DILI, 16 maiu 2019 (TATOLI)—Eis Prezidente Repúblika, José Manuel Ramos Horta, hateten remodelasaun normál bele akontese iha ne’ebé de’it, maibé importante mak governu labele monu.

“Remodelasaun ne’e akontese iha ne’ebé de’it. Ne’e normál. Importante mak governu labele monu,” Horta ba ba jornalista sira iha eis edifísiu Ministériu Finansa, Palásiu Governu, kinta (16/5/2019).

Nia fó ezemplu, iha rai barak foin ukun fulan-neen (6) de’it remodelasaun ona. “Se hakarak halo remodelasaun, halo agora. Ne’e para iha tempu hodi muda no kontinua. Importante mak tenke iha kontinuidade no tenke iha estabilidade,” dehan eis Prezidente Repúblika ne’e.

Nia fó  ezemplu, iha España eleisaun  antesipada dala-tolu kedas. Dahuluk no daruak la konsege forma governu. Datoluk mak konsege forma, maibé oras ne’e atu monu tan ona. Maibé ba Timor-Leste, nia husu lider partidu boot sira tenke túr hamutuk hodi fó solusaun ba problema ne’ebé mosu iha rai-laran.

Premiadu Nobel ba Pás afirma, importante liu mak Primeiru Ministru, Taur Matan Ruak, Kay Rala Xanana Gusmão, Mari Alkatiri, Prezidente Repúblika, Francisco Guterres ‘Lú Olo’ tenke iha dalan hodi ko’alia ba malu no hametin liu-tan estabilidade polítika.

“Para projetu Tasi Mane la’o didi’ak, ita hotu-hotu tenke apoia. Tenke iha konsensu polítiku entre partidu boot sira,”  Eis Ministru Negósiu Estranjeiru no Kooperasaun ne’e fó hanoin.

Ramos Horta dehan partidu sira ne’ebé kaer ukun presiza halo diálogu ho Prezidente Repúblika, Francisco Guterres ‘Lú Olo’.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here