Eis Prezidente Repúblika, José Manuel Ramos Horta

DILI, 16 maiu 2019 (TATOLI)—Eis Prezidente Repúblika, José Manuel Ramos Horta, kestiona maka’as  nota entendimentu (Memorandum of Understaning-MoU) barak hosi governu la atualiza (follow up).

“Ita akompaña MoU barak tebes. Sekretáriu Estadu sira ho sira-nia grupu mós asina, maibé laiha follow up,” Horta ko’alia bainhira husu dadus kona-ba rekursu umanu  iha Sekretariadu Fundu Dezenvolvimentu Kapitál Umanu (FDCH-sigla portugés), Palásiu Governu, kinta (16/5/2019).

Durante ne’e, nia haktuir, governu asina ona nota entendimentu barak iha nasaun sira Asosiasaun Nasaun Sira iha Sudeste Aziátiku (ASEAN-sigla inglés),  Komunididade Ko’alia Lian Portugés (CPLP-sigla inglés) inklui nasaun sira seluk iha mundu.

Eis Prezidente Repúblika ne’e fó hanoin ba membru governu atu atualiza nota entendimentu hirak ne’ebé asina ona, nune’e ema hotu bele rezultadu hosi akordu ne’e no tenke iha kontinuasaun para lori rezultadu ba Timor-Leste.

“VIII Governu lideradu Primeiru-Ministru, Taur Matan Ruak, tenke  buka tuir akordu kooperasaun sira liliu nota entendimentu hahú hosi IV, V, VI no VII Governu Konstitusionál,” Horta sujere.

Antes ne’e, 3 maiu 2019,  Ministru Reforma Lejizlativa no Asuntu Parlamentár, Fidelis Magalhães, reprezenta governu Timor-Leste nia naran no Diretora Ezekutiva Caroline Nguyen, husi Millenium Challenge Corporation Estadu Unidu nian, asina akordu ida kona-ba finansiamentu ba dólar millaun 7,38 ne’ebé dirije atu kompleta preparasaun ba kompaktu ida ba kresimentu ekonómiku no empregu iha Timor-Leste.

Eventu ne’e partisipa hosi membru governu sira hanesan Ministra Edukasaun, Dulce de Jesus Soares, Ministru Obra Públika, Salvador Soares dos Reis Pires, Sekretáriu Estadu Komunikasaun Sosiál, Merício Juvenal dos Reis ‘Akara’, deputadu sira, Embaixadora Estadu Unidu Amérika iha Timor Leste, Kathleen Fitzpatrick no Prezidenti Kámara Komérsiu Indústria Timor-Leste (CCI-TL-sigla portugés), Oscar Lima.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here