Eis Prezidente RDTL, José Manuel Ramos Horta. Imajen Tatoli/António Gonçalves.

DILI, 16 maiu 2019 (TATOLI)—Eis Prezidente Repúblika, José Manuel Ramos Horta, informa iha ne’ebé de’it estrutura governu tenke balansu ho kuadru tékniku hodi garante funsionamentu servisu administrasaun públika.

“Primeiru-Ministru bele iha vizaun di’ak, bele hasai kursu boot, ministru sira mós bele iha kursu boot, maibé iha kraik laiha buat ida espesialidade, ita-nia vizaun ne’e labele atinje,” Horta ko’alia bainhira husu dadus kona-ba rekursu umanu ba Sekretariadu Fundu Dezenvolvimentu Kapitál Umanu (FDCH-sigla portugés), iha salaun eis Ministériu Finansa, atuál edifísiu FDCH, Palásiu Governu, kinta (16/5/2019).

Iha  fatin hanesan, Sekretáriu Ezekutivu FDCH, Isménio Martins da Silva, hateten atu garante servisu hotu-hotu depende ba kapasidade pesoál.

“Servisu hotu-hotu depende ba kapasidade pesoál. Importante iha kualidade pesoál ka individu, maski ita iha estrutura governu ida ne’ebé forte, maibé ita-nia kuadru tékniku sira mós tenke forte, tanba ne’e FDCH nia programa ida ba funsionáriu atu bele haforsa sira-nia kapasidade iha área hotu-hotu  hodi garante servisu administrasaun públika,” tenik Isménio.

 Nia dehan, servisu administrasaun públika presiza fó atendimentu ne’ebé di’ak ba ema ne’ebé presiza informasaun, labele hamosu burokrasia.

“Ema tenke sente dignifikadu. FDCH sei esforsu servisu hamutuk ho maluk sira hotu kona-ba administrasaun públika en-jerál kabe mós ba iha kompeténsia ba Komisaun Funsaun Públika haree oinsá mellora di’ak liu-tan,” nia katak.

Isménio subliña, tuir lei funsionáriu públiku, sira iha direitu oras 40 kada tinan, signifika semana-ida inklui formasaun jenériku no formasaun tékniku ba área tékniku.

“Dezafiu mak ne’e, se ita ko’alia kona-ba rekursu umanu mak pilár importante iha konstrusaun nasaun nian, ita investe iha rekursu umanu lahanesan investe iha infraestrutura fíziku sira. Investe iha uma ita bele haree uma ida boot ho lalais, maibé ita investe iha rekursu umanu ninia impaktu tinan lima ka tinan 10 mai maka ita foin haree,” nia esplika.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here