Eis Prezidente Repúblika, José Ramos Horta José Ramos Horta.Imajen/TATOLI

DILI, 16 maiu 2019 (TATOLI)—Eis Prezidente Repúblika, José Manuel Ramos Horta, rekoñese prosesu dezenvolvimentu iha área elétriku la’o ho avansu, maibé iha setór  agrikultura sei iha problema boot.

Eis Ministru Negósiu Estranjeiru no Kooperasaun fó apresiasaun kona-ba dezenvolvimentu setór elétriku tanba maski suku balun seidauk asesu eletrisidade tanba jeografiu rai maibé kuaze tama ona suku sira iha territóriu nasionál.

 “Uluk ita la mehi iha eletrisidade iha Timor tomak, maibé agora komunidade maioria asesu hotu ona eletrisidade. Maibé, estrada sei iha problema no setór agrikultura fallansu boot tanba tinan 17 la konsege garantia seguransa alimentár,” eis Prezidente Repúblika, José Ramos Horta, ko’alia iha eis edifísiu Ministériu Finansa, Palásiu Governu, kinta (16/5/2019), relasiona ho ninia evaluasaun ba dezenvolvimentu rai laran ne’ebé konta hosi komemorasaun Restaurasaun Independénsia 20 maiu mai ne’e tama ona tinan 17 Timor-Leste hanesan nasaun independente.

Horta hateten, ho komemorasaun 20 maiu presiza kurije fallansu ne’ebé durante ne’e iha no halo balansu ba setór sira seluk hanesan setór sosiál, setór infraestrutura, setór ekonómiku no setór boa governasaun.

Nia husu líder nasionál sira túr hamutuk atu lori Timor-Leste ba oin ho prósperu, liliu refere asuntu interese nasionál nian.

Iha biban ne’e, Premiadu Nobel ba Pás rekoñese papél governu Aliansa Maioritária Parlamentár (AMP) iha tinan 2007-2012, ne’ebé konsege rezolve buat balun hanesan eletrisidade no setór saúde.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here