Sekretáriu Estadu Komunikasaun Sosiál, Merício Juvinal dos Reis 'Akara'. Imajen/Egas Cristóvão

DILI, 16 maiu 2019 (TATOLI) – Sekretáriu Estadu Komunikasaun Sosiál (SEKOMS), Merício Juvenal dos Reis “Akara” hateten prioridade ministériu ba tinan ida ne’e liga ho lejislasaun mak sei produz esbosu ba Lei Radiudifuzaun.

“Iha tinan ne’e, ita sei iha esbosu Lei Rádiudifuzaun. Ekipa prepara lei ne’e dadaun ona hafoin ita haree peskiza ida liuhusi entrevista no relatóriu peskiza iha ona, bazeia ba peskiza ne’e mak ekipa sira halo esbosu no hahú haree aspeitu legál no konseitu,” informa Sekretáriu Estadu, Merício Akara bainhira enkontru ho mídia na´in sira iha Palásiu Governu, kinta ne’e.

Maske nune’e, governante ne’e dehan, prosesu halo Lei Radiudifuzaun sei iha debate públiku hodi diskute tan ho mídia sira no halo semináriu, to’o bainhira esbosu lei ne’e reprezenta hotu ona  parte hotu nia perspetiva no interese, hafoin kontinua lori ba oin.

Kona-ba lei seluk hanesan Lei Informasaun no Transasaun Elektrónika no Lei Krime Sibernétika, governante ne’e dehan sei iha prosesu seluk tan mak tenke haree no la’ós kompeténsia Sekretariu Estadu Komunikasaun Sosiál (SEKOMS) nian de´it maibé envolve entidade seluk hanesan Autoridade Nasionál Komunikasaun (ANC-sigla portugés), TIC Timor.IP no entidade seluk tan.“Ita agora konsentra ba Lei Rádiu difuzaun,” kompromete sekretáriu estadu.

Jornalista: Julia Chatarina

Editór      : Rafy Belo

HAKEREK NO HATÁN

Please enter your comment!
Please enter your name here