Diretór Jerál Servisu Operesionál no Protesaun Sivíl, Ismael da Costa Babo. Imajen/Eugénio Pereira

DILI, 15 maiu 2019 (TATOLI)—Sekretáriu Estadu Protesaun Sivíl (SEPS), Alexanrinho de Araújo, orienta Servisu Operasionál no Protesaun Sivíl (SOPS) haruka ona karta pedidu ofisiál ba Centro Logística Nacional (CLN) husu foos saka 5000 atu ajuda vítima dezastre naturál sira iha parte leste no kosta súl.

“Sekretáriu Estadu orienta ona despaixu ida mai. Nune’e, ha’u haruka karta pedidu espesiál ida ba administradór CLN atu fó apoiu foos saka 5000 hodi ajuda família vítima sira,” dehan Diretór Jerál Servisu Operasionál no Protesaun Sivíl (DJ-SOPS), Superintendente Asistente Polísia, Ismael da Costa Babo ba Agência Tatoli iha nia kna’ar fatin, Ministériu Interiór, Vila Verde, kuarta (15/05).

Hafoin udan no anin boot akontese iha domingu (05/05) to’o domingu (12/05) iha parte leste no kosta súl, rezulta uma barak hetan estragu no ekipa SOPS, Bombeiru, PNTL no Kruz Vermella Timor-Leste (CVTL-sigla portugés) halo kedas intervensaun ajuda vítima no fó apoiu emerjénsia.

“Ekipa to’o kedas terrenu hodi fó ona apoiu primeiru intervensaun no sei kontinua tan apoiu foos ba vítima hodi tulun sira iha situasaun sira ne’e,” Babo haktuir.

Ismail hatutan, pedidu ne’e Administradór CLN, Augusto Junior simu ona no sei halo koordenasaun ho liña ministeriál sira atu lori foos no sasán nesesidade báziku fahe ba vítima afetadu sira.

Nia haktuir katak anin no udan boot durante semana ida rezulta vítima na’in tolu mate no uma 72 hetan estragu tanba anin boot ai tohar hanehan uma no uma balun ahi han.

Tuir dadus ne’ebé ekipa kompetente rekolla, família ne’ebé afetadu ba dezastre naturál hosi Munisípiu Baucau hamutuk 20, Covalima hamutuk 5, Lautém 12, Manatuto mota lori ema ida agora hetan ona no Manufahi iha vítima 37 no Viqueque uma hamutuk 10 hetan estragu.

 Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here