Enkontru dahuluk ba preparasaun eventu internasionál anuál regata Darwin-Dili 2019 ba dasanuluk nian husi MTKI no ministériu relevante. Foto/Mídia MTKI.

DILI, 16 maiu 2019 (TATOLI)-Ministériu Turizmu, Komérsiu no Indústria (MTKI) hamutuk ho liña ministeriál hahú halo preparasaun dahuluk ba eventu internasionál anuál regata Darwin-Dili 2019 ba dasanuluk nian.

Vise Koordenadora ba eventu internasionál anuál regata Darwin-Dili 2019, Cármen Joela Pereira, hateten, eventu ne’e MTKI mak sempre sai komisaun organizadora tanba planu ida anuál no atividade ida ne’e hala’o ona dezde tempu portugés iha 1973 no foin lalais reativa fali iha Governu Konstitusionál Dahaat iha 2010. Hahú husi tinan ne’e, MTKI sai komisaun tanba orsamentu ho planu mai hosi ministériu refere.

Aléinde ne’e hamutuk ho Governu Norte Territóriu Darwin, Austrália, ho asosiasaun saint hodi servisu hamutuk para halo susesu eventu korrida ró internasionál ida ne’e.

Cármen Joela Pereira dehan, atividade korrida ró ba tinan ne’e iha orsamentu ne’ebé ki’ik tebes tanba tinan antes iha montante ne’ebé boot hodi fasilita servisu ho ró ne’ebé tinan anteriór mai ho másimu tebes, balun iha 10, 12 no 13  no halo nia segunda via to’o Oe-Cussé ne’e mak tenke tau osan boot.

“Tinan ida ne’e, tanba ita iha limitasaun osan ba preparasaun eventu refere, ita gasta ba tinan ida ne’e iha rihun US$60, tinan kotuk-kotuk lahanesan”, Cármen informa, ohin, iha Faról hafoin soru-mutu ho parte relevante sira.

Eventu internasionál ida ne’e aléinde partisipa hosi Australianu sira, lataka dalan mós ba timoroan sira hodi partisipa, tanba iha tinan sira uluk (2016) timoroan sira ne’ebé iha Austrália sira mós kompete iha korrida ida ne’e.

“Tinan ne’e lataka dalan no ró agora rejista iha maiu nia laran ne’e foin mak neen, maibé ita seidauk hetan nia lista klaru tanba nia rejistu ne’e seidauk taka to’o inísiu jullu kuandu eventu ne’e atu hahú ona mak foin sira taka”.

Xefe Unidade Misaun Triángulu no Reprezentante Estadu, João Gonçalves, dehan korrida ró ne’ebé halo tinan-tinan entre Darwin no Dili no iha tinan rua ikus ne’e inklui mós Oekusi. Ne’e eventu istóriku tanba iha administrasaun portugeza hahú tiha ona, no iha tempu Indonézia maka la konsege halo, maibé depois restaura tiha independénsia reativa fali.

 “Ne’e eventu istóriku ida ne’ebé ita hakarak mantén hodi hametin liután relasaun entre Timor-Leste no Austrália, liuliu territóriu norte ne’ebé iha sub-rejiaun iha ita-nia área. Ita espera katak eventu ne’e sei kontinua tanba importante ba ita-nia dezenvolvimentu turístiku hotu”.

Tuir ajenda eventu korrida ró husi Darwin mai Timor-Leste sei hala’o iha 13 jullu 2019.

Notísia relevante :http://www.tatoli.tl/2018/07/eventu-korrida-ro-promove-turizmu-maritima/

http://www.tatoli.tl/2018/07/timor-leste-sei-iha-eventu-korrida-ro-husi-darwin-dili-no-oekusi/

Jornalista   : Maria Auxiliadora  

Editór         : Francisco Simões

 

 

HAKEREK NO HATÁN

Please enter your comment!
Please enter your name here