Jerente Marketing Kompañia HEINEKEN Timor-Leste, Benjamin Kwek lansa programa “Kompetisaun Chef Sate Di’ak Liu” iha Bebonuk, Dili. Imajen Tatoli/Eugénio Pereira

DILI, 16 maiu 2019 (TATOLI)—Serveja Tiger Timor-Leste organiza eventu “Kompetisaun Chef Sate Di’ak Liu” ne’ebé sei envolve kuzineiru sira atu te’in hahán ho sabour oioin promove produtu hahán Timor.

Tiger aprezenta eventu dahuluk “Tiger Start Foos” (hahán dalan ibun) iha Timor-Leste ho objetivu atu buka promove kuzineiru tunu sate di’ak liu ba tinan 2019 ne’ebé sei hahú loke iha loron sesta (17/05), iha Jardin Muzeu Rezisténsia, Benfica Dili.

Liuhusi konferénsia ba imprensa iha tasi ibun, Bebonuk, Dili, ohin, Jerente Marketing Kompañia HEINEKEN Timor-Leste, Benjamin Kwek dehan, kompetisaun ne’e sei konvida kuzineiru ne’ebé halo atividade tunu sate iha dalan ninin bele tuir kompetisaun.

Ba dadauk ne’e, nia haktuir, Tiger bolu ona kuzineiru  nai’n rua  hanesan Melly do Rosario no Luis Simões hosi Even2v. Kuzineiru na’in rua ne’e iha esperiénsia no istória furak no barani atu haksoit liuhusi dezafiu hodi realiza sira nia mehi sai kuzineiru di’ak.

Eventu kompetisaun ne’e sei envolve panelista hosi asosisaun kuzineiru otél sira no asosisaun arte sira.

Prosesu kompetisaun sei envolve ema na’in 10 no sei hili ema ida sai manán to’o iha fulan ne’ebé sei hala’o iha loron 30 novembru 2019. Prémiu boot liu sei fó hodi ajuda dezenvolve manán na’in sira nia atividade.

Iha fatin hanesan, Melly do Rosario nu’udar na’in ba empreza Sate Firaku agradese bele hetan fiar hosi Tiger hodi tuir kompetisaun promove hahán Timor nian.

Melly dehan, nia hahú loke negósiu sate hahú setembru 2018 promove liuhusi promosaun iha facebook, no ikus mai nia kolega no kliente barak ba sosa ninia sate.

Nia hatutan, hahú negósiu ne’e ho dezafiu, maibé nia tenta aprende halo reseita ida di’ak hetan suporta hosi ninia inan.

“Ha’u iha ha’u nia negósiu sate rasik. Buat hotu komesa hosi facebok. Aprende halo reseita ida di’ak, hosi ne’e maka hamosu Sate Firaku hodi haboot ha’u nia negósiu,” Melly haktuir.

Ema ne’ebé inspira no sempre fó suporta ba atividade ne’ebé Melly halo mak ninia inan rasik hanesan kuzineira di’ak ida ba nia, no hanorin nia te’in no halo reseita ida di’ak.

Produtu hahán ne’ebé nia prepara hodi faa’an mai ho menu hanesan katupa, sate manu Timor, ikan tunu, sate sosis, sate kulat ho temperu oioin ho presu ki’ik liu mak $0,25 sentavu to’o $5. Atividade tunu sate loke hosi lokraik to’o kalan hetan rendimentu $150.

Melly espera ho Tiger nian apoiu, bele ajuda hadi’a kondisaun fatin tunu sate sai di’ak liu-tan ba oin.

Iha fatin hanesan, kuzineiru Luis Simões hosi Even2v dehan, hanesan sidadaun Portugal nia hahú loke negósiu ne’e ho objetivu atu promove hahán Timor-Leste nian hodi atrai ema rai li’ur bele gosta no han hahán Timor nian.

“Ha’u mai hosi Portugal, maibé ha’u promove hahán Timor nian hodi malae sira mai hosi rai liur bele gosta Timor ninia hahán,” dehan Luis.

Luis informa katak timoroan sira ne’ebé halo atividade negósiu labele moe atu promove no tenke gosta han hahán Timor nian.

 Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here