Ekipa Interministerial no Timor GAP Halo ekontru kona-ba projetu LNG iha Beaço. Imajen/Midia MOP

DILI, 16 maiu 2019 (TATOLI) – Ekipa interministeriál ne’ebé lidera husi Ministru Estadu Prezidénsia Konsellu-Ministru no Ministru Petróleu no Minerál em ezersísiu, Hermenegildo Augusto Cabral Pereira no Timor GAP hahú diskute kona-ba pontu situasaun konstrusaun Liquefied Natural Gas (LNG) ka Gás Naturál Likifeitu, iha Beaço.

Tuir komunikadu ne’ebé Ajénsia TATOLI asesu, kinta (16/05), diskusaun ne’e realiza ho objetivu atu diskute pontu situasaun projetu LNG iha Beaço no programa identifikasaun rai no propriedade iha área konstrusaun projetu.

Kriasaun ekipa interministeriál ne’e hodi ezekuta programa hanesan identifikasaun rai no propriedade iha área konstrusaun projetu LNG, hodi asegura fatin projetu liuhosi análize ba terrenu ne’ebé iha ona ho ninia karakterístika, hanesan abitasaun, atividade agríkola nune’e mós fatin kultura no sagradu.

Kona-ba kestaun ne’e ekipa interministeriál sira, Timor GAP no autoridade lokál sira serbisu hamutuk hodi identifika no análize kompensasaun ba populasaun sira ne’ebé afetadu husi projetu ne’e, bazeia ba lejizlasaun ne’ebé vigora.

Projetu Tasi Mane prevee kriasaun polu tolu hanesan indústria sira iha Kosta Sul inklui agrupamentu plataforma abastesimentu iha Suai, agrupamentu refinaria no indústria petrokímika Betanu no agrupamentu instalasaun LNG iha Beaço, ne’ebé hafoin instalasaun sei sai indústria petrolífera iha Timor-Leste.

Estrutura projetu koordenasaun prinsipál iha área hanesan pontu kontaktu ida ho komunidade ne’ebé inklui ligasaun ho komunidade no parte administrativa, finanseira no legál, área identifikasaun no mapamentu, finalmente área infraestrutura no suporta ne’ebé inklui analiza kulturál, ambientál, agríkola, pekuária no infraestrutura.

Iha fulan juñu sei realiza enkontru kona-ba projetu ho ekipa interministeriál ba nivel diresaun no pontu fokál.

Iha fulan ne’e kedan sei inisia faze sensibilizasaun, pre-identifikasaun, preparasaun, prosesamentu dadus no mapamentu, ne’ebé sei diskute iha Konsellu-Ministru entre marsu no maiu tinan oin.

Ekipa interministeriál ne’e kompostu husi Ministru Estadu Prezidénsia Konsellu-Ministru no Ministru Petróleu no Minerál em ezersísiu, Hermenegildo Augusto Cabral Pereira, Ministru Ensinu Superiór, Siénsia no Kultura, Longuinhos dos Santos, Ministru Obras Públika, Salvador Soares dos Reis Pires, Sekretáriu Estadu Ambiente, Demétrio de Amaral de Carvalho, Sekretáriu Estadu Terras no Propriedades, Mário Ximenes, Sekretáriu Estadu Arte no Kultura, Teófilo Caldas, Sekretáriu Estadu Asuntu Kombatente Libertasaun Nasionál, Gil da Costa Monteiro “Oan Soru”, Sekretáriu Estadu Protesaun Sivíl, Alexandrino de Araújo.

Alem de membru Governu sira, partisipa mós Prezidente Timor GAP, Francisco Monteiro no ninia ekipa, reprezentante husi Ministériu Administrasaun Estatál, Komandante PNTL Minisípiu Vikeke no Administradór Munisípiu Vikeke.

Lee mós notísia: http://www.tatoli.tl/2019/05/timor-gap-sei-identifika-fatin-konstrusaun-fasilidade-marina-iha-beaco/

Jornalista: Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here