Dezeñu inestimentu Ótel ne'ebé Pelican Paradise atu konstrui iha area Tasi-Tolu. Imajen/espesiál

DILI, 15 maiu 2019 (TATOLI) Empreza Pelican Paradise hein hela atu asina akordu ho Governu hodi bele kontinua investimentu ba konstrui otél andár lima iha area Tasi-Tolu.

Logotipo Pelican Paradise Timor-Leste

Ba interese investimentu ne’ebé realmente paradu kuaze tinan 10 nia laran ona ne’e, Prezidente Kompañia Pelican Paradise, Datuk Dr Edward Ong, ohin, hasoru malu ho Prezidente Parlamentu Nasionál, Arão Noe de Jesus Amaral, iha Parlamentu Nasionál.

“Ha’u mai hasoru ho Prezidente Parlamentu Nasionál hodi ko’alia kona-ba investimentu Pelican Paradise. Nia fó resposta pozitivu, maibé ami sei hein desizaun governu nian ba asinatura akordu ida ba konstrusaun andár lima iha Tasi-Tolu”, hateten Datuk Dr Edward Ong.

Nia esplika, atu halo konstrusaun ba obra ne’e, parte kompañia preparadu ona, bele halo ona servisu, maibé hein akordu hosi governu ne’ebé seidauk asina entre parte rua to’o ohin loron.

Datuk Dr Edward Ong hateten, kuandu obra maka ezekuta ona, kompañia sei fó servisu ba timoroan hamutuk 1200 resin no investimentu ne’e sei prevee orsamentu millaun US$ 700 maibé ho fazeadamente.

Iha fatin hanesan, Diretór Ezekutivu Trade Invest, Arcanjo da Silva, salienta, investimentu ne’e di’ak tebes, maibé akordu espesiál investimentu nian maka seidauk asina, nune’e maka ladauk hahú konstrusaun.

Razaun seidauk asina akordu investimentu, Arcanjo da Silva, esklarese,  akordu tenke akomoda interese Estadu no povu nian, nune’e mós tenke mantein interese komersiál investidór nian, tanba ne’e maka seidauk asina akordu.

“Tinan 10 ona seidauk hahú obra tanba akordu seidauk asina, ita nia governu sei tetu aspetu rai ne’ebé ita fornese, enkuantu aspetu ambientál parte Sekretáriu Estadu Meiu Ambiente fó ona lisensa ambientál”, hateten Arcanjo da Silva.

Prezidente PN, Arão Noe de Jesus Amaral, apresia ba empreza Pelican Paradise tanba bele halo investimentu ba rai ne’e nia dezenvolvimentu. “Sira mai aprezenta dezeñu ho kompletu maibé sei hein governu ita nian”.

Jornalista   : Zezito Silva

Editór         : Francisco Simões

HAKEREK NO HATÁN

Please enter your comment!
Please enter your name here