Ministériu Saúde (MS), liuhosi Saúde Munisípiu Dili (SMS) halo sosializasaun livriñu konsulta ba ema ho defisiénsia no pamfletu servisu referral defisiénsia nian. Imajen Antónia Gusmão

DILI, 15 maiu 2019 (TATOLI) – Ministériu Saúde (MS), liuhosi Saúde Munisípiu Dili (SMS) halo sosializasaun livriñu konsulta ba ema ho defisiénsia no pamfletu servisu referral defisiénsia nian.

Diretora Saúde Munisípiu Dili, Agostinha Seguradu, hateten sosializasaun ne’e bele ajuda pesoál saúde sira bele iha koñesimentu hodi fó atendimentu di’ak liután ba ema ho defisiénsia.

Agostinha Seguradu husu ba pesoál saúde, komunidade no autoridade lokál sira utiliza livriñu ne’e hodi fahe informasaun ba ema, ajuda hodi lori ba sentru saúde ne’ebé besik hodi hetan tratamentu ba sira nia saúde.

“Durante ne’e sentru saúde sira la’ós la fó importánsia, maibé nafatin kolabora ho parte hotu atu bele fó atensaun ba ema hot-hotu, tanba saúde ba ema hotu”, afirma tan.

Nia hatutan liuhosi sensibilizasaun ne’e sai hanesan pasu importante ba knaar na’in saúde sira atu bele uza meiu ne’ebé sai hanesan monitorizasaun ba ema ne’ebé saúde ladún di’ak, liuliu ba ema no defisiénsia. Karak, livriñu ne’e sai hanesan livru ida ne’ebé koleta sira nia informasaun iha saúde ne’ebé presiza atensaun.

Iha fatin hanesan, reprezentante ema ho defisiénsia munisípiu Dili, José Monteiro, apresia ho sosializasaun ne’e tanba marka tan pasu importante ba ema no defisiénsia sira.

“Ha’u hanoin sosializasaun ne’e pozitivu tebetebes, tanba ita nia maluk ema ho defisiénsia dalaruma atu asesu ba sentru saúde iha difikuldade barak haree hosi kondisaun sira asesu ladún iha informasaun”, katak tan.

Nia dehan liuhosi sosializasaun ne’e bele fasilita sira kuandu lori livru ne’e ba konsulta sira nia saúde, médiku sira sei atende sira ho di’ak, tanba iha laran hakerek kompletu nune’e doutór sira tuir de’it saida maka orienta.

José Monteiro observa durante ne’e la’o di’ak ona, tantu iha Dili no munisípiu, maibé barak maka hasoru dezafiu.

Monteiro afirma tan seidauk iha dalan seluk ne’ebé sira hetan, entaun dalan ida liuhosi sosializasaun ne’e mak dalan di’ak liu para pesoál saúde sira servisu di’ak liu hodi atende ema ho defisiénsia.

Sensibilizasaun ne’e realiza tanba apoia husi Governu Austrália, no hetan partisipasaun hosi autoridade munisípiu, lokál no ema ho defisiénsia.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here