Eis Prezidente RDTL, José Manuel Ramos Horta. Imajen Tatoli/António Gonçalves

DILI, 16 maiu 2019 (TATOLI)—Organizasaun Nasaun Unida (ONU-sigla inglés), lideradu Sekretáriu Jerál, António Guterres, avansa ona proposta José Ramos Horta atu halo reforma kona-ba manutensaun pás nian iha mundu.

 “Proposta ne’ebé ha’u aprezenta ba antigu Sekretáriu Jerál ONU, Ban Ki Moon no atuál Sekretáriu Jerál ONU, António Guterres, atu halo reforma ba Peace Cooperation oras ne’e la’o dadaun. António Guterres avansa ona proposta refere,” Horta ko’alia bainhira husu dadus rekursu umanu ba Fundu Dezenvolvimentu Kapitál Umanu (FDCH-sigla portugés), iha Palásiu Governu, kinta (16/5/2019).

Ramos Horta aprezenta proposta ne’e bainhira sai nu’udar Prezidente Painél Altu-Nível Operasaun Pás nian iha ONU.

Painél ne’e iha espesialista 14 hosi Austrália, Xina, Índia, Estadu Unidu Amérika (EUA), Reinu Unidu (Inglaterra), Timor-Leste, Brazil no sira seluk. Ramos Horta lidera misaun iha tinan 2014 no ramata mandatu iha tinan 2016.

“Ha’u hatene pursentu 80 (80%) rekomendasaun ne’ebé ami-nia painél halo ne’e nia (Sekjer ONU) ezekuta dadaun,” hatete Premiadu Nobel ba Pás ne’e.

Maibé, nia haktuir, rai barak mós ezije reforma Konsellu Seguransa iha ONU nian, tanba problema mundiál barak mak la rezolve.

“Ha’u rasik mós ezije, hanesan nasaun-lima (5) ne’e, publikamente sira hateten ami konkorda, maibé depois iha kotuk sira la konkorda malu,” Horta haktuir.

Nasaun-lima ne’ebé iha direitu veto mak hanesan Estadu Undu Amérika (EUA), Rúsia, França, Inglaterra no Repúblika Populár Xina (RPX).

Nia afirma, konflitu barak tebes iha mundu, maibé operasaun pás ne’e la halo funsaun ho di’ak hodi solusiona konflitu sira ne’e. “Tanba konflitu barak teb-tebes iha mundu, maibé rihun 100 operasaun ba pás iha Áfrika, ONU laiha kapasidade materiál, finanseira para halo prevensaun no halo mediasaun,” nia informa.

Eis Prezidente Repúblika ne’e salienta, problema ida mak Estadu membru boot sira hanesan Xina, Rúsia, EUA hamutuk ho Túrkia no Síria, laiha konsellu rezolve konflitu iha médiu oriente.

“Kuaze ita hateten imposivel Sekretáriu Jerál bele hetan susesu, maibé misaun ONU nian importante nafatin,” tenik Eis Ministru Negósiu Estranjeiru no Kooperasaun ne’e.

Nia afirma, membru permante Konsellu Seguransa sira husu no hakarak reforma konsellu seguransa, maibé balun la konkorda, veta malu.

Jornalista: Evaristo Soares Martins

Editór: Xisto Freitas

 

1 KOMENTÁRIU

  1. Hau pesoal apresia teb tebes ho informasaun hirak nebe ita bot sira publika iha media tatoli ida nee. Informasaun hirak nee nudar importatnte. Ami husu mos ba tatoli atu halo koperasaun nebe diak liu ho departamentu media sira husi instituisaun governo ninian atu nune informasuan saida deit nebe ligadu ho servisu nian tatoli bele publika atu nune informasaun nebe tatoli publika laos mai husi ministerio ida maibe ministerio hotu.pareseke tatoli halo hela maibe ami hanoin sebele persija tan atu aumenta liu tan ou fornese informasaun barak liu tan tantu informasan husi rai laran nomos informasaun husi rai liur. Obrigado

HAKEREK NO HATÁN

Please enter your comment!
Please enter your name here