree iha rai rasik atu bele kontribui ba dezenvolvimentu setór ne’e.

Ho partisipasaun mai hosi entidade relijiozu sira hotu, estudante, setór privadu sira sei hetan esperiénsia foun ruma no bele kontribui ba dezenvolvimentu setór ne’e.

Ho programa Turizmu Ba Ema Hotu hosi Ajénsia Estadu Unidu ba Dezenvolvimentu (USAID) servisu hamutuk ho Ministériu Turizmu, Komérsiu no Indústria (MTKI) ho instituisaun akadémika sira liuliu DIT bele lori duni Timor-Leste hanesan destinu turístiku ida úniku iha sudeste aziátiku.

“Ita sei la kompete ho Bali, ita sei la liu sira, maski nune’e ita tenke marka ita-nia diferensa hanesan destinu úniku hodi halo destinu turístiku komplementáriu ba buat ne’ebé sira laiha, ita iha”, hateten Manuel Vong.

“Ita hanesan maioria katólika, nasaun ne’ebé ko’alia portugés, nasaun ne’ebé ho multi língua, ita-nia uma-lisan, lulik sira ne’e hotu tau hamutuk ita-nia fiar katólika, kristaun, musulmanu, indú ho konghucu ne’ebé moris iha ita-nia rai, ha’u fiar loron ida turizmu Timor-Leste sei sai destinasaun turístika mundiál, nune’e ita hamutuk lori Timor-Leste bá mundu no lori mundu mai Timor-Leste”.

Espetativa hosi konferénsia ne’e sei hamosu ideia konkreta tanba kada relijiaun ne’ebé sei aprezenta sira-nia pontudevista no sai hanesan parte fundamentál hodi bele konstrui planu bá oin liuliu oinsá dezenvolve setór turizmu relijiozu no peregrinasaun iha territóriu tomak.

Vigáriu Diocese Dili, Pe. Juvito do Rego, Imajen/Egas Cristovão

Vigáriu Diocese Dili, Padre Juvito do Rego, hatete, fiar sarani nian tama ona tinan 500-resin, ne’ebé ninia ain-fatin (vestíjiu) kulturál, relijiozu ne’e barak.

“Ita hakarak promove turizmu relijiozu ida ne’ebé ita iha fatin sagradu sira bainhira ema bá ne’ebá ne’e atu hetan forsa no hetan korajen atu kontinua hala’o moris ida ne’e ho influénsia Maromak nian ona”, Pe. Juvito fo sasin.

Pe. Juvito relata, iha semana santa hamutuk ho amu Bispu bá Oe-Cussé atu akompaña serimónia Senhor Morto nian, ne’e tradisaun ida ne’ebé halo kleur ona no la dezenvolve boot, entaun hakarak atu foti ida ne’e sai nivel nasionál, ema hotu bá iha ne’ebá no mós iha Citrana iha Santa Reliquia, maibé sei taka metin. Tanba ne’e pontu boot rua iha Oe-Cussé ne’e bele foti nia nivel sa’e la’ós ba nasionál, maibé internasionál, bainhira hetan ona nia vantajen di’ak ema sira bele mai buka.

“Iha ne’ebá ne’e ema sira moras bá hetan isin di’ak. Buat ne’e tanba krús ida mosu no krús mosu ne’e fatin iha hela, fatin sira hanesan ne’e ita la bá esplora, la dezenvolve, ita husik de’it buat ne’e hanesan ne’e”.

Pe. Juvito hatete, oinsá bele halo atu ema hotu bele bá mak tenke foti nia sa’e no iha ámbitu ida turizmu relijiozu nian kuandu iha inisiativa boot hanesan ne’e, promove Timor-Leste no mós dignidade, identidade kulturál relijioza katak iha Timór iha buat di’ak barak hanesan Ramelau, Ai-Tara, Fatu-Besi, no fatin seluk ne’ebé seidauk dezenvolve di’ak.

“Santa Krús ho masakre ne’e hetan naran boot, maibé ema ladauk hatene ida ne’e tanba ita seidauk hatama objetu sira ita-nia fatin, istória iha kontestu ida mundu nian no ha’u hanoin ho promosaun, atividade ida hanesan ne’e ita foti ita-nia rikusoin ne’ebé Maromak haraik mai ita sai atu ema hotu bele koko, maibé ho maneira ida diferente la’ós ida ne’ebé mai fa’an matan, soe osan de’it, maibé mai atu hasoru malu ho Maromak”, tenik Pe. Juvito do Rego.

Jornalista   : Maria Auxiliadora

Editór         : Francisco Simões

 

HAKEREK NO HATÁN

Please enter your comment!
Please enter your name here