Sekretáriu Estadu Kooperativa Arsénio Pereira da Silva. Imajen/Egas Cristovão

DILI, 16 maiu 2019 (TATOLI)-Sekretáriu Estadu Kooperativa (SEKoop), Arsénio Pereira da Silva, hatete, produsaun bani-been tama iha programa Governu Daualuk nian, tanba ne’e, sei dezenvolve produtu ne’e.

“Liuliu iha Laklubar tanba iha parte ne’ebá mak iha, ita seidauk halo hanesan hakiak bani, sira iha ne’ebá ne’e naturalmente iha ai ka fatuk kuak, ida ne’e mak sira prodús foti nia been”, haktuir SEKoop Arsénio Pereira da Silva, ohin, iha Bebora, Dili.

SEKoop orienta ona nia tékniku sira bá Laklubar hodi informa agrikultór bani-been ne’ebé atu lori produtu mai hodi halo nia embalajen ho di’ak, mezmu nia prosesu tradisionál, maibé labele kahur ho bee.

“Ita hakarak nia orijinalidade, depois ita halo mós nia brand (marka), ezemplu iha Laklubar karik ita tau iha botir depois halo embalajen di’ak, tau informasaun bani-been orijinál husi kooperativa ida ne’e. Ne’ebé agora daudaun ida ne’e mós la’o”, Arsénio Pereira da Silva.

Arsénio dehan, bani-been ne’e tenke hatama iha merkadu doméstika tanba daudaun ne’e maluk sira ai-leba ne’e mak leba de’it ho botir, entaun ida ne’e la atrativu.

“Ita halo oinsá mak produtu ne’e atrativu entaun tenke halo no labele halo ho botir boot kedan, maibé ho ki’ik para nia asesu ba folin, ida ne’e mós tenke haree hotu, uitoan maibé ema bele sosa ho dolar ida ka rua”.

Ho ida ne’e maka SEKoop hato’o ona ba nia tékniku sira hodi orienta ba ema sira ne’ebé kolleita bani-been ne’e para haree sira-nia produtu no halo promosaun.

Aléinde ne’e, iha tinan ne’e mós SEKoop ne’ebé simu delegasaun husi Ministru Koordenadór Asuntu Ekonómiku atu reprezenta Governu hodi partisipa iha Nova Zelándia, sei lori produtu ne’e.

“Entaun bani-been ho shorgum (batar ain naruk) ne’e parte ida ne’ebé ami sei lori bá ne’ebá hanesan ezemplu iha promosaun nian”.

Iha programa Governu nian liuliu iha Kooperativa, produsaun bani-been ne’e Timor-Leste prodús rasik bani-been ho lilin ne’ebé bele aproveita ba dezenvolvimentu kooperativa, ne’ebé hadi’a ekonomia familiár. Aposta ida ne’ebé organiza didi’ak iha produsaun bani-been, ho apoiu husi kooperativa, bele hanesan mós kontribuisaun importante ida ba ekonomia familiár.

Jornalista   : Maria Auxiliadora

Editór         : Francisco Simões

 

HAKEREK NO HATÁN

Please enter your comment!
Please enter your name here