PN liuhosi reuniaun Plenária Ordinária, Tersa (14/5/2019), aprova ona rezolusaun kona-ba komemorasaun loron mundiál ba família ne’ebé monu iha loron 15 maiu, tinan-tinan. Imjan/Media PN

DILI, 15 maiu 2019 (TATOLI)-Parlamentu Nasionál (PN) liuhosi reuniaun Plenária Ordinária, Tersa (14/5/2019), aprova ona Projetu de Rezolusaun nº 29/V (1.a) kona-ba komemorasaun loron mundiál ba família ne’ebé monu iha loron 15 maiu, tinan-tinan.

Komunikadu imprensa ne’ebé Ajénsia TATOLI asesu hosi media Parlamentu Nasionál, ohin, relata katak,  sesaun Plenária ne’e mós halo apresiasaun ba relatóriu fiskalizasaun hosi Komisaun D, ne’ebé trata asuntu Ekonomia no Dezenvolvimentu, ba iha Munisípiu Manufahi no Manatuto. Iha relatóriu  ne’e Komisaun D sujere atu Governu fó atensaun ba problema hirak ne’ebé komisaun identifika.

Alem de ne’e, Bankada FRETILÍN aprezenta deklarasaun polítika hodi ezije transparénsia ba kontratu ne’ebé halo hosi TIMOR GAP ho kompañia internasionál ida ba projetu Beaço, Munisípiu Viqueque nian.

Bankada KHUNTO mós iha nia deklarasaun polítika kona-ba programa toos eskolár hosi Ministériu Edukasaun ne’ebé paradu ona, klínika ba moras mental sira, no asuntu rai nian.

Ministru da Reforma Lejizlativa no Asuntu Parlamentár, Fidélis Manuel Leite Magalhães, hateten, kona-ba transparénsia ba projetu sira Governu sei informa ba Parlamento Nasionál, no asuntu sira seluk kontinua relata ba ministériu kompetente atu solusiona.

Reunion Plenária ne’e prezide hosi Vice-Prezidente  Parlamentu Nasionál, Maria Angelina Lopes Sarmento, ne’ebé akompaña hosi membru meza sira, no hetan prezensa hosi Ministru da Reforma Lejizlativa no Asuntu Parlamentár, Fidélis Manuel Leite Magalhães.

Komunikadu Imprensa: Media PN

Edisaun: Francisco Simões

HAKEREK NO HATÁN

Please enter your comment!
Please enter your name here