Primeiru-Ministru, Taur Matan Ruak. Imajen/Egas Cristovão

DILI, 16 maiu 2019 (TATOLI)-Ezekusaun Orsamentu Jerál Estadu (OJE) tinan fiskál 2019 nian, hosi Janeiru to’o Maiu ne’e, atinje porsentu 30 (30%).

Primeiru-Ministru, Taur Matan Ruak, argumenta katak, atinjimentu ezekusaun foin 30% tanba estrutura governu seidauk kompleta ho na’in sida (9) ne’ebé seidauk simu posse hosi Prezidente Repúblika.

Primeiru-Ministru, Taur Matan Ruak, garante to’o fin  2019, governu da ualu ne’ebé nia lidera sei ezekuta hotu orsamentu ne’e tuir programa sira ne’ebé aprova ona ba tinan ne’e.

“Maske estrutura seidauk kompleta, maibé iha orsamentu 2018 konsege rezolve utilizasaun duodesimu no situasaun impase polítika iha rai laran”, afirma Taur Matan Ruak, ba jornalista sira, hafoin audiénsia ho Prezidente Repúblika Francisco Guterres Lú Olo, ohin, iha Palásiu Prezidensiál, Bairru-Pite, Dili .

Tau Matan Ruak, hatutan, iha orsamentu 2018 ultra pasa situasaun estabilidade iha momentu ne’ebá. Ida ne’e orsamentu ida rekoopera país  nia kreximentu tuir governu nia previzaun porsentu 5  no espera katak, iha tinan oin bele sa’e liu tan.

Enkontru ho Prezidente Repúblika, informa mós kona-ba planu preparasaun Orsamentu Jerál Estadu  2020 ne’ebé governu da-ualu sei prepara iha tempu besik.

“Informa ba Prezidente Repúblika kona-ba planu governu nian sei halo retiru hodi komesa haree orsamentu 2020”, tenik Primeiru-Ministru Taur Matan Ruak.

Jornalista   : Agapito dos Santos

Editór         : Francisco Simões

 

HAKEREK NO HATÁN

Please enter your comment!
Please enter your name here