Sekretáriu Estadu Kooperativa Arsénio Pereira da Silva. Imajen/Egas Cristovão

DILI, 16 maiu 2019 (TATOLI)-Sekretáriu Estadu Kooperativa (SEKoop), Arsénio Pereira da Silva, dehan, setór kooperativa tantu kooperativa multi-sektorál, produsaun, pekuária, peska, agríkola, turizmu no indústria ki’ik, aban bainrua, nia finalidade oinsá bele kontribui ba produtu internu brutu (GDP-sigla inglés) iha país.

Tanba ne’e maka iha orientasaun, sira ne’ebé envolve an iha kooperativa liuliu rendimentu per kapita ne’e tenke dolar ida ba leten.

“Kuandu tuir ona dolar ida ba leten ne’e signifika katak ita-nia redusaun pobreza iha ita-nia rai ne’e bele halo ba ida ne’e”, Arsénio  Pereira da Silva afirma, ohin, iha Bebora, Dili.

SEKoop Arsénio Pereira da Silva, fiar katak, bainhira envolvimentu ema hotu sai hanesan membru kooperativa tantu kréditu uniaun, kooperativa produsaun ne’ebé prodús depois bele hetan rendimentu hosi ne’ebá. Tanba iha kooperativa liuliu kréditu uniaun ne’e nia iha fonte rendimentu rua mak rai (poupansa) hanesan fonte ida no empresta mós fonte ida.

Atu bele to’o iha ne’ebá, SEKoop hatutan, tenke iha produtu hosi agríkola, peska, pekuária ka indústria ki’ik para hosi ne’ebá maka iha kapitál, nune’e foin sira bá tau iha kooperativa kréditu uniaun depois empresta hodi halo produsaun seluk.

“Ida rai ne’e to’o iha asembleia anuál hetan rendimentu no ida empresta, se membru empresta barak liu nia rendimentu boot liután”.

Sekretáriu Estadu Kooperativa dehan, tuir konstituisaun RDTL iha artigu 138 ne’e, setór kooperativa, setór privadu no públiku pilár ida ne’ebé importante ba dezenvolvimentu ekonómiku.

Iha artigu 138 hatete, organizasaun ekonómiku Timór-Leste nian hatuur iha konjugasaun forma komunitária sira ho liberdade ba inisiativa no jestaun emprezariál no nia koezisténsia ho setór públiku, setór privadu no setór kooperativu no sosiál iha soin meiu produsaun nian.

Jornalista   : Maria Auxiliadora 

Editór         : Francisco Simões

 

HAKEREK NO HATÁN

Please enter your comment!
Please enter your name here