Eis Premiadu Nobel ba Pás, José Manuel Ramos Horta, akompaña hosi Sekretáriu Ezekutivu FDCH, Isménio Martins da Silva iha edifísiu FDCH, Palásiu Governu. Imajen Tatoli/António Gonçalves

DILI, 16 maiu 2019 (TATOLI)—Sekretariadu Fundu Dezenvolvimentu Kapitál Umanu (FDCH-sigla portugés) fornese informasaun no dadus kona-ba rekursu umanu ba Eis Titulár, José Manuel Ramos Horta.

Ministériu Ensiñu Superiór, Siénsia no Kultura (MESSK) liuhusi Sekretariadu Fundu Kapitál Umanu (FCDH-sigla portugés), sente onradu ho vizita dahuluk Eis Titulár, José Ramos Horta ba FDCH atu hatene progresu servisu ne’ebé durante ne’e iha no atu hetan informasaun no dadus FDCH nian ne’ebé harii hahú hosi 2011 to’o 2019.

Fundu Dezenvolvimentu Kapitál Umanu harii tuir lei Parlamentu nian, ne’ebé halo aprovasaun ba orsamentu jerál Estadu (OJE) ho númeru 1/2011 iha 4 fevereiru 2011, hosi artidu 9 no mós termu previstu iha artigu 32 hosi Parlamentu númeru 13/2009, 21 outubru 2009, ne’ebé ko’alia kona-ba instrumentu atu konsentra hotu kompeténsia hodi determina, finánsia no implementa polítika tomak governu nian ligadu ba dezenvolvimentu kualifikasaun, formasaun no kapasitasaun ba rekursu ka kapitál umanu iha rai ida ne’e.

Razaun Ramos Horta husu dadus tanba hala’o atividade barak liu iha rai seluk, entaun presiza dadus rekursu umanu Timor-Leste nian hodi bele halo esplikasaun nasaun sira ne’ebé hakarak hatene progresu rekursu Timor-Leste.

“Sira (ASEAN) husu ita katak ita-boot sira iha rekursu umanu sufisiente hodi kumpri ita boot sira-nia obrigasaun iha ASEAN. Ita onestu hateten, ami iha difikuldada, maibé esforsu maka’as para la’o,” Ramos Horta informa liuhusi konferénsia ba imprensa iha salaun eis Ministériu Finansa, atuál edifísiu FDCH, Palásiu Governu, kinta (16/5/2019).

Nia dehan, rekursu umanu kada nasaun importante ba prosesu kontrusaun nasaun nian, tanba tinan 2002 Timor-Leste nia rekursu umanu iha nível tékniku mínimu tebes, maibé oras ne’e oin seluk.

“Problema boot liu iha Timor mak ita atu kontribui rekursu umanu iha rejionál inklui mós mundu,” dehan nia.

Tuir nia, bainhira Timor-Leste adere ona ba ASEAN (Association of Southeast Asian Nations) sei kumpriaun barak tebes, ida mak  rekursu umanu tenke sufisiente.

Maske nune’e, nia afirma, laiha rai ida iha ASEAN mak la simu Timor-Leste, tanba iha ona konsensu polítiku atu tama ba ASEAN.

Iha biban ne’e, Sekretáriu Ezekutivu FDCH, Isménio Martins da Silva, tenik rekursu umanu importante tebes iha prosesu konstrusaun nasaun.

“Doutór Ramos Horta sempre hetan konvite hodi ba ko’alia iha rai-li’ur depois divulga informasaun kona-ba Timor-Leste. Aleinde ne’e, halo hela advokásia ida ba Timor-Leste hodi fornese informasaun ba iha sekretariadu ASEAN, liliu dezenvolvimentu rekursu umanu Timor-Leste nian. Ohin ami fornese ona dadus. Hein katak dadus ne’e sufisiente para bele ajuda nai ulun sira,” Isménio ba jornalista sira iha eis edifísiu Ministériu Finansa, Palásiu Governu, kinta (16/5/2019).

Nia haktuir, totál benefisiáriu hahú hosi 2011 to’o 2019 hamutuk rihun atus ida resin-neen, atus haat resin-haat (1,064,14), ne’ebé maioria formandu iha área bolsu estudu hosi universitáriu 226 iha mundu.

