Prezidente Parlamentu Nasionál, Arão Noe de Jesus Amaral, kaer liman ho Prezidente Repúblika, Francisco Guterres Lú Olo. Imajen/António Gonçalves

DILI, 16 maiu 2019 (TATOLI) –Prezidente Repúblika, Francisco Guterres Lú Olo, Tersa (14/5/2019), haruka karta ba Prezidente Parlamentu Nasionál (PPN), Arão Noe de Jesus Amaral, hodi hato’o nia lamentasaun relasiona ho Deputadu Sabino Guntur nia lia fuan “difama” ne’ebé Deputadu Sabino Guntur publika iha nia konta (account) Facebook, foin lalais ne’e.

Membru Bankada PLP, Sabino Guntur hakerek iha nia kronolojia (status) Facebook provoka ema ua’in mak kondena nia, inklui membru PN sira hosi Bankada FRETILÍN. Tanba konsidera lia fuan sira ne’ebé Deputadu Guntur hakerek ne’e la merese hasoru Prezidente Repúblika.

“Ha’u simu karta lamentasaun hosi Prezidente Repúblika iha tersa, horibainrua loro-kraik, no ohin ami halo reuniaun lider bankada hodi ko’alia difamasaun iha Facebook hasoru Xefe Estadu”, informa Prezidente PN, Arão Noe de Jesus Amaral, ba jornalista sira, ohin, iha uma fukun Parlamentu Nasionál.

Arão Noe de Jesus Amaral haktuir, Prezidente Repúblika  Francisco Guterres “Lu-Olo” hato’o nia preokupasaun no lamentasaun ba komentáriu balun hosi Deputadu Sabino Guntur iha Facebook tanba konsidera halo difamasaun.

Ho karta preokupasaun Prezidente Repúblika nian ne’e, ohin, Prezidente Parlamentu Nasionál, konvoka enkontru lider bankada hodi buka konsensu atu oinsá bele hamosu lei ida atu regulariza rede sosiál, hanesan Facebook, twitter, nune’e bele iha kontrolu atu ema bele hetan responsabilidade ba aktu sira.

“Presiza duni bankada sira halo konsensu hodi halo lejizlasaun ruma atu regulariza rede sosiál, atu labele abuza demais liberdade ne’ebé ema la ho responsabilidade ba saida maka nia komete”, afirma Arão Noe de Jesus Amaral.

Tuir nia, la’ós tan kazu deputadu nia komentáriu, maibé liga ba komentáriu komún relasiona ho difamasaun, ezemplu; dalaruma tau foto lideransa nasionál sira ho dezeña karikatura oioin no fó komentáriu insultu.Nune’e maka presiza duni lejizlasaun ida atu regulariza.

Arão Noe de Jesus Amaral, fó ezemplu; momentu sirai partisipa asembleia jerál uniaun inter parlamentár iha Jenebra, tópiku ida ne’e sai debate mundiál tanba mundu tomak no nasaun adiantadu sira mós preokupa ho rede sosiál tanba rede ne’e bele implika estabilidade nasionál no estabilidade mundiál.

Ho lamentasaun hirak ne’e, Timor-Leste parte hosi mundu, nune’e  presiza haree preokupasaun sira atu iha intensaun hodi regulariza rede sosiál atu labele iha problema no afeta seguransa nasionál.

“Karta hosi Xefe Estadu nia lamentasaun mai parlamentu, ami apresia maibé deputadu nia aktu la’ós halo iha plenária, maibé liuhosi Facebook. Nune’e maka rejimentu proteje deputadu ho nia liberdade espresaun maibé kuandu iha li’ur ka liuhosi meiu seluk, ida ne’e responsabilidade individual.”, esplika Prezidente PN, Arão Noe de Jesus Amaral.

Nia salienta, kuandu Prezidente Repúblika sente asuntu ne’e prejudika nia onra no privasidade bele submete ba tribunal.

“Xefe Estadu hato’o nia lamentasaun mai, atu ami anunsia iha plenária no fahe kopia ba deputadu sira no lider bankada sira. Maibé, atu halo desizaun saida iha parlamentu, labele halo buat ida tanba asuntu ne’e opiniaun hosi deputadu nian, la’ós deputadu hato’o liuhosi plenária.”

“La iha meius, se iha plenária de’it mós deputadu protejidu, tanba rejimentu ami nian hateten, deputadu la responde kriminál ba nia aktu”, esplika Arão Noe de Jesus Amaral.

Jornalista   : Zezito Silva

Editór         : Francisco Simões

HAKEREK NO HATÁN

Please enter your comment!
Please enter your name here