Vise-Ministru Saúde, Bonifácio Maukoli dos Reis. Imajen António Goncalves

DILI, 15 maiu 2019 (TATOLI) – Ministériu Saúde (MS) propoin orsamentu milliaun $62 ba Orsamentu Jerál Estadu (OJE) 2020, katak husu aumenta milliaun $17 hosi milliaun $45,287 iha tinan ne’e.

Verba ne’e, Ministru Saúde em ezersísiu, Bonifácio Maukoli dos Reis, afirma sei hadi’a prestasaun servisu, liuliu kuidadu primáriu no sekundáriu.

“Planu ba tinan 2020 nian aprezenta ona iha loron 14 fulan ne’e ba Ministériu Finansa ho totál milliaun $ 62 ”, hateten Bonifácio Maukoli dos Reis ba jornalista sira iha Palásiu Governu hafoin enkontru Konsellu Ministru, ohin.

Ministériu Saúde tinan ne’e iha osan milliaun $45,287 inklui saláriu no vensimentu. “Daudaun ne’e prosesu ezekusaun to’o ona porsentu 30, ha’u garante sei asegura kualidade ezekusaun no ezekuta to’o porsentu ne’ebé termina”, katak.

Medida prinsipál ba tinan ne’e hosi MS mak asegura atendimentu ho kualidade ba kuidadu primáriu no sekundáriu ba populasaun hotu, kontinua fó formasaun ba professional saúde sira liuhosi kursu espesializadu, halo treinamentu ba médiku sira no ajente sira iha área saúde

Seluk mak promove servisu onkolojia, katak espesialidade medisina ne’ebé ko’alia kona-ba neoplasis/tumor benigna (maus) no malignas  (fuik). Promosaun ne’e sei inklui; formasaun, edifísiu no ekipamentu.

Planu seluk mak dezenvolve servisu kardiolojia (siénsia medisina ne’ebé trata moras fuan) no pediatria (moras ba labarik sira).

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here