Ministru Reforma Lejizlativa no Asuntus Parlamentares Fidelis Manuel Leite Magalhães Akompaña Sekretáriu Estadu Komunikasaun Sosiál, Merício Juvinal dos Reis 'Akara' Presidente RTTL Francisco da Silva Gary no Presidente TATOLI,IP Jose da Costa Diretór Unidade de Negócios TIMOR GAP.EP, Luis Gusmão Martins ho Media Nain Sira,Imajen/Egas Cristóvão

DILI, 16 maiu 2019 (TATOLI) –Ministru Reforma Lejislativa no Asuntu Parlamentár (MRLAP), Fidelis Leite Magalhães, iha ámbitu enkontru ho mídia na´in sira, hateten katak governu kontinua mellora kualidade mídia liña ministériu sira.

“Parte governu sei kontinua mellora ami-nia kualidade servisu mídia, tenke iha porta voz ho meiu ne’ebé iha kapasidade atu responde no divulga informasaun,” tenik Ministru Fidelis, iha Palásiu Governu, kinta ne’e.

Nune’e governante ne´e husu: “Ha´u husu mídia sira atu labele tuir bebeik ministru sira, ami lahatene buat hotu”.

Governante ne’e akresenta, ekipa tékniku hanesan diretór sira husi ministériu dalaruma fó informasaun pertinente no kualidade di´ak liu do que ministru sira. “Tanba ne’e ita tenke servisu hamutuk, hodi tratamentu detalla informasaun bele iha melloramentu liu-husi kapasidade hakerek no mellora kualidade reportajen”.

Hodi hadi´a kualidade informasaun ministériu, husi parte Reforma Lejislativa no Assuntu Parlamentár (MRLAP) rasik iha ona porta voz hodi servisu divulga informasaun ba públiku.

“MRLAP no SEKOMS tenta mellora kualidade informasaun hanesan komunikadu imprensa husi liña ministériu,” dehan ministru Fidelis.

Ministru Reforma Lejizlativa no Asuntus Parlamentares Fidelis Manuel Leite Magalhães Akompaña husi Sekretáriu Estadu Komunikasaun Sosiál, Merício Juvinal dos Reis ‘Akara’. Imajen/Egas Cristóvão

Tuir nia, problema mak jornalista sira gosta rekolla informasaun husi membru governu sira, mezmu dala barak ministru sira labele fó informasaun no fó sujestaun atu ba hasoru tékniku sira maibé jornalista sira sempre tenta atu ko´alia ho ministru.

Ministru ne’e mós informa, ba oin governu sei hadi´a nia ´pájina´ divulga informasaun no hadi´a métodu ne’ebé ministériu sira pasa komunikadu sira atu bele fó konteúdu ne’ebé di´ak ba públiku.

“Parte governu sei halo esforsu. Ha´u promete kuandu iha Konsellu-Ministru ha´u sei informa ba membru governu sira atu bele hadi´a sira-nia mákina sira,” tenik governante ne´e.

Nune’e mós nia apresia ba SEKOMS ne’ebé tau asesória imprensa (media officer) sira ba ministériu sira hodi kontribui no hadi´a kualidade informasaun.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here