Sekretáriu Ezekutivu ne’e dehan, bolsu estudu ne’e barak liu mai hosi Ministériu Saúde, liliu iha medisina jerál no área espesialista, infermajen, parteira no mós área estratéjiku sira seluk.

“Pursentu 85 (85 %) ema servisu ona. Pursentu 10 (10%) kria servisu rasik ba sira-nia án no pursentu 5 (5%) mak seidauk servisu. Tanba ne’e, sira ne’ebé seidauk hetan servisu sei hala’o estájiu profisionál hodi orienta sira ba iha mundu servisu ninian,” nia haklaken.

Tuir dadus ne’ebé Agência TATOLI asesu hosi FDCH, haktuir totál orsamentu hahú hosi 2011 to’o agostu 2018 alokasaun hamutuk $262,974,400.00, persentajen ba despeza %80 maibé ba tinan 2019 nian seidauk publika.

Tipu formasaun ne’ebé FDCH hahú hosi 2011 to’o 2018 oferese mak hanesan formasaun profisionál, formasaun téknika, bolsu estudu. Tipu formasaun seluk mak asisténsia téknika ba setór judisiál no asisténsia téknika ba ensiñu tersiáriu.

Dahuluk, tipu formasaun profisionál hamutuk 810 ho alokasaun orsamentu hamutuk $57,170,945.40, despeza $ 49,009,320.29, balansu $ 8,161,925.11, persentajen taxa ezekusaun %86, númeru benefisiáriu 25,062.

Hosi totál benefisiáriu 25,062 ne’e, pursentu  70 mane no pursentu 30 feto. Formasaun refere pursentu 87 hala’o iha rai-laran no formasaun iha rai-li’ur pursentu 13.

Daruak, tipu formasaun téknika 811 ho nia alokasaun orsamentu hamutuk $27,289,067.35, despeza hamutuk $14,188,662.60, balansu 13,100,504.75, persentajen ezekusaun %52, númeru benefisiáriu 26,774.

Hosi númeru 26,774 ne’e, pursentu 66 involve mane no pursentu 34 involve feto. Tipu formasaun ne’e iha rai-laran pursentu 90 no rai-li’ur ho pursentu 10.

Datoluk, bolsu estudu hamutuk 812 ho alokasaun orsamentu hamutuk $132,993,688.00, despeza $110,864,113.02, balansu 22,129,952.60, persentajen taxa ezekusaun %83, númeru benefisiáriu hamutuk 5,005.

Hosi totál benefisiáriu 5,005 ne’ebé asesu ba bolsu estudu ne’e involve feto pursentu 56 no pursentu 44 involve feto.

Dahaat, tipu formasaun seluk hamutuk 813 ho alokasaun orsamentu hamutuk $37,634,699.25, despeza $29,605,170.15, balansu $8,029,729.10, persentajen taxa ezekusaun %79, númeru benefisiáriu hamutuk 9,653.

Gráfiku ba programa tipu formasaun seluk ne’e hosi 2011 to’o 2018 ho pursentu 66 (6,371)  hosi mane no pursentu 34 (3,282) hosi feto. Formasaun ne’e hala’o iha rai-laran ho pursentu 93 no pursentu 7 hala’o iha rai-li’ur

Dalima, asisténsia téknika ba setór judisiál hamutuk 922 ho alokasaun orsamentu $3,586,000.00, balansu $1,310,000.00, balansu $2,276,000.00, persentajen ezekusaun %37, númeru benefisiáriu la fó-sai.

Daneen, asisténsia téknika ba ensinu tersiáriu hamutuk 923 ho totál orsamentu $4,300,000.00, despeza $4,231,000.00, balansu $69,000.00, persentajen ezekusaun %98, númeru benefisiáriu la fó-sai.

Hosi tipu formasaun neen (6) ne’e, alokasaun orsamentu hamutuk $262,974,400.00, totál despeza hamutuk $209,208,266.06, balansu $53,767,111.56, persentajen taxa ezekusaun %80 no totál benefisiáriu hamutuk 66,494.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here