Ministru Agrikultura no Peska, Joaquim José Gusmão dos Reis Martins. Imajen/Egas Cristovão

DILI, 15 maiu 2019 (TATOLI)-Ministru Agrikultura no Peska, Joaquim José Gusmão dos Reis Martins, ohin, aprezenta proposta rezolusaun Governu kona-ba estatutu Konsellu Nasionál ba Seguransa Soberania Ai-han no Nutrisionál Timor-Leste (KONSSAN-TL) iha Konsellu Ministru (KM), tanba daudaun KONSSAN-TL la’o hela, maibé presiza atu iha estatutu ida hodi regula membru hotu ne’ebé iha KONSSAN-TL laran atu halo servisu ho di’ak.

“Ohin aprezenta ba iha Konsellu Ministru atu bele hetan apresiasaun, ne’e mak ohin iha apresiasaun hosi membru Governu no mós Primeiru-Ministru rasik hato’o hela hanoin balun atu bele hadi’a di’ak liután depois mak aprezenta fali ba Konsellu Ministru”, Ministru  Joaquim José Gusmão dos Reis Martins, informa hafoin soru-mutu KM iha Palásiu Governu.

Joaquim relata sobre estatutu ne’e, iha artigu balun ne’ebé presiza haree, kona-ba membru, redasaun ne’ebé maka iha estatutu refere.

Iha KONSSAN-TL iha ministériu lubuk ida mak iha laran tanba papél ne’e fahe ba ministériu lubuk ida no ida-idak ho nia knaar. Hanesan Ministériu Agrikultura no Peska, oinsá mak bele hasa’e produsaun atu bele hatún taxa inseguransa ai-han nian, maibé iha parte seluk Ministériu Saúde iha mós papél oinsá mak bele asegura hahán ne’ebé di’ak, nutritivu ba iha populasaun, nune’e bele hadi’a má nutrisaun.

Ministru Joaquim hatutan, KONSSAN-TL iha atividade lubuk ida, balu mak haree ba suku haat ne’ebé sai alvu ba halo programa no alvu ne’e fó hanorin mós ba maluk sira iha suku haat ne’e oinsá mak bele prepara hahán ne’ebé prodús rasik ho adekuadu no mós ho nutrisaun ne’ebé di’ak.

“Hosi MAP ita haree nafatin ba produsaun liuliu ba hare, batar no mós ortikultura sira, ho ida ne’e ita mós iha orsamentu limitadu atu bele aselera buat ne’e hotu dala-ida, maibé ita la lakon esperansa ho ida ne’e. Iha mós parseiru dezenvolvimentu sira ne’ebé ajuda ita hanesan FAO, USAID, AUSAID ho sira seluk tan, halo oinsá mak ita bele hasa’e produsaun no mós hadi’a nutrisaun ita-nia populasaun”, tenik Joaquim José dos Reis Martins.

Sobre rezolusaun Governu ne’e hakarak define kona-ba natureza, objetivu, regulamentu, ba kompozisaun no funsionamentu husi KONSSAN-TL, no órgaun interministeriál ba kolaborasaun no elaborasaun, implementasaun, monitorizasaun no avaliasaun husi polítika públika relasiona ho seguransa no soberania ai-han nutrisionál.

Objetivu husi KONSSANTIL mak asegura implementasaun hosi Planu Estratéjiku Dezenvolvimentu Nasionál (PEDN) hosi programa Governu kona-ba seguransa ai-han no nutrisaun, promove koordenasaun husi parte interesada sira iha ámbitu ba seguransa no soberania alimentár no nutrisaun, fortalese kapasidade hosi instituisaun públika ne’ebé hatete sobre dezenvolvimentu no implementasaun polítika iha ámbitu husi seguransa no soberania ai-han no nutrisionál.

Aléinde ne’e, dezenvolve mekanizmu hosi koordenasaun hodi hamenus inseguransa ba ai-han no má nutrisaun, konsolida rekursu umanu hodi bele implementa planu ba seguransa ai-han no nutrisaun.

Jornalista   : Maria Auxiliadora

Editór         : Francisco Simões

HAKEREK NO HATÁN

Please enter your comment!
Please enter your name